Yesaya 9 - IBAYIBOLO 2024

¹ Loli tekukabe ichisi kubabo bali mububavu ubukulu nkani, kale akachisya pasi ichisu icha Zebuloni ni icha Nafutali, loli muntazi akwiza pakuchindika izila iya munyanja, ichisu icha kwisila ilya Yolodani mu Galileya, muchigaba icha bantu babo bate ba Yuda.

² Abantu babo bakwenda muchisi, bennya ulukozyo ulukulu; Abantu babo bakwikala muchisu icha bantu abafwe, ulukozyo lwabalamila.

³ Wayikuzya inko nukubalizya ulusekelo, bakusekela pamaso papako, ngati mumo abantu bakusekelela pakabalilo aka nyinulo, sona ngati mumo abantu bakusekelela, bo bali pakugabana ivyakufyula.

⁴ Pakuti ukapyola ikoli lilyo likabang'wamila, sona ni ndisa yiyo yikukoma pavimpunko vyabo, wazipota inko zizyo zikabayivya nukubanangannya abantu bako, ngati mumo ukabapotela abasilikali aba Midiyani.

⁵ Isapato zyosi zizyo abalwabwite bakabombezya kubwite, sona amenda ghosi ghagho ghatonyeliwa nibanda, ghakwiza pakochiwa numoto ngati nkwi.

⁶ Pakuti u mwana atupapiliwa aswe, u mwana umwanavuli apeghiwa kukwitu, weyuyo akwiza pakulaghila. Akwiza pakwitiziwa ukuti mumanyisya amahala uwakuswighisya, u Chala Uwamaka Ghosi, U tata uwa bwila na bwila, u Mwene uwa mutende.

⁷ Ukonjeleziwa ukwa bulaghili bwache nu mutende butakwiza pakumala. Akwiza pakulaghila pachitengo icha Devedi napabumwene bwache, pakubwikazya nukubukuzya mubwanaloli nu bugholosu ukwanda pakabalilo kalakala sona bwila na bwila. Ulweke ulwa Mwene Uwamaka Ghosi lukwiza pakuzimalizya zinizi.

Ubukali ubwa Mwene paba Izilayeli

⁸ U Mwene atuma amazyu agha kumususya u Yakobo, ghakwiza pakuwa paba Izilayeli.

⁹ Abantu bosi aba muchisu icha Efulayimu sona naba mu Samaliya babo bakunena umwakwikwezya nukwitutumula, ukwa mumoyo bakwiza pakuzimanya zinizi,

¹⁰ “Injelwa ziwiye pasi loli tukwiza pakuzenga, sona namabwe aghakubiza, amakwi agha makuyu baghadumuliye pasi, loli tukwiza pakughapyanizyapo na makwi agha mwale.”

¹¹ Loli u Mwene abapa amaka abalwani aba Lezini, Sona abapela balwani bache pakuba nulombwa nawe.

¹² U Siliya kubufumilo bwizuba, nu Filisiti kubwinjililo bwizuba bamumila u Izilayeli na malomo ghabo, pa zyosi zinizi ubukali bwache butakutozoka, inyobe yache yigholokite bulo

¹³ Loli abantu aba mu Izilayeli batanyokeye kukwache yuyo akabakoma, pamo pakumulonda u Mwene Uwamaka Ghosi.

¹⁴ Po u Mwene akaghudumulako umutu nu musinda uwa ba Izilayeli, nutusamba utwa mabale ni ntete mwisiku lyoka.

¹⁵ Abasongo na bantu abachindikiwa gho mutu, abalaghuzi babo bakumanyisya ubumyasi gho misinda.

¹⁶ Pakuti abalongozi babo bakubalongozya abantu bakubasovya, sona babo bakulongoziwa bakupulumpa.

¹⁷ Polelo u Mwene atakwiza pakuhoboka na balumendo, pamo pakuba ni chisa na balanda sona na bafwilwe, pakuti bosi batamumenye u Chala sona babomba mbibi amalomo ghabo ghakunena ivyabupunganu. Pa zyosi zinizi ubukali bwache butakutozoka, inyobe yache yichili yigholokite bulo.

¹⁸ Naloli ububibi bukwaka ngati moto ukocha abantolovu na mivwa, ukocha umusitu, sona ilyosi lyache likukwela kumwanya ngati libingu.

¹⁹ Pachifukwa icha bukali ubwa Mwene Uwamaka Ghosi ichisu chikwiza pakupya sona abantu bakwiza pakuba nkwi izya moto, atalipo nayumo yuyo akwiza pakumupelela ichisa uwamwabo.

²⁰ Kundilo bakwiza pakulya, loli pope bulo bakwiza pakuba nizala, kumongo bakwiza pakulya loli batakwiza pakwikuta. Umuntu wesi akwiza pakulya abana bache.

²¹ Abantu aba muchisu icha Manase bakwiza pakulwa naba Efulayimu, sona aba Efulayimu bakwiza pakulwa naba Manase, Po bosi poka bakwiza pakumusambukila u Yuda. Pa zyosi zinizi, ubukali bwache butakutozoka, inyobe yache yichili yigholokite bulo.