Yesaya 59 - IBAYIBOLO 2024

Umulaghuzi akubalonga abantu pa mbibi zyabo

¹ Naloli inyobe iya Mwene yite mpimpa pakupoka, pamo ukuti ikutu lyache lili namapuli pakwivwa.

² Loli imbibi zyinyu zyo zibapaghuye amwe kwa Chala winyu, imbibi zyinyu zifisite icheni chache kukwinyu, umwakuti atakubivwa.

³ Inyobe zyinyu zili bulo chee ni banda, utufingwi twinyu tope twizuye ni mbibi. Imilomo ghinyu yikunena ubumyasi, zyope indimi zyinyu zikunena ivintu ivibibi.

⁴ Mukubuka pabuzilo ubwakulongelapo inongwa, loli mutakubwaghapo ubwanaloli. Musubiye ubumyasi, bakumela intamyo nukupapa ububibi.

⁵ Bakubatila amafumbi agha chipili, nukuluka kwa bubi. Umuntu wesi yuyo akulya amafumbi ghabo akwiza pakufwa, nanti lyoka lyapomozoliwa injoka yikubaluliwa.

⁶ Ukuluka kwabo ukwa bubi kute ni mbombo ngati chakuvwala, batangavwinka vivyo bakuluka. Imbombo zyabo mbibi, inyobe zyabo zikunyamusya bulo ivyongo.

⁷ Inyayo zyabo zikuchimbilila pakubomba imbibi, zyengo pakukupula ibanda lilyo lite ninongwa. Inyinong'ono zyabo mbibi, kosi kuko bakwenda, bakunangannya nukuleka ivisami.

⁸ Izila iya mutende batayimenye, mute ubwanaloli muzila zyabo. Izila zyabo bazipela pakuba nyonganu, wesi yuyo akwendamo atakwiza pakughumanya umutende.

Abantu bakwilata imbibi zyabo

⁹ Ubwanaloli bulikubutali naswe, sona ubugholosu butakutwagha. Tukulonda ulukozyo, loli tukuchagha ichisi chene, sona tukulonda ukulama, loli tukwenda muchisi nkani.

¹⁰ Tukapapasyapapasya kulubumba, ngati muntu umufwamaso, akuyipapasya izila yitu, ngati bantu abafwamaso. Tukwipunula pakasi pamusanya, ngati po pachamabwila, pakasi pabantu abamaka, tuli ngati bantu abafwe.

¹¹ Twebosi tukulila ngati bo balabwe, sona tukulila ngati nkunda. Tukulonda ubwanaloli, loli tutakubwagha nabumobumo, tukubulonda ubupoki, loli buli kubutali nkani.

¹² Pakuti ububibi bwitu bwinji nkani pamaso ghako sona imbibi zyitu zikutusimikizizya aswe. Ububibi bwitu buchili buli naswe akabalilo kosi, sona tubumenye ububibi bwitu,

¹³ tukusambukiye nukukukana we Mwene, nukukupa inkoto awe we Chala witu, twabayivya abantu abinji, nukwepako kukwako, pakunena ubumyasi bubo buli mumoyo ghitu.

¹⁴ Ubwanaloli bwanyokela kwisinda, sona ubugholosu bwimiliye pabutalipo, ubusubiliwa bukwipunula pabuzilo ubwakulongelapo inongwa, ubwanaloli butakuboneka pabulongi.

¹⁵ Ubusubiliwa butakwaghiwa nakumokumo, sona wesi yuyo akuyichimbila imbibi akuba muntamyo. U Mwene akenelezya sona chitakamuhobosya, pakuti pate ubugholosu.

U Mwene akwiza pakubapoka abantu bache

¹⁶ Akennya ukuti patakabapo nayumoyumo, sona akaswigha ukuti patakabapo uwakubavwa abakuyiviwa, ni nyobe iyache ni yache akabapoka, sona ubugholosu ubwache nu bwache bukumusungilila.

¹⁷ Akavwala ubugholosu pakuba chakwipokela icha chela icha pachifuba, ni chisote icha bupoki kumutu wache, akavwala ukutanizya ngati menda, nukwinnyembetelela ulweke ngati nkazo.

¹⁸ U Mwene akwiza pakubatanizya, ukuyana na zizyo abantu babomba, sona akwiza pakubatanizya abalwani bache, ni vyisu ivya kubutali nivya papipi.

¹⁹ Ukwanda kubwinjililo bwizuba, abantu bakwiza pakulinyila itabwa ilya Mwene, sona kubufumilo bwizuba, bakwiza pakubuchindika ubuchindamu bwache. Pakuti u Mwene akwiza ngati lusoko lulo lwizuye, lulo umuyi uwa Mwene ghukuluchimbizya.

²⁰ “Po akwiza mu Ziyoni ngati mutabuli, babo bali mwa Yakobo bo babo bapindukite kumbibi zyabo.” U Mwene anena.

²¹ U Mwene akuti, “Kukwane, ulu lo lufingo lwane lulo nkufingana nabo. Umuzimu wane, ghugho ghuli papako, sona na mazyu ghane ghagho nabika mumulomo wako ghatakwiza pakwepamo mumilomo yinyu, pamo mu mamolomo agha bana binyu, pamo mumalomo agha baluko lwinyu ukwanda pakabalilo aka mupaka bwila na bwila.”