Yesaya 62 - IBAYIBOLO 2024

¹ Nkwiza pakunena nukubakazya aba mu Yelusalemu, ntakwiza pakuba bulo myee mupaka apokiwe, sona ubupoti bwache bukulama, ngati chikoka pabusiku.

² Inko zikwiza pakubwennya ubugholosu bwako! Abamwene babo bakwiza pakubwennya ubuchindamu bwako. Ukwiza pakwitiziwa nitabwa ipya, lilyo u Mwene akwiza pakubitizya.

³ Ukwiza pakuba we mpumpu iya buchindamu, munyobe iya Mwene. Impumpu iya kuboneka akiza nkani, munyobe iya Chala.

⁴ Utakwiza pakuneniwa sona, ukuti we “Wakulekiwa,” pamo ichisu chako, ukwitiziwa ukuti, “Chisami.” Loli ukwiza pakwitiziwa ukuti, “U Chala ahobokite nawe.” Ichisu chako chikwiza, pakwitiziwa ukuti, “Sendwa.” Pachifukwa ichakuti, u Mwene ahobokite nawe, sona ukwiza pakuba, ngati we mulume kuchisu chako.

⁵ Ngati mumo umulumendo akusendela umukolo, momumo abana bako abalumendo, bakwiza pakukusenda, ngati mumo umwenesendwa akuhobokela, numulindu yuyo amusenda, momumo u Chala wako akwiza pakuhoboka nawe.

⁶ Wee Yelusalemu nabika abalindilili pa malinga ghako, batakwiza pakuba myee pamusanya na pabusiku. Amwe mwe mukumwiputa u Mwene mutakatuzyanje,

⁷ utakamupanje ubutuzyo mupaka amwikazye sona u Yelusalemu, nukukapela pakuba kakupaliwa muchisu chosi ichapasi.

⁸ U Mwene alapa ni nyobe yache indilo, sona ni nyobe yache iyamaka ukuti, “Ntakwiza pakukupa sona ingano, pakuba chakulya icha balwani bako, abayeni batakwiza pakung'wela sona uvinyo umupya, yuyo akwiyula nkani pakubomba.

⁹ Loli babo bakwinula ingano bo babo bakwiza pakulya, nukumupala u Mwene. Sona babo bakwinula amampesya, bo babo bakwiza pakung'wela uvinyo, mulubinjilo ulwa mubuzilo bwane ubuzelu.”

¹⁰ Dumusannya, dumusannya imilyango! Yannya izila iya bantu. Yannya, yannya imisebo imikulu nkani! Efyamo amabwe! Zyimikile inko indembela.

¹¹ U Mwene azifumusya mupaka kubumalilo ubwa chisu, “Babuzye abantu aba mu Yelusalemu, ukuti u Mwene akwiza pakubapoka, poka na bantu babo abapokite.”

¹² Bakwiza pakwitiziwanga ukuti, “Abantu Abazelu aba Chala.” Abantu babo u Mwene abatabuye. U Yelusalemu akwiza pakwitiziwanga ukuti, “Akaya akakulu nkani kako u Chala akaghanite, akaya akakulu nkani kako u Chala atakalekite.”