Yesaya 6 - IBAYIBOLO 2024

U Chala akumwitizya u Yesaya pakuba Mulaghuzi

¹ Mumwaka ghugho u mwene u Uziya akafwila, nkamwennya u Mwene. Ikaye pachitengo chache icha bumwene, ichapamwanya sona ichakukweziwa nkani, inkazo yache yikizula mu Nyumba iya Chala.

² Pamwanya papache pakimilila abaselafi, babo wesi akaba ni vipapande sikisi. Wesi akivwinka ni vipapande vibili kumaso, vibili bakavwinka kunyayo, sona vibili vikaba vya kubulukila.

³ Bakitizannyanga bakatinji, “Muzelu, muzelu, muzelu! U Mwene Uwamaka Ghosi muzelu! Ichisu chosi ichapasi chizuye nubuchindamu bwache.”

⁴ Ulwalo ulwa Nyumba iya Chala lukayingana pachifukwa icha mazyu ghabo, sona Inyumba iya Chala yikizula nilyosi.

⁵ Po nkati, “Chighune kukwane! Nkufwa pachifukwa ane ne muntu uwa milomo iminyazu, sona nkwikala pakasi pabantu babo imilomo yabo minyazyu. Po namaso aghane na ghane na mwennya u Mwene, u Mwene Uwamaka Ghosi.”

⁶ Po weka uwa baselafi akambulukila, yuyo akanyamula izimwa ilyakwaka nichakupalila umoto munyobe zyache, lilyo akasenda pachighemo

⁷ Akaghupalamasya umulomo wane ni zimwa nukuti, “Ennya izimwa ili lyapalamasya imilomo yako ukunanga kwako kwamala, sona imbibi zyako zyahobokeliwa.”

⁸ Po nkivwa u Mwene akuti, “Nkimba wenu yuyo nkwiza pakumutuma? Nkimba wenu yuyo akwiza pakubuka mubuzilo bwitu?” Nkamula nkati, “Indi pano! Ntuma nene!”

⁹ Akambuzya akati bukagha ubabuzye abantu banaba ukuti, “ ‘Ukwivwa mukwiza pakwivwa loli mutakwiza pakwivwisyanga, ukwennya mukwiza pakwennyanga loli mutakwiza pakumanya nachimochimo.’ ”

¹⁰ Po akambuzya akati, “Ughapelaye amoyo agha bantu banaba ukuti ghabanje makafu, amakutu ghabo ghabanje namapuli, ubapelaye ukuti babanje bafwamaso, ukuti lumo bangennya na maso ghabo pamo ukwivwa na makutu ghabo, sona nukuvwisya na moyo ghabo, ukuti bapinduke nukupola.”

¹¹ Nkalalusya nkati, “Wee Mwene, nkimba zinizi zikwiza pakubangako mupaka liyi?” Akamula akati, “Mupaka utwaya tosi utukulu twaba visami sona nayumoyumo umuntu akwiza pakwikalamo, inyumba zitakwiza pakuba na bantu sona chope ichisu chikwiza pakuba nkolongo.

¹² Nkwiza pakubasamizizya abantu banaba kubutali, mupaka ichisu chosi chibanje chisami.

¹³ Napapo ichigaba icha bantu 10 chingalekiwa muchisu, pope bulo chikwiza pakuba chisami. Ngati mumo ibanga nu mupandapanda ghakuleka ichisinko bo ghadumuliwa. Ichisinko chila yo mbeyu izelu muchisu.”