Yesaya 61 - IBAYIBOLO 2024

Amazyu amiza agha bupoki

¹ U Muzimu uwa Mwene Uwamaka Ghosi ali papane, pachifukwa ichakuti u Mwene ampakazizye amafuta, pakulumbilila amazyu amiza kubapina. Antumite ane pakupozya abamoyo aghakuvulala, pakufumusya ubwabuke ku bazya, nukubasatula ukufuma muchisi icha mubukayidi,

² pakufumusya umwaka uwa chisa icha Mwene nisiku ilyakutanizizya ilya Chala witu, pakubasangalusya bosi babo bakulila,

³ nukubapa babo bakulila mu Ziyoni, ukubapa impumpu iya kabonekele akiza mubuzilo ubwa itoyi, amafuta aghalusekelo, mubuzilo ubwa kulila, numwenda uwa mapalo, mubuzilo ubwa muzimu uwa vitima. Bakwiza pakwitiziwa umupandapanda uwa bugholosu, ichibyalwa icha Mwene ukuti achindikiwanje.

⁴ Bakwiza pakuzenga sona utwaya tuto tukaba visami, nukubunyosezya ubuzilo bubo bukananganika, bakwiza pakuyannya sona utwaya utukulu nkani, tuto tukaba visami, tuto tukananganika munkulilo izya kale.

⁵ Abayeni bakwiza pakudima ing'ozi ni mbuzi zyinyu, sona abayeni bakwiza pakubomba mumaghunda ghinyu, na mumaghunda agha mampesya.

⁶ Mukwiza pakwitiziwa, pakuba mwe baputi aba Mwene, mukwiza pakuneniwa pakuba babombi aba Chala witu. Mukwiza pakulya ubukabi ubwa inko, sona muvyuma vyabo mukwiza pakwituvikizyamo.

⁷ Mubuzilo ubwa soni zyinyu, mukwiza pakupokela ivigaba vibili, mubuzilo ubwakusamuliwa, mukwiza pakusekela mumpyana yabo, mukwiza pakupyana ivigaba vibili muchisu chabo, sona ulusekelo ulwa bwila na bwila, lukwiza pakubanga lwinyu nu lwinyu.

⁸ U Mwene akuti, “Pakuti ane ne Mwene, imbughanite ubwanaloli, imbenganite nubwiba ni mbibi. Mubusubiliwa bwane, nkwiza pakubapa umuvwalo wabo, nukufingana nabo ulufingo ulwa bwila na bwila.

⁹ Abaluko lwabo bakwiza pakumanyikwa pakasi pa inko, sona abana babo pakasi pabantu. Bosi babo bakubennya bakwiza pakwitika, ukuti aba bo bantu babo u Mwene abasaya.”

¹⁰ Nkuhoboka nkani mwa Mwene, umuzimu wane ghukusekela mwa Chala wane. Pakuti anvwikite namenda agha bupoki, sona anvwika ubugholosu ngati nkazo, ngati we mwenesendwa, yuyo iyanizye namenda agha pasendwa, sona ngati mumo u mwenesendwa, akwiyannya nivyakwibonesekezya akiza ivya musingo.

¹¹ Pakuti ngati mumo itope likumezezya imbeyu, sona ngati mumo umughunda, ghukukuzizya imbeyu, zizyo babyalitemo, momumo u Mwene Uwamaka Ghosi, wepe akwiza pakubombela nu bugholosu, namapalo pamaso pa inko zyosi.