Yobu 1 - IBAYIBOLO 2024

U Satana akumuyela u Yobu

¹ Muchisu icha Uzi mukabamo umuntu yumo yuyo akaba we Yobu. Umuntu yunuyu atakaba nakalema nakamokamo sona akaba mugholosu, umwakuti akamwiputagha u Chala nukuzinyila imbibi.

² U Yobu akaba na bana abalumendo seveni na bana abalindu batatu.

³ Akaba sona ni ng'ozi 7,000 ni ngamila 3,000 ni nkambaku izya kulima 1,000 ni mpunda 500 sona akaba na bambombo abinji nkani. Akaba mukabi nkani ukubachila abantu bosi aba muvyisu ivya kubufumilo bwizuba.

⁴ Abana bache abanavuli bakaba nu lusekelo munyumba zyabo umwakulekelana, po bakabitizya abayemba babo batatu bala pakulya nukung'wela poka nabo.

⁵ Bo amasiku agha lusekelo ghamala, u Yobu akabukagha na bana bache pakubaswefya. Pandabindabi akabikagha ichakwiyipa ichakocha icha mwana wesi pakuti akinong'onagha ukuti, “Lumo abana bane banangite nukumusamula u Chala umwakusita kumanya.” U Yobu akabombagha ulwiho ulu bwila na bwila.

⁶ Isiku limo abantumi bakiza pakwilanjizya pamaso pa Mwene, u Satana wepe akiza poka nabo.

⁷ Po u Mwene akamulalusya u Satana akati, “Nkimba wafuma kwiyi?” U Satana akamwamula u Mwene akati, “Name pakwendakwenda bulo muchisu chosi ichapasi.”

⁸ Po u Mwene akamulalusya u Satana akati, “Nkimba wamwennyapo umubombi wane u Yobu? Pachisu ichapasi patalipo nayumoyumo umuntu uwakuyana nawe. U Yobu ate nakalema nakamokamo sona we mugholosu, yuyo akunyila ane ne Chala, nukuzinyila imbibi.”

⁹ U Satana akamula akati, “Nkimba ukwinong'ona ukuti u Yobu akukunyila pabulo?

¹⁰ Nkimba te pachifukwa ichakuti ukumuzighilila yuyo poka na bamunyumba yache sona ni vintu vyache vyosi vivyo ali navyo? Awe umusayite nkani pazyosi zizyo akubomba, umwakuti ing'ozi ni ng'ombe zyache zinyamite pachisu chosi ichapasi.

¹¹ Loli yezya bulo pakumufyula vyosi vivyo ali navyo, naloli akwiza pakukusamula pamaso na pamaso.”

¹² Po u Mwene akamubuzya u Satana akati, “Chiza bulo, vyosi vivyo ali navyo navibika munyobe zyako, loli utakamupalamasyanje.” Po u Satana akepapo pamaso pa Mwene.

¹³ Isiku limo bo abana abalumendo na balindu aba Yobu bali pakulya nukung'wela uvinyo munyumba iya mukulu wabo,

¹⁴ intumi yikiza nukumubuzya u Yobu ukuti, “Aswe twalimagha ni nkambaku sona impunda zyalyanga papipi,

¹⁵ po aba Seba bakiza pakulwa ubwite nukufyula ing'ombe ni mpunda. Babaghoghite abambombo bako, umwakuti nene bulo ne napona ukuti nize pakukubuzya!”

¹⁶ Bo intumi yila yichili yikumulingannya, intumi iyinji yikiza nukuti, “Akamesya kakapaya nukocha ing'ozi, poka na bambombo bako, umwakuti nene bulo ne napona ukuti nize nkubuzye.”

¹⁷ Bo intumi yila yichili yikumulingannya, intumi iyamwabo yikiza nukuti, “Utubukatila tutatu utwa mavyondongo utwa ba Kaladeya tukiza nukufyula ingamila zyako zyosi, nukubaghogha abambombo bako, umwakuti nene bulo ne napona ukuti nize nkubuzye!”

¹⁸ Bo intumi yila yichili yikumulingannya, intumi iyinji yikiza nukumubuzya ukuti, “Abana bako abalumendo na balindu balyanga nukung'wela uvinyo munyumba iya mukulu wabo.

¹⁹ Panapo na panapo impepo iyamaka nkani iyakufuma munkolongo yikaputa nukuyikoma inyumba yosi yila. Inyumba yila yikamongonkana nukubawila, po bosi bafuye, umwakuti nene bulo ne napona ukuti nize nkubuzye!”

²⁰ Bo u Yobu ivwa zinizi akimilila, nukuzepula inkazo yache sona akamwa isisi zyache pachifukwa icha chitima. Po akawa pasi nukumwiputa u Chala

²¹ nukuti, “Nkiza nkule ukufuma mulwanda lwamayi, po nkwiza pakunyokela nkule. U Mwene akampa sona weyuyo anfyulite. Itabwa ilya Mwene lipaliwanje.”

²² Napapo zikaba bunubu, u Yobu atakanangapo pamo ukumusonta u Chala.