Yesaya 50 - IBAYIBOLO 2024

¹ U Mwene akuti, “Nkimba ukwinong'ona ukuti nkababwezya abantu bane, ngati mumo umuntu akumusosezya umuchi wache? Po nkimba bali ko kwiyi abakalata abasoka? Nkimba ukwinong'ona ukuti nkakughulizya mubukayidi, ngati muntu yuyo akubaghulizya abana bache ngati bazya? Awe, mukabuka mubukayidi pachifukwa icha mbibi zyinyu. Mukachimbiziwa pachifukwa icha kunanga kwinyu.

² Nkimba choni chicho bo niza, patakabapo umuntu nayumoyumo? Nkimba choni chicho bo nitizya, patakaba nayumo umuntu uwa kwamula? Nkimba inyobe yane yikaba mpimpa pakubapoka? Nkimba inte na maka aghakubapokela? Ennya, nanti nayichemela inyanja yikukamuka, nkuzyandula isoko pakuba nkolongo, iswi zyabo zikubola, pachifukwa ichakuti zitakuba na mizi, po zikufwa ni nyota.

³ Nkuvwika kumwanya ni chisi, nukughapela amasaka pakuba chakuvwala pachifukwa icha chitima.”

Ukwivwila ukwa mubombi uwa Mwene

⁴ U Mwene Uwamaka Ghosi amanyisya izya kunena, umwakuti imbasangalusye babo balitite. Indabi yili yosi akunyamusya, akwighula amakutu ghane, ukuti nivwanje zizyo akulonda pakumanyisya.

⁵ U Mwene Uwamaka Ghosi anyighula amakutu, sona intamusambukiye, pamo ukwepako kukwache.

⁶ Nkabapa inyuma yane babo bakankomagha, sona na masaya ghane, ku babo bakunyunkula indevu zyane, intakafisa icheni ku bantu, babo bakansamulagha nukunfwinila amati.

⁷ Chifukwa chakuti u Mwene Uwamaka Ghosi akunyavwa, ntakwiza pakukoziwa isoni. Polelo nakazya umoyo wane ngati libwe, sona inzimenye ukuti ntakwiza pakusamuliwa.

⁸ Pakuti yuyo akumpa ubugholosu ali papipi nane. Po nkimba wewenu yuyo angasusannya nane? Nkimba wewenu yuyo akususannya nane? Zagha pano twenannye?

⁹ We Mwene Uwamaka Ghosi yuyo akunyavwa, nkimba wewenu yuyo akwiza pakundonga? Bosi bakwiza pakumala ngati menda, impezu zikwiza pakudobolannya.

¹⁰ Nkimba wewenu pakasi papinyu akumunyila u Mwene nukughivwila amazyu agha mubombi wache? Muleka yuyo akwenda muchisi, yuyo ate nulukozyo, akusubila itabwa ilya Mwene, sona amusubiye u Chala wache.

¹¹ Loli mwebosi mwe mukupemba umoto, mwe mukukozya umoto uwa mazimwa, bukagha, mwendaye mulukozyo, ulwa moto winyu uwa mazimwa ghugho mwapemba! Chicho mukwiza pakupokela ukufuma munyobe zyane chakuti, mukwiza pakulambalala pasi mu mayimba.