Yesaya 53 - IBAYIBOLO 2024

¹ Nkimba wewenu yuyo azisubila zizyo twazyivwa, sona wewenu yuyo u Mwene amuvumbulila amaka ghache?

² Pakuti akakula pamaso pa Mwene ngati kakwi akabisi, sona ngati likwi iteta, ngati ligululuzi muchisu ichumizu. Atakaba wakuboneka akiza, pamo ichintu chimo ichakumuhobosya akiza ukuti tumwenelezyanje, atakaba wakuboneka akiza, umwakuti tumunyonywanje.

³ Akasamuliwa nukukaniwa na bantu, umuntu uwa chitima, sona nu wakwizubizannya na mayimba. Akaba ngati yuyo muntu bamuvwinka kumaso, akasamuliwa sona tutakamuchindika.

⁴ Naloli akanyamula amayimba ghitu, sona nu bubavu bubo ngali bukaba papitu ni chitima chitu, Tukinong'onagha ukuti we Chala akumufunda, sona nukuti akukomiwa nukuyiviwa nu Chala.

⁵ Akalasiwa pachifukwa icha mbibi zyitu, akavulaziwa pachifukwa icha bubibi bwitu. Ulufundo lulo lukiza nu mutende papitu lukaba papache, sona ivilonda vyache vyatupozya.

⁶ Aswe twebosi twasobela ngati ng'ozi, umuntu wesi akwenda muzila iyache ni yache. Loli u Mwene abubika ububibi ubwa twebosi papache.

⁷ Akakanyililiwa nukuyimba loli akasona bulo umulomo wache. Akaba ngati mwana uwa ng'ozi yuyo bakubuka nawe pakumubola, sona ngati ng'ozi yiyo yili bulo myee, bo bakuyidumulila ameya, po atakighula umulomo wache.

⁸ Ukusamuliwa kwache kutakamuvighilila nukumulongela. Nkimba wewenu yuyo akinong'onelako na chicho akayimbilagha? Pakuti akefiwamo muchisu icha bumi. Akakomiwa pachifukwa icha bubibi ubwa bantu bane.

⁹ Mubufwe bwache bakamuyanizizya ipumpa poka na babibi, sona na bantu abakabi, napo atakandizyapo ivyongo, pamo pakunena ubumyasi bumo.

¹⁰ Loli bukaba bwighane ubwa Mwene ukuti amuvulazye bunubu nukumupelela amayimba, u Mwene akabupela ubumi bwache, pakuba chakwiyipa ichakupepesezya inongwa, akwiza pakwennya abizikulu bache, nukuba nubumi ubutali, sona ubwighane ubwa Mwene bukwiza pakukwanilisiwa mumwache.

¹¹ Bo ghachilapo amayimba ghache, akwiza pakwennya ulukozyo ulwa bumi nukwikutiziwa. Mubumanyi bwache umubombi wane umugholosu akwiza pakubanena abantu abinji ukuti bagholosu, po akwiza pakuzinyamula imbibi zyabo.

¹² Po nkwiza pakumupa ichigaba pakasi pabantu abapamwanya po akwiza pakugabana ivyakufyula na bantu abamaka, pakuti akatagha ubumi bwache nukubelengiwa poka na babomba imbibi. Akanyamula imbibi izya bantu abinji, sona akabiputila ababomba mbibi.