Yesaya 65 - IBAYIBOLO 2024

U Chala akubafunda abasambuke

¹ U Mwene akuti, “Nkivumbula ku babo batakandaba, nkaghiwa nababo batakandondagha. Ku luko lulo lutakanyiputa nkati, ‘Ane indi pano, ane indi pano.’

² Akabalilo kosi nkugholosya inyobe zyane, pabantu abakusambuka, babo batakwenda muzila inyiza, bakuzikonka inyinong'ono zyabo,

³ abantu babo bakwendelela pakunkalalizya, pakubika ivyakwiyipa mumaghunda, nukocha utwa kununkila pachighemo icha njelwa,

⁴ babo bakwikala muma pumpa busiku bosi, kubuzilo ubwa kuvwama, bakulya inyama iya ngulube, nukung'wela umusuni uwa nyama iya vyakwiyipa ivyamwiko,

⁵ babo bakunena ukuti, ‘Ikalagha bulo kunuko, pakuti ne muzelu kukwako!’ Abantu banaba bali ngati lyosi ilya mumpuno zyane, umoto ghugho ghukwaka musanya ghosi.

⁶ “Ennya, zisimbiwe pamaso papane ukuti, Ntakwiza pakuba bulo myee, loli nkwiza pakubatanizya umwakukwana, nkwiza pakubatanizya zizyo zibabaghiye,

⁷ pachifukwa icha mbibi zyabo ni mbibi izya banyenya babo.” U Mwene anena. “Pakuti abene bakocha ivyakwiyipa patughamba nukunyazya ane patughamba, nkwiza pakubatanizya, pachifukwa icha mbombo zizyo bakabombagha.”

⁸ Izi zyo zizyo u Mwene akunena akuti, “Ngati mumo u vinyo akwaghiwa, mukankose aka mampesya abantu bakuti, ‘Mutakamunangannye, pakuti muchili muli ubwiza mumo,’ po nkwiza pakubomba mubuzilo ubwa babombi bane, ntakwiza pakughanangannya ghosi.

⁹ Mwa Yakobo mukwiza pakufumamo abaluko, sona aba mu munyumba iya Yuda, bakwiza pakusenda ichisu icha maghamba. Abantu bane abasaliwa bakwiza pakubapyana, sona ababombi bane bakwiza pakwikala kulakula.

¹⁰ Ichisu icha Shaloni chikwiza, pakuba buzilo ubwakudimilako ing'ozi ni mbuzi, sona ikombe ilya Akoli, likwiza pakubanga chimo icha midimo, iya bantu babo bakundonda.

¹¹ “Loli amwe mwe mukumukana u Mwene, nukuliluvya ighamba lyane izelu, amwe mwe mukuyannya ichakulya, ukuti mubahobosye abachala, u chala uwa lusako nu chala uwa mukosi, nukwizuzya uvinyo uwakongannya uwa bumalilo,

¹² nkwiza pakubapela ukuti mughoghiwe nupanga, po mwebosi mukwiza pakwinamila pasi, ukuti muboliwe, pakuti nkabitizya loli mutakamula, nkanena loli mutakanteghelezya. Mukabomba ububibi pamaso papane, nukusala vivyo vitakunhobosya.”

¹³ Polelo u Mwene Uwamaka Ghosi akuti, “Ababombi bane bakwiza pakulya, loli amwe mukwiza pakuba nizala, ababombi bane bakwiza pakung'wela, loli amwe mukwiza pakubanga ninyota, ababombi bane bakwiza pakusekela, loli amwe mukwiza pakukoziwa isoni.

¹⁴ Ababombi bane bakwiza pakwimba, nukuhoboka mumoyo, loli amwe mukwiza pakulila, pachifukwa icha kubaba mumoyo, pachifukwa icha kuyimba ukwa mumuzimu.

¹⁵ Mukwiza pakubalekela abasaliwa bane, itabwa lyako ilya chighune, po u Mwene Uwamaka Ghosi akwiza pakukughogha. Loli ababombi bache akwiza pakubita itabwa ilinji.

¹⁶ Wesi yuyo akulaba ulusayo muchisu, akwiza pakulwaghila mwa Chala uwa bwanaloli, wesi yuyo akulapa ichilapo muchisu, akwiza pakulapila mwa Chala uwa bwanaloli. Pakuti intamyo izyakale zikwiza pakuluviwa, nukufisiwa pamaso papane.

Ukupeliwa ukupya

¹⁷ “Ennya, nkwiza pakupela, ichisu ichakumwanya ichipya ni chapasi ichipya. Ivintu ivyakale vitakwiza pakukumbukiwamo, pamo ukwiza munyinong'ono.

¹⁸ Loli mubanje mwebahobosu nukusekela ukwa bwila na bwila, pavivyo nkwiza pakupela, pakuti nkwiza pakumupela u Yelusalemu, pakuba kaya akakuhobosya, sona abantu bache pakuba lusekelo.

¹⁹ Nkwiza pakusekela nu Yelusalemu, sona nukuhoboka na bantu bane, ichongo icha kufwifwitila ni chakulila, vitakwiza pakwivwikamo nalumo.

²⁰ “Mutakwiza pakubamo sona umwana umunandi, uwakwikala bulo amasiku amanandi, pamo usongo yuyo atakwanisizye amaka ghache, umwana akwiza pakufwa nanti ali namaka 100, po umubomba mbibi amaka 100, ghakwiza pakuba chighune.

²¹ Bakwiza pakuzenga inyumba, nukwikala mulamula, bakwiza pakubyala amampesya, nukulya ivikomwa vyache.

²² Batakwiza pakuzenga inyumba, umwakuti abanji bikalayemo, pamo ukubyala ukuti abanji balyanje. Ngati mumo ghabeleye ubwinji amasiku agha makwi, momumo ghakwiza pakubela ubwinji, amasiku agha bantu bane, abasaliwa bane bakwiza pakusekela, imbombo izya nyobe zyabo akabalilo akatali.

²³ Batakwiza pakubomba pabulo awe, pamo ukupapa abana, ukuti bakomanaye numukosi, pakuti bakwiza pakuba bantu, babo basayiwe nu Mwene, abene poka na baluko lwabo.

²⁴ Bo bachili pakunyitizya nkwiza pakubamula, bo bachili pakunena ikwiza pakubivwa.

²⁵ Abakambwe nu mwana uwa ng'ozi vikwiza pakulyanga poka, sona inkalamu yikwiza pakulya isote, ngati ng'ombe, po ulufumbi lukwiza pakuba chakulya icha njoka. Kutakwiza pakuba ukuvulazannya, pamo ukughoghana mwi ghamba lyane izelu.” U Mwene anena.