Yesaya 56 - IBAYIBOLO 2024

Inko zyosi zyaba chigaba icha Chala

¹ U Mwene akuti, “Mubombaye ubwanaloli sona nu bungolosu, pakuti ubupoki bwane buli papipi, sona ubugholosu bwane, bukwiza pakuvumbuliwa umwalubilolubilo.

² Musayiwa umuntu yuyo akubomba zinizi, umuntu yuyo ali nulweke pakuzibomba, yuyo akulisunga Isiku Ilyakutuzya, sona atakulinangannya, nukwikanizya pakubomba ububibi.”

³ Umuyeni yuyo imamatizya kwa Mwene atakanenaye ukuti, “U Mwene akwiza pakunyefyako ku bantu bache.” Sona umuntu umupase atakilumbusyanje ukuti, “Ane ne likwi ilyumizu.”

⁴ Pakuti izi zyo zizyo u Mwene akunena, “Ku bantu abapase babo bakulisunga Isiku Ilyakutuzya, nukusala vivyo vikunhobosya sona nukulemezya ulufingo lwane

⁵ nkwiza pakubapa itabwa ni mbili inyiza, pakasi pabana abalumendo na balindu, munyumba yane nivibumba vyache. Nkwiza pakubapa itabwa ilya bwila na bwila, lilyo litakwiza pakudumuliwa nalumolumo.

⁶ Po abayeni babo bakwimamatizya bene kwa Mwene pakumubombela, pakulighana itabwa ilya Mwene nukumuchindika, bosi babo bakulisunga Isiku Ilyakutuzya, sona batakulinyazya, nukulusunga akiza ulufingo lwane,

⁷ nkwiza pakwiza nabo pighamba lyane izelu, nukubapa ulusekelo munyumba yane iya kwiputilamo. Ivyakwiyipa vyabo ivyakocha sona ni vyakwiyipa, vikwiza pakupokeliwa pachighemo chane, pakuti inyumba yane yikwiza pakwitiziwa ukuti nyumba iya kwiputilamo inko zyosi.”

⁸ U Mwene Uwamaka Ghosi yuyo akubabungannya abazya aba mu Izilayeli akuti, “Nkwiza pakubabungannya abantu abanji pakonjelezyapo pa babo ababunganizye kale.”

Abalongozi aba Izilayeli bakuchemeliwa

⁹ U Mwene azibuzya inko injeni ukuti, “Mwee vinyamana ivyamunkolongo, sona ni vya mumusitu zagha mwebosi mulye

¹⁰ Abalindilili aba Izilayeli bafwamaso, bosi bate namahala, bosi bali ngati mbwa izya chinunu, zizyo zitakubwata, zikulambalala nukulota, zyighanite pakughona utulo.

¹¹ Bali ngati zyo mbwa zizyo zili nizala, zizyo zitakwikuta nalumo. Bo badimi babo batakwivwisya, bosi bapulumpa izila zyabo, umuntu wesi ali pakulonda ichakukabilapo.

¹² Abaching'wela banaba bakuti, ‘Zagha, tung'wele uvinyo! Zagha tukolwe ubwalwa! Indabi yikwiza pakuba ngati ilya ilelo, lumo likwiza pakuchilapo panapa.’ ”