Yesaya 66 - IBAYIBOLO 2024

Ubulongi nu lusubilo

¹ U Mwene akuti, “Kumwanya cho chitengo chane icha bumwene, sona ichisu ichapasi cho chakutambalizizyapo inyayo zyane. Nkimba yili kokwiyi inyumba yiyo munganzengela ane? Nkimba ubuzilo bwane ubwakutuzyapo, bukwiza pakuba po piyi?

² Ivintu vyosi nene nkavipela, po vyosi vinivi vyane.” U Mwene anena “Loli umuntu yuyo nkumulonda, we muntu yuyo akwiyisya, yuyo apindukite nukuzileka imbibi zyache, sona yuyo akunyila nukughivwila amazyu ghane.

³ Loli abantu babo bakughogha ing'ombe pakuba chakwiyipa, bali ngati muntu yuyo aghogha umuntu, abantu babo bakughogha ing'ozi pakuba chakwiyipa, bali ngati muntu yuyo anyonga imbwa isingo, sona abantu babo bakubika amalezi pakuba chakwiyipa, bali ngati muntu yuyo akubika ibanda ilya ngulube, abantu babo bakubika ichikumbusyo icha ivyakununkila, bope bulo bali ngati muntu yuyo akuchiputa ichifwani. Basala izila zyabo, sona imizimu yabo yikuhoboka nivintu ivibibi,

⁴ po nane bulo nkwiza pakubizila nintamyo, pavintu vivyo bakuvinyila. Pakuti bo nkubitizya patakabapo nayumo uwa kunyamula, bo nkunena, patakabapo nayumo uwakanteghelezya. Bakabomba imbibi pamaso papane nukusala vivyo vitakunhobosya.”

⁵ Ivwa izyu ilya Mwene, amwe mwe mukumunyila nukumwivwila, “Abawamwinyu babo bababengite, nukubafumyamo chifukwa icha itabwa lyane, bakuti, ‘Leka u Mwene achindikiwanje, umwakuti twennye ulusekelo lwako!’ Loli bakwiza pakukoziwa isoni.

⁶ Ivwa ichongo ukufuma mukaya akakulu nkani, ivwa izyu ukufuma mu Nyumba iya Chala! Izyu ilya Mwene, lilyo likubafunda abalwani bache.

⁷ “Bo achili pakusayiwa, umukolo akusayiwa umwana, bo ububavu buchili pakumwagha, akupapa umwana umulumendo.

⁸ Nkimba wenu yuyo ivuyepo ngati zinizi? Nkimba wenu yuyo enizyepo ngati zinizi? Nkimba ichisu chingapeliwa mwisiku lyoka pamo inko ukusayiwa pakabalilo bulo akanandi? Pakuti akaya aka Ziyoni, bo kivwa ivyakubaba kapapa abana.

⁹ Nkimba ningamupa bulo abana bo intamupapizizye? Nkimba nkwighalila ulwanda, bo nkwavwa pakupapizya abana?” U Chala anena.

¹⁰ “Sekelagha poka nu Yelusalemu, sona muhobokaye nawe, mwebosi mwe mumughanite, sekelagha nkani mwebosi, mwe mukumulilila.

¹¹ Pakuti mukwiza pakonka amabele, ukuti musangalusiwanje nukwikuta, mukwiza pakung'wela nkani, sona nukuhoboka nulukama ulwinji ulwa kubakwana.”

¹² U Mwene akuti, “Nkwiza pakubapa umutende ngati lusoko, sona nu bukabi ubwa inko ngati kasoko akakwizula, mukwiza pakonka nukupakatiwa sona nukupumiziwa.

¹³ Ngati mumo u mayi akumusangalusizya u mwana wache, momumo nkwiza pakubasangalusizya namwe, mukwiza pakusangalusiwa mu Yelusalemu.”

¹⁴ Nanti mwazyennya zinizi, amoyo ghinyu ghakwiza pakusekela, sona mukwiza pakulemba ngati lisote, inyobe iya Mwene, yikwiza pakumanyikwa kubabombi bache, loli akwiza pakubakalalila abalwani bache.

¹⁵ Ennya, u Mwene akwiza numoto, sona ingolo zyache zili ngati we kankungu, akwiza pakukwanilisya ubukali bwache ubwakoghofya, sona ukuchemela kwache kuli ni ndimi izya moto.

¹⁶ Pakuti u Mwene akwiza pakulongela numoto, nu bwite pabantu bosi, sona abinji bakwiza pakughoghiwa nu Mwene.

¹⁷ “Babo bakwipaghula nukwiswefya bene nukubuka mumaghunda, pakumukonka yuyo ali pakasi pababo bakulya inyama iya ngulube niya mbeba nivinji ivyamwiko, bosi bakwiza pakumalila poka.” U Mwene anena.

¹⁸ “Pakuti imenye imbombo zyabo ninyinong'ono zyabo, indi papipi pakuzibungannya inko zyosi, bo biza bakwiza pakwennya ubuchindamu bwane.

¹⁹ “Nkwiza pakubika ichimanyilo pakasi papabo, sona nkwiza pakutuma babo bakapona ku inko, kuchisu icha ku Talishishi nicha ku Libiya nicha Lidiya nicha Tubali sona nicha Gilisi na kuvyisu ivyakubutali ivya mulubazu munyanja vivyo vitivuye ubumanyikwe bwane pamo ukubwennya ubuchindamu bwane. Bakwiza pakufumusya ubuchindamu bwane pakasi pa inko.

²⁰ Sona bakwiza pakubizila na bawamwinyu bosi, ku inko zyosi, kwi ghamba lyane izelu mu Yelusalemu pakuba chakwiyipa kwa Mwene pafalasi, pangolo izya chela, pampunda sona na pangamila.” U Mwene anena. “Bakwiza nabo, ngati mumo aba Izilayeli bakwizila ni chakwiyipa chabo icha busu, ku Nyumba iya Mwene bo banyamuliye muvibombelo vivyo viswefiwe.

²¹ Sona nkwiza pakubasala bamo pakuba baputi abanji pakuba ba Levi.” U Mwene anena.

²² “Ngati chisu ichakumwanya ichipya ni ichapasi ichipya vivyo nkwiza pakuvipela vikwiza pakubangako bwila na bwila pantazi papane.” U Mwene anena. “Po itabwa lyane nabaluko lwinyu vikwiza pakubangako bwila na bwila.

²³ Pisiku ilya Kupanta ukwa Mwezi ukufika Pisiku ilinji ilya Kupanta ukwa Mwezi ughunji, ukwanda Pisiku Ilyakutuzya ukufika Pisiku ilinji Ilyakutuzya, umuntu wesi akwiza pakwiputagha pantazi papane.” U Mwene anena.

²⁴ “Bakwiza pakubuka pakwennya imivimba iya bantu babo bansambukiye, isomi zyabo zitakwiza pakufwa pamo ghope umoto wabo ghutakwiza pakuzima, bakwiza pakuba bulo vinyazu ku bantu bosi.”