Yesaya 52 - IBAYIBOLO 2024

U Chala akwiza pakumupoka u Yelusalemu

¹ Wee Ziyoni, vundumuka, vundumuka! Banga na maka. Vwala amenda ghako amiza nkani, wee Yelusalemu, akaya akakulu nkani akazelu. Abantu babo batasilimuliwe, sona na bantu abanyazu batakwiza pakwinjila sona pamulyango wako.

² Kung'unta ulufumbi, vundumuka ikala pachitengo icha bumwene, wee Yelusalemu. Isatula iminyololo iya musingo yako, wee muzya uwa mukaya aka Ziyoni.

³ Pakuti u Mwene akuti, “Mukaghuliziwa pabulo, sona mukwiza pakutabuliwa pabulo.”

⁴ U Mwene Uwamaka Ghosi akuti, “Pakwanda abantu bane bakabuka pakwikala mu Ijiputi. Pisinda pache aba Asiliya bakabayivya nkani.”

⁵ Po u Mwene akuti, “Nkimba ilelo nasendapo ichoni? Pakuti abantu bane basendiwa pabulo pakubuka kubutali nkani, sona abantu babo bakubalaghila bakubobezya. Akabalilo kosi itabwa lyane likusamuliwa.

⁶ Polelo abantu bane bakwiza pakulimanya itabwa lyane, Pisiku linilyo bakwiza pakumanya ukuti, naloliloli nene nkunena.”

⁷ Bo bwiza boni pamaghamba, inyayo izya muntu yuyo akwiza na mazyu amiza, yuyo akulumbilila nizya mutende, sona akwiza na mazyu amiza agha vintu ivyiza, akulumbilila nizya ubupoki, nukunena kuba mu Ziyoni ukuti, “U Chala winyu akulaghila!”

⁸ Teghelezya! Abalindilili binyu bakukolomoka, bakwimba poka nulusekelo. Bo u Mwene akunyokela ku Ziyoni, bakwiza pakwiyenezya na maso ghabo.

⁹ Mwimbaye poka inyimbo izya lusekelo, amwe mwe visami ivya mu Yelusalemu, pakuti u Mwene abasangalusya abantu bache, amutabula u Yelusalemu.

¹⁰ U Mwene akwiza pakulanjizya amaka ghache amazelu, pantazi pa inko zyosi, sona ubumalilo bosi ubwa chisu bukwiza pakubwennya ubupoki ubwa Chala witu.

¹¹ Epamo, epamo, fumamo muchisu icha Babiloni, mutakapalamasyanje nachimo ichintu chicho chinyazu! Fumamo mwiswefye mwebene, amwe mwe mukunyamula ivibombelo ivya mu Nyumba iya Chala.

¹² Loli mutakwiza pakwepamo lubilolubilo, pamo mutakwiza pakwepamo umwakuchimbila, pakuti u Mwene akwiza pakubalongolela, u Chala uwa Izilayeli akwiza pakuba mulindilili winyu.

Amayimba agha mubombi uwa Mwene

¹³ Ennya umubombi wane akwiza pakubomba akiza, akwiza pakukweziwa nukuchindikiwa.

¹⁴ Abinji bakwiza pakuswigha bo bakumwennya, po akabonekele kache kakananganika nkani, po atakabonekagha ngati muntu.

¹⁵ Loli inko inyinji zikwiza pakumuswigha, abamwene bakwiza pakusona amalomo ghabo pachifukwa icha yuyo. Pakuti chicho batakabuziwa nalumolumo bakwiza pakuchennya, sona chicho batachivuye bakwiza pakuchivwisya.