Yesaya 58 - IBAYIBOLO 2024

Ukutuzya pakulya ukwa naloli

¹ U Mwene akuti, “Kolomoka nkani, utakalekaye, kwezya izyu lyako ngati lipati. Babuzye abantu bane nizya kusambuka kwabo, sona ni mbibi izya bamunyumba iya Yakobo.

² Pakuti bakundonda isiku ni siku, bakulonda nkani ukuzimanya izila zyane, ngati luko lulo lukubomba ingolosu, sona lutaghalekite amalamulo agha Chala. Bakundaba ukuti idumule inongwa zyabo mubwanaloli, nukuhoboka pakwikala papipi nu Chala wabo.

³ Abantu bakulalusya bakuti, ‘Nkimba choni chicho twatuzya pakulya, bo awe ute navyo nimbombo? Nkimba choni chicho twiyisya twebene, ukusita ukuti uzimanye?’ “Loli pisiku lyinyu ilyakutuzya, mukubomba umwakwihobosya mwebene, nukubanangannya abambombo binyu.

⁴ Ukutuzya pakulya kwinyu kukumala, nukudalinkana sona ni bwite, mukulwa weka na weka nukukomana ninkumi, ukutuzya uku kukuyana bulo, nakuko muli nako ilelo, nukusubila ukuti izyu lyivwike pamwanya.

⁵ Nkimba ukutuzya pakulya kuko nasala ane kungaba kokunuku, isiku lilyo umuntu akulanjizya ukwiyisya kwache? Nkimba ko kukotamika umutu ngati lutete nukughona pamasaka namwitoyi? Nkimba kunuku mukutinji ukutuzya pakulya isiku lilyo litikiziwe nu Mwene?

⁶ “Ukutuzya pakulya kuko nkulonda ko uku, Ukubasatula babo bapinyiwe nukwefya ivyakupinyila ikoli, nukubasatula babo bakuyiviwa, nukupyola ikoli lyosi.

⁷ Nkimba te kugabana ichakulya nababo bali nizala, nukubasendela kunyumba yako babo bakwendenda bulo, nukubavwika babo bate namenda, nukubavwa abakamu bako?

⁸ Po ulukozyo lwako lukwiza pakulama ngati kokubuche, nukupoziwa kwako kukwiza pakuboneka lubilolubilo, ubugholosu bwako bukwiza pakukulongolela, sona ubuchindamu ubwa Mwene, bukwiza pakumulindilila uwa kwisinda kukwako.

⁹ Po ukwiza pakwitizya, sona u Mwene akwiza pakwamula, nanti ukulila, akwiza pakwamula ukuti, ‘Ane indipano.’ “Nanti mukuleka pakubakanyilila abantu ni koli, nukuleka ukusontana ninyobe nukunenana ububibi,

¹⁰ nanti mukubapa ivyakulya babo bali nizala, nukubavwa babo bakuyiviwa, po ulukozyo lukwiza pakulamila muchisi, sona ubusiku bwinyu bukwiza pakuba ngati musanya.

¹¹ U Mwene akwiza pakukulongozya akabalilo kosi, nukubapa ivintu ivyiza, nukubapa amaka mumabili ghinyu. Mukwiza pakuba ngati mughunda, ghugho ghusembeliwe akiza, ngati chiziba chicho amizi ghatakumalamo.

¹² Abantu bako bakwiza pakuzenga sona inyumba zizyo zikalekiwa pakuba visami, nukuzenga palwalo ulwa kale, mukwiza pakwitiziwa ukuti abayannya ivibumba ivyakuwa, abayannya inyumba izya kupankuka.

Umuvwalo pachifukwa ichakusunga Isiku Ilyakutuzya

¹³ “Nanti mukulisunga Isiku lyane Ilyakutuzya, nukusita ukubomba imbombo zyinyu pisiku lyane izelu, nanti mukwitizya Isiku lyane Ilyakutuzya lisiku ilya lusekelo, nukumuchindika u Mwene pisiku izelu, sona nanti mukulichindika ukusita ukwenda muzila zyinyu, nukusita ukubomba izyakwihobosya mwebene, pamo pakunena amazyu aghabulo,

¹⁴ po mukwiza pakulwagha ulusekelo mwa Mwene, sona nkwiza pakubakwezya pabuzilo ubwapamwanya, nukubalyesekezya pachilingo icha munyenya winyu u Yakobo.” U Mwene anena.