Yesaya 64 - IBAYIBOLO 2024

¹ Wee Mwene nkimba choni chicho utakuzepula bulo kumwanya, nukwika pasi, umwakuti amaghamba ghakutetema pamaso papako?

² Ngati mumo umoto ghukochela inkwi, nukughapela amizi ukuti ghasebukilaye, ika pasi ukuti itabwa lyako, limanyikwanje na balwani bako, nukuzipela inko ukuti zitetemaye pamaso papako!

³ Po ukabomba ivyakoghofya vivyo tutakavisubila, ukika pasi, sona amaghamba ghakatetema pantazi papako.

⁴ Ukwanda bulo kale, patalipo umuntu nayumo yuyo ivuyepo, pamo ukwivwisya nikutu, sona litalipo ilyiso nalimo, lilyo limwenizyepo u Chala ukwefyako amwe, yuyo akubomba mubuzilo ubwa babo bakumulindilila.

⁵ Ukubavwa abantu babo, bakubomba umwa ubugholosu umwa lusekelo, babo bakukumbuka izila zyako. Loli bo twendelela pakubabombela imbibi ukatukalalila. Po nkimba tungapokiwa bulibuli?

⁶ Twebosi twaba bulo ngati muntu umunyazu, sona imbombo izya bugholosu bwitu, zili ngati menda amanyazu amanyankanyanka, tukufoka ngati lyani, sona imbibi zyitu zikutupyela ngati mpepo.

⁷ Patalipo nayumo yuyo akwiputila mwitabwa lyako, pamo ukwiyula ukuti akakatiye kukwako, pakuti watufisa icheni chako, sona watupela pakuba, bazya abambibi zyitu.

⁸ Wee Mwene naloli we Tata witu. Twe litope, awe we mumati, twebosi twe mbombo izya nyobe yako.

⁹ Wee Mwene, utakatukalalilaye ukuchilapo, sona utakazikumbukaye, imbibi zyitu bwila na bwila. Wee, utupelele ichisa twalaba, pakuti twebosi twe bantu bako.

¹⁰ Utwaya twako utukulu nkani utuzelu, twaba nkolongo, nu Ziyoni wepe nkolongo, u Yelusalemu aba chisami.

¹¹ Inyumba izelu sona iyabuchindamu, mumo abatata bakakupalilaghamo awe, yochiwe numoto, sona vyosi vivyo tukasungamo vyananganika.

¹² Wee Mwene nkimba utakutamiwa nazyo zinizi? Nkimba ukwiza pakuba bulo myee, nukutufunda umwakuchilapo?