Yesaya 54 - IBAYIBOLO 2024

Ulughano ulwa Mwene paba Izilayeli

¹ U Mwene akuti, “We mukolo umughumba imbagha, we utapapitepo nalumo umwana, kolomokagha pakwimba sona usekelaye, we utivuyepo nalumo ububavu pakusayiwa, pachifukwa ichakuti abana abinji abamukolo yuyo akwikala mwene na mwene, ukuchila umukolo yuyo ali nu mulume wache.

² Onjelezya ubuzilo ubwa chisakasa, ghakuzule amenda aghakuzighila, zikuzule impote zyako sona utukwi twache, tubanje twa maka.

³ Pakuti ukwiza pakuvikuzulila kundilo na kumongo, abaluko lwako bakwiza pakufyula ichisu icha inko izinji, nukwikala mutwaya twabo utukulu nkani tuto tukalekiwa.

⁴ “Utakanyilaye, utakwiza pakukoziwa isoni. Utakanyilaye pakusamuliwa utakwiza pakwisiwa. Ukwiza pakuluvya isoni zyako izya pabulumendo bwako, sona utakwiza pakukumbuka intamyo izya bufwilwe bwako.

⁵ Pakuti umupeli wako we mulume wako, u Mwene Uwamaka Ghosi lyo litabwa lyache, Umuzelu uwa Izilayeli we mutabuli wako, akwitiziwa ukuti we Chala uwa chisu chosi ichapasi.

⁶ U Mwene akwiza pakukwitizya sona po ngati ukaba muchi wache, yuyo achimbiziwe nukuyimba mumuzimu, ngati muchi umulindu yuyo akamukana.” Momumo akunenela u Chala wako.

⁷ “Mukabalilo akapimpa bulo nkakuleka, loli ni chililizi ichikulu nkani nkwiza pakukusenda sona.

⁸ Mubukali nkani, nkakufisa icheni chane mukabalilo akapimpa bulo, loli ni chisa icha bwila na bwila nkwiza pakuba ni chililizi nawe,” Momumo akunenela u Mwene Umutabuli wako.

⁹ “Pakuti chinichi kukwane chili ngati masiku agha Nowa, bo nalapa ichilapo ichakuti amizi gha pa Nowa, ghatakwiza pakwizula sona pachisu ichapasi. Po ilelo nalapa ukuti ntakwiza pakubakalalila sona, nukukuchemela.

¹⁰ Napapo amaghamba ghanganeng'ena, sona nutumaghamba tungefeziwapo loli ulughano lwane papako, lulo lutakupotwapo nalumo lutakwiza pakuneng'ena, pamo ulufingo lwane ulwa mutende lutangefiwapo.” Momumo akunenela u Mwene, yuyo ali ni chililizi nawe.

U Yelusalemu umupya

¹¹ U Mwene akuti, “Wee Yelusalemu we kaya akakulu nkani akakuyimba, kako kate nu wakukasangalusya, nkwiza pakukuzenga na mabwe amiza pakuluzenga ulwalo lwache, na mabwe agha safile.

¹² Nkwiza pakuzenga ichitembe, na mabwe aghamutengo, imilyango yako yikwiza pakuzengiwa, na mabwe aghakunyezimila, sona lope ulubumba lukwiza pakuzengiwa, na mabwe aghamutengo nkani.

¹³ Abana bako bosi bakwiza pakumanyisiwa nu Mwene, sona bakwiza pakwikala mumutende.

¹⁴ Mukwiza pakwikalana mubugholosu, abantu babo bakakuyivyanga, bakwiza pakuba kubutali nawe, sona mutakwiza pakunyilagha nachimochimo, Po chitakwiza pakukupalamila.

¹⁵ Nanti weka akulwana nawe, bo tenene nazibomba, wesi yuyo akulwana namwe ukwiza pakumupota.

¹⁶ “Ennya, nene nkabapela abakusyana, babo bakupemba umoto uwa mazimwa, nukuyanizizya ivilwilo. Sona nene nkamupela umughoghi, ukuti akunangannye.

¹⁷ Chitakwiza pakubapo ichilwilo ichakubavulazya, ukwiza pakubapota bosi babo bakususannya nawe. Chinichi mpyana iya babombi aba Mwene, sona nkwiza pakubapa ubupoti.” Momumo u Mwene akunenela.