Yesaya 60 - IBAYIBOLO 2024

Ubuchindamu ubwa Yelusalemu ubwa muntazi

¹ Nyamuka Yelusalemu, ulamaye ngati lizuba, ubuchindamu ubwa Mwene bukukulamila awe.

² Ennya, ichisi chikwighalila ichisu ichapasi, sona ichisi ichikulu nkani chili panko, loli u Mwene akwiza pakukulamila, nu buchindamu bwache bukwiza pakubabonekela.

³ Inko zikwiza pakwiza kulokozyo lwako, na bamwene bakwiza pakwiza pakwennya, ukulama kwako ukwa pandabindabi.

⁴ Inusya amaso ghako nukwiyenelezya wemwene; Bosi bakubungana poka nukwiza kukwako, abana bako abalumendo bakwiza pakufuma kubutali, nabana bako abalindu bakwiza pakunyamuliwa munyobe.

⁵ Po ukwiza pakwennya nukusekela, umoyo wako ghukwiza pakunyelanyela nu lusekelo; ubukabi ubwa panyanja bukwiza pakwiza kukwako, sona nichuma icha inko chikwiza pakwiza kukwako.

⁶ Imidimo iya ngamila yikwiza pakunyama muchisu chako, utwana utwa ngamila izya mu Midiyani na mu Efa. Sona bosi aba ku Sheba bakwiza pakwiza, bo banyamuye, ugolide nutwakununkila, nukufumusya amapalo agha Mwene.

⁷ Ing'ozi zyosi izya mu Kedali zikwiza pakubunganiziwa kukwako, abadubi aba mu Nebayoti bakwiza pakukubombela; bakwiza pakwitikiziwa pakuba vyakwiyipa ivya pachighemo chane, sona nkwiza pakuyichindika inyumba yane.

⁸ Nkimba bo bawenu babo bakubuluka ngati mabingu, sona ngati nkunda muvivumbo vyache?

⁹ Ghanagha mabwato ghagho ghafuma kuvyisu ivyakubutali, ivya ku Talishishi ghali pantazi, nukwiza nabana bako abalumendo ukufuma kubutali, nu golide nu siliva wabo, pakumuchindika u Mwene u Chala wako, Umuzelu uwa Izilayeli, pachifukwa akupa ubuchindamu.

¹⁰ Abayeni bakwiza pakuzenga sona amalinga ghako, sona abamwene bako bakwiza pakukubombela. Napapo mubukalale nkakukoma, loli mulughano lwane nkakupelela ichisa.

¹¹ Imilyango yako yikwiza pakuba myighuke akabalilo kosi, yitakwiza pakwighaliliwa pamusanya na pabusiku, umwakuti abantu bizaye nu bukabi ubwa inko, bo abamwene babo babalongoleye umwabupoti.

¹² Pakuti uluko pamo ubumwene, bubo butakukubombela bukwiza pakuzimila, ubumwene bukwiza pakumalila zila.

¹³ Ubuchindamu ubwa Lebanoni bukwiza pakukwizila, nu payini nu aligumu poka numulombwa, vikwiza pakuyannya ubuzilo bwane ubuzelu, ubuzilo ubwakukanyapo ivinama vyane, bukwiza pakuchindikiwa.

¹⁴ Abana babo bakukukanyilila, bakwiza pakukufughamilila pantazi papako, bosi babo bakukuyivya bakwiza pakukufughamilila, sona bakwiza pakukwitizya pakuba we kaya akakulu nkani aka Mwene, u Ziyoni akaya aka Muzelu uwa Izilayeli.

¹⁵ Napapo ulekiwe nukubengiwa, sona kusita nayumo uwakwenda nawe, nkwiza pakukupela awe, pakuba we songo bwila na bwila, nu lusekelo ulwa inkulilo yosi.

¹⁶ Ukwiza pakung'wela ulukama ulwa inko, nukonka amabele agha bamwene. Po ukwiza pakuzimanya, ukuti ane, ne Mwene Umupoki wako, Umutabuli wako, Uwamaka Ghosi uwa Yakobo.

¹⁷ Mubuzilo ubwa mukuba nkwiza pakukwizila nu golide, mubuzilo ubwa chela nkwiza pakukwizila nu siliva. Mubuzilo ubwa inkwi nkwiza pakukwizila nu mukuba, sona namabwe mubuzilo ubwa chela. Nkwiza pakughupela umutende pakuba mulaghili wako, nu bugholosu pakuba mulongozi wako.

¹⁸ Ivyongo vitakwiza pakwivwikamo muchisu chako, pamo ukunangannya nukupankulannya mumpaka zyako, loli mukwiza pakughitizya amalinga ghako ukuti mupoki, imilyango yako ukwiza pakuyitizya ukuti amapalo.

¹⁹ Izuba litakwiza pakuba sona lukozyo lwako pamusanya, pamo ukulama ukwa mwezi kutakwiza pakulama papako, pakuti u Mwene akwiza pakuba lukozyo lwako ulwa bwila na bwila, sona u Chala wako akwiza pakuba buchindamu bwako.

²⁰ Izuba litakwiza pakwinjila, sona nu mwezi ghope ghutakwiza pakumala pakuti u Mwene weyuyo, akwiza pakuba lukozyo lwako ulwa bwila na bwila, sona amasiku ghako agha vitima ghakwiza pakumala.

²¹ Po abantu bako bosi bakwiza pakuba bagholosu, sona ichisu chikwiza pakuba chako bwila na bwila. Sona bakwiza pakuba kakwi kane akabisi, kako nabyala ni mbombo izya nyobe zyane, umwakuti nchindikiwanje.

²² Umunandi nkani mukasi mu mwako, akwiza pakuba waluko ulwa bantu abinji nkani, umunandi zila pabosi, akwiza pakuba waluko ulwa maka nkani. Ane ne Mwene mukabalilo akanandi bulo, nkwiza pakuchibomba.