Yesaya 63 - IBAYIBOLO 2024

Ubupoti ubwa Mwene panko

¹ Nkimba wewenu yuyo akufumila kuchisu icha Edomu, mukaya aka Bozila, yuyo avwalite amenda amachesamu? Nkimba wewenu yuyo avwalite inkazo inyiza, sona akwenda namaka? “Nene Mwene, nkunena ubwanaloli, sona uwamaka pakupoka.”

² Nkimba choni chicho amenda ghako ghachesamite, ngati babo bakwenda muchakukanyilamo amampesya?

³ “Nakanyakanyamo nemwene umwakukanyilamo amampesya, ukwandila ku inko atalipo nayumo, yuyo akaba nane. Nkazikanyila pasi inko mubukali bwane, po bosi nkabakanyila pasi nubukalale bwane, ibanda lyabo likapaka amenda ghane.

⁴ Pakuti isiku ilya kutanizizya, likaba mumoyo wane, sona u mwaka uwabutabuli wafika.

⁵ Nkennya, loli patakabapo nayumo uwa kunyavwa, nkaswigha pakuti nayumo yuyo akanyavwa, po nkapota namaka aghane na ghane, sona ubukali bwane bukanyavwa.

⁶ Mubukalale bwane nkazikanyankila inko, mubukali bwane nkabapela ukuti bang'wele, nukukupula ibanda lyabo pasi.”

Ubwiza ubwa Chala paba Izilayeli

⁷ Nkwiza pakuchinenagha ichisa icha Mwene, nkwiza pakumupala pambombo zizyo abomba, ukuyana nazizyo atubombela, ivintu ivyinji ivyiza, ababombela aba Izilayeli, ukuyana ni chililizi chache, sona ni chisa chache ichikulu.

⁸ Akati, “Naloli aba bantu bane, abana babo batanganzimbula,” po akaba Mupoki wabo.

⁹ Mumayimba ghabo ghosi wepe bulo akayimba, po uwantumi yuyo akaba palapala akabapoka, akabapoka mulughano lwache na muchisa chache. Akabanyamula nukubasenda mumasiku aghakale.

¹⁰ Loli pope bulo bakasambuka, nukumukalalizya Umuzimu wache Umuzelu. Po akanduka nukuba mulwani wabo, nukulwa nabo ubwite.

¹¹ Po abantu bache bakaghakumbuka amasiku aghakale, amasiku agha Mozesi na bantu bache Nkimba ali kokwiyi u Mwene, yuyo akabapoka panyanja, poka na badimi aba mudimo wache? Nkimba ali ko kwiyi u Mwene, yuyo akabika Umuzimu Umuzelu wache pakasi papabo,

¹² yuyo na maka ghache agha buchindamu, ghakendagha nu Mozesi, yuyo akagaba amizi pamaso papabo, umwakuti amanyikwanje nitabwa ilya bwila na bwila,

¹³ yuyo akabendezya panyanja pachisu ichumizu, ngati mumo ifalasi yikwendela, abene munkolongo batakipunula?

¹⁴ Ngati ng'ombe zizyo zikubuka kwikombe, bakapeghiwa ubutuzyo nu Muzimu uwa Mwene. Umu momumo ukabalongozezya abantu bako, ukuti itabwa ilya buchindamu lichindikiwanje.

Ulwiputo ulwa chisa

¹⁵ Eee Mwene, ennya pasi ukufuma uko kumwanya, po wennye pachitengo icha bumwene ichizelu, sona icha buchindamu. Nkimba ulweke lwako, na maka ghako vili ko kwiyi? Fwandi ichisa ni chililizi chako vili ko kwiyi.

¹⁶ Loli awe we Tata witu, napapo u Abulahamu atakatumanya, pamo aba Izilayeli pakutwitika, Wee Mwene we Tata witu, we mutabuli witu ukwanda bulo kale lyo litabwa lyako.

¹⁷ Wee Mwene nkimba choni chicho watupela ukuti tusobelaye izila zyako? Nkimba choni chicho waghakazya amoyo ghitu ukuti tutakakwivwilaye. Nyokako pachifukwa icha babombi bako, uluko lulo mpyana yako

¹⁸ Bo pachilapo akabalilo akanandi bulo, abantu bako bakikala mubuzilo bwako ubuzelu, loli ilelo abalwani bitu, babukanyankilannya ubuzilo bwako ubuzelu.

¹⁹ Aswe twe bantu bako ukwanda kale, loli utabalaghiyepo, sona batitiziwepo nalumo ni tabwa lyako.