Yobu 10 - IBAYIBOLO 2024

¹ “Naloli ubumi bwane nalita nabo, po nkwiza pakunena amilumbusyo ghane umwakusatuka. Nkwiza pakuvumbula vyosi vivyo vikumbaba mumoyo wane.

² Nkwiza pakumubuzya u Chala ukuti, Utakanenaye ukuti nananga, loli umbuzye inongwa yiyo napalaghula pamaso papako.

³ Nkimba chingakuhobosya nanti ukunjivya, nanti ukuzinsulannya imbombo izya nyobe zyako? Nkimba chingakuhobosya nanti ukwennya zizyo abantu ababibi bakulonda pakumbombela?

⁴ Fwandi uli na maso agha buntu, pamo ukwennya ngati mumo bakwenezya abantu bosi?

⁵ Nkimba amasiku ghako ghayanite na masiku agha muntu? Pamo amaka ghako ghayanite na maka agha muntu,

⁶ umwakuti ulondelezyanje ukupotwa kwane nukulondelezya imbibi zyane?

⁷ Napapo uzimenye ukuti ane inte ninongwa, sona nukuti atalipo nayumoyumo umuntu, yuyo angampoka munyobe zyako.

⁸ “Inyobe zyako zyo zizyo zikamata, po nkimba ilelo ukulonda pakunangannya?

⁹ Kumbuka ukuti ukamata ni tope. Nkimba ilelo ukulonda pakunyosezya sona kulufumbi?

¹⁰ Nkimba utakampungula ngati lukama nukunkazya ngati amafuta agha lukama?

¹¹ Ukanvwalika ane nu mubili nukumamatizya na mafupa ni nkole.

¹² Ukampa ubumi nukundanjizya ulughano, nukughusungilila umuzimu wane.

¹³ “Loli ilelo inzimenye ukuti zinizi zyo zizyo zikaba munyinong'ono zyako, sona inzimenye ukuti izi zyo zizyo ukabatika pakubomba.

¹⁴ Nanti nkananga, ngali ukanennyanga, sona ngali ukanfundagha.

¹⁵ Nanti indi ninongwa, kokuti naghuniwa! Napapo ne muntu musita nongwa, pope bulo intanginusya amaso ghane, pakuti indi ni soni pachifukwa icha mayimba ghane.

¹⁶ Nanti nikwezya nemwene pamwanya ukumbinga ngati nkalamu, nukundanjizya amaka ghako aghakoghofya.

¹⁷ Akabalilo na kabalilo ukwiza nu bwakaboni ubupya nukonjelezya ubukali bwako papane. Utubukatila twako utwa mwaka tukunyizila akabalilo kosi.

¹⁸ “Nkimba choni chicho ukitikizya ukuti impapiwe? Nalondagha nkani nanti nafwanga bulo, bo abantu bachili pakunyennya.

¹⁹ Nalondagha nkani nanti intakizagha muchisu ichapasi, pamo nanti napululilagha bulo mwipumpa ukufuma mulwanda.

²⁰ Nkimba amasiku agha bumi bwane te manandi bulo? Mundeke bulo umwakuti ningatuzyako panandi bulo

²¹ bo inchili pakubuka kuchisu icha bantu abafwe kuko intanganyokako, kuchisu icha chisi icha fii,

²² kuchisu icha chisi ichakoghofya nkani, sona ni chabuvulunganu, kuko ulukozyo luli ngati chisi.”