Yesaya 55 - IBAYIBOLO 2024

U Mwene akutupa ichisa

¹ U Mwene akuti, “Zagha, mwebosi mwe muli ninyota, mwize ku mizi; sona na mwe mute ni ndalama, zagha, mughule nukulya! Zagha, mung'wele pabulo uvinyo nu lukama.

² Nkimba choni chicho mukutagha indalama, pavivyo te vyakulya, sona nukubombela pachicho chitakwikutizya? Nteghelezya akiza, sona mulyanje chicho chiza, mwilaghaye pakulya ivyakulya ivyizya.

³ Munteghelezye nkani nukwiza kukwane, munyivwe, ukuti mubanje nubumi. Nkwiza pakufingana namwe, ulufingo ulwa bwila na bwila, nukubapa ulusayo lulo nkamulayizya u Devedi.

⁴ Ennya, namupela pakuba we kaboni uwa bantu, ukuti abanje mulongozi, nusongo uwa basilikali aba inko.

⁵ Naloli ukwiza pakuzyitizya inko zizyo utazimenye, sona inko zizyo zitakakumanya, zikwiza pakuchimbilila kukwako, pachifukwa icha Mwene u Chala winyu, Umuzelu uwa Izilayeli, pakuti weyuyo abapa ubuchindamu.”

⁶ Mulondelezye u Mwene pakabalilo kako angaghiwa, mumwitizye bo ali papipi.

⁷ Mubaleke ababomba mbibi, baleke inkalo zyabo imbibi, sona bope abantu ababibi bazileke inyinong'ono zyabo inyonganu. Baleke banyokele kwa Mwene, ukuti abapelele ichisa, sona nakwa Chala witu, pakuti akwiza pakubahobokela.

⁸ U Mwene akuti, “Inyinong'ono zyane zitayanite ni zyinyu, sona zyope izila zyane, zitayanite ni zyinyu.

⁹ Ngati mumo kumwanya kubeleye kutali, ukuchila ichisu ichapasi, momumo izila zyane zibeleye, zyapamwanya ukuzichila izyinyu, sona inyinong'ono zyane zikuzichila inyinong'ono zyinyu.

¹⁰ Ngati mumo ivula nukabefu, vikuwila pasi ukufuma kumwanya, sona vitakunyokelako, bo vitasembeleye ichisu, po akumezya imbeyu nukuzikuzya umwakuti chimupanje umulimi inyinulo ni chakulya ichinji.

¹¹ Momumo amazyu ghane ghagho nkunena ghakwiza pakubela. Ghatakwiza pakunyokela kukwane pabulo, loli ghakwiza pakukwanilisya zizyo nkulonda, nukukwanilisya zizyo nkaghatumila.

¹² Pakuti mukwiza pakwepamo nu lusekelo, bakwiza pakubefyamo umwamutende bulo, amaghamba nu tumaghamba, vikwiza pakwimba pamaso papinyu, sona amakwi ghosi agha mumusito, ghakwiza pakubakomela inkufi zyabo.

¹³ Mubuzilo ubwa mivwa mukwiza pakumela amakwi agha payini, mubuzilo ubwa ntumbusya mukwiza pakumela amakwi aghamazwanga. Ichi chikwiza pakuba chimanyilo icha Mwene, icha bwila na bwila, chicho chitakwiza pakunanganika.”