Yesaya 8 - IBAYIBOLO 2024

Nizya mwana uwa Yesaya

¹ U Mwene akambuzya akati, “Senda ichakusimbapo ichikulu usimbepo amasimbo amakulu aghakuti, Mahelishalali hashi bazi.

² Nkwiza pakumwitizya umuputi u Uliya nu Zekaliya umwana uwa Yebelekiya pakuba bakaboni bane abasubiliwa.”

³ Po nkaghona numuchi wane umulaghuzi umukolo, yuyo akamela ulwanda nukupapa umwana umulumendo. U Mwene akambuzya akati, “Umwite ukuti Mahelishalali hashi bazi.

⁴ Pakuti bo umwana achili pakwanda pakunena ukuti, ‘Tata’ pamo ‘Mayi.’ Ichuma icha mu Damasika nivyakufyuliwa ivya muchisu icha Samaliya vikwiza pakusendiwa nu mwene uwa ku Asiliya.”

⁵ U Mwene akambuzya sona akati,

⁶ “Pachifukwa ichakuti abantu aba bakana amizi agha Shilowa, ghagho ghakwenda panandipanandi sona bakughoboka nu Lezini umwana uwa Lemaliya,

⁷ polelo u Mwene akwiza namizi papabo, amizi aghakwizula aghamaka agha lusoko, we mwene uwa chisu icha Asiliya nu buchindamu bwache bosi. Lukwiza pakusata muzila zyache zyosi, nukuloboka mulubazu lwache losi

⁸ ghakwiza pakwinjila namaka muchisu icha Yuda, po ghakwiza pakusata, nukifika musingo. Akwiza pakuzungulula ivipapande vyache, ukuvwinka mububaba ubwa chisu chako, wee Imaniweli!”

⁹ Mwe Inko, bomba ububibi, loli nkwiza pakubatizannya, Teghelezya mwe vyisu ivya kubutali. Mwiyannye pakulwa ubwite, Mwiyannye pakulwa ubwite, sona pakunanganika! Mwiyannye pakulwa ubwite, sona mukwiza pakunanganika!

¹⁰ Munene zyosi zizyo mukulonda pakunena, loli zikwiza pakuba zyabulo sakizya imbatiko zyinyu, loli zitakwiza pakubomba pakuti u Chala ali naswe.

U Mwene akumusoka umulaghuzi

¹¹ U Mwene akanena nane namaka ghache ghosi, nukunsoka ukuti intakendaye muzila izya abantu banaba. Akambuzya akati,

¹² “Utakivwanaye pakubomba ububibi pachifukwa ichakuti abantu abanji bakubomba, sona utakazinyilaye zizyo bakuzinyila, po utakazinyilaye.

¹³ U Mwene Uwamaka Ghosi weyuyo ubaghiye pakumupima pakuba muzelu, weyuyo ubaghiye pakumunyila weyuyo ubaghiye pakumutetema,

¹⁴ sona akwiza pakuba buzilo ubuzelu, loli ku banyumba iya Yuda nu Izilayeli bakwiza pakwikala ngati libwe mu Ziyoni, lilyo likwiza pakubapela abantu ukwipunula, ilyalabwe lilyo likwiza pakubawisya abantu, akwiza pakuba chipingo ku bantu babo bakwikala mu Yelusalemu.

¹⁵ Abantu abinji bakwiza pakwipunulapo, bakwiza pakuwa nukupyoka, Bakwiza pakuwila muchipingo nukulemiwa.”

¹⁶ Pinya ulusimikizyo nukudidimikizya ululaghilo mukasi mubamanyili bane.

¹⁷ Nkumulindilila u Mwene, yuyo akubafisa icheni chache abamunyumba iya Yakobo. Po nkwiza pakumusubila.

¹⁸ Ane indipano, poka nabana babo u Mwene ampiye. Twe vimanyilo ni vyakuswighisya muchisu icha Izilayeli ukufuma kwa Mwene Uwamaka Ghosi, yuyo akwikala Pighamba ilya Ziyoni.

¹⁹ Loli abantu bakwiza pakukubuzya ukuti utulalusikizyeko ku bantu babo bakunena ni mizimu, sona na bamayele bosi. Babo bakuteketa nukulila ngati kayuni, nkimba abantu batabaghiye pakulalusya kwa Chala wabo? Nkimba choni chicho bakubalaluzikizizya abantu abafwe mubuzilo ubwa bantu abumi?

²⁰ Ululaghilo nu lusimikizyo nanti vitakunena amazyu ghanagha vite nulukozyo nalumo.

²¹ Bakwiza pakwendakwendagha muchisu chosi bo bali nizala nukuwa amaka, bakwiza pakwennya kumwanya nukumughuna u mwene wabo nu Chala wabo.

²² Po bakwiza pakwennya pachisu ichapasi intamyo, nububavu ubukulu nkani ni chisi ichakoghofya, bakwiza pakutaghiwa muchisi.