Yesaya 5 - IBAYIBOLO 2024

Ulwimbo ulwa mughunda uwa mampesya

¹ Teghelezya bo nkukwimbila ulwimbo ulu, ulwimbo ulwa mumanyani wane nu mughunda wache uwa mampesya, Umumanyani wane akaba nu mughunda uwa mampesya, ghugho ghukaba pighamba lilyo likaba ni tope ilya muvundo.

² Akaghudibula nukufumyamo amabwe, akabyalamo amampesya amiza nkani. Akaghuzengela ichitembe nukukumba ichiliba ichakukanyilamo amampesya. Akalindilila pakuyaba amampesya amiza, loli amampesya ghala ghakababagha.

³ Po ilelo umumanyani wane akuti, “Mwe bantu mwe mukwikala mu Yelusalemu na muchisu icha Yuda, mulonge pakasi pa ane nu mughunda wane uwa mampesya.

⁴ Nkimba chilipo chicho nkapotwa pakubombapo pamughunda? Po nkimba choni chicho ghukwela amampesya amababe, bo nkulindilila amampesya amiza ghagho intakasubalilagha?

⁵ Nkwiza pakubabuzya zizyo nkwiza pakubomba, nu mughunda wane uwa mampesya. Nkwiza pakwefyako ulubagha lulo lughuzyunguliye, nukulumongolannya ulubumba lulo lughuzighiliye, po ghukwiza pakukanyankiliwa

⁶ Nkwiza pakughuleka ukuti ghubanje nkolongo. Ntakwiza pakughupalanta pamo ukulimamo, sona mukwiza pakumela abantolovu na mivwa. Nkwiza pakughalamula amabingu ukuti ghatakatimizyanje ivula.”

⁷ Umughunda uwa mampesya uwa Mwene Uwamaka Ghosi we Izilayeli, abantu aba mu Yuda vyo vibyalwa vyane vivyo nkuhoboka navyo. Akasubilagha ukuti babombaye ubwanaloli, loli akennyanga ibanda, akasubilagha ubugholosu, loli akivwanga ukulila ukwakuyiviwa kwene.

Imbibi zizyo abantu bakubomba

⁸ Chighune ku amwe mwe mukonjelezyakonjelezya inyumba, sona mukonjelezyakonjelezya amaghunda, mupaka patakasyalepo ubuzilo nabumo, sona mukwikala mwebene muchisu.

⁹ U Mwene Uwamaka Ghosi alamula bo nane nkwivwa ukuti, “Naloli inyumba inkulu nkani zikwiza pakuba visami, inyumba inkulu inyiza nkani zitakwiza pakuba na bantu.

¹⁰ Po amaghunda teni agha mampesya ghagho mubyete, mukwiza pakwizuzyamo indobo yoka, pa vidudunga teni ivya mbeyu vikwiza pakwela, ichidudunga choka icha mbeyu.”

¹¹ Chighune kubabo bakunyamuka pandabindabi nkani, bakuchimbilila kuchakung'wela, babo bakulinda kulakula mupaka pabusiku ukuti bakolwe nuvinyo.

¹² Palusekelo lwabo bakulizya ivinanda na mapango, ivisekeseke na malongi sona bakung'wela uvinyo, loli batakuzibelengela imbombo izya Mwene, batakuzichindika imbombo izya nyobe zyache.

¹³ Polelo abantu bane bakubuka kuchisu icha buzya pakuti bakusobelwa ubumanyi, abantu babo abapamwanya bakufwa nizala, sona abantu abinji bakufwa ninyota.

¹⁴ Po ipumpa likwiza pakwighula imilo lyache, sona nukwasama nkani umulomo wache, likupokela abantu abapamwanya na bapasi, Abantu babo bakuzuma ichongo nababo bakusekela bakwiza pakuwilamo.

¹⁵ Umuntu akwisiwa pasi, sona akusamuliwa, abantu abakwikwezya bakwiza pakwisiwa.

¹⁶ Loli u Mwene Uwamaka Ghosi akwiza pakukweziwa nubwanaloli bwache, po u Chala umuzelu akwiza pakwilanjizya mwene, pakuba muzelu mubugholosu bwache.

¹⁷ Po ing'ozi zikwiza pakulya ngati po zili pisote iteta, tope utwana utwa ng'ozi tukwiza pakulya muvisami ivya bantu abakabi.

¹⁸ Chighune kubabo bakuwesa imbibi nu lukusa ulwa bumyasi, bakuwesa ububibi ngati lukusa ulwa ngolo,

¹⁹ babo bakuti, “Leka u Chala endelezye, abombe lubilolubilo imbombo yache ukuti tuyennye. Leka umuzelu uwa Izilayeli abombe zizyo abatikite ukuti tuzimanye.”

²⁰ Chighune ku babo bakuti ububibi bo bwiza, sona ubwiza bakuti bubibi, babo bakubika ichisi pakuba buzelu sona ubuzelu pakuba chisi, ivibabe bakuti vyo vinoni sona ivinoni vyo bakuti vibabe.

²¹ Chighune kubabo bakwipima bene ukuti bamahala sona bakwinena bene ukuti bachevu.

²² Chighune ku bantu babo bajinvu pakung'wela uvinyo sona bo bafundi pakongannya ivyakung'wela ivikali,

²³ babo bakumulongela akiza inongwa umuntu umubibi pachifukwa icha mabeko, loli bakukana ubugholosu ubwa muntu yuyo ate ninongwa.

²⁴ Polelo, ngati mumo akampesese aka moto kakochela amapembezannya sona ngati mumo isote ilyimizu likupyela mumoto, po amagululuzi ghache ghakwiza pakubola, sona ubwezya bwache bukwiza pakubuluka ngati lufumbi, pakuti bakana ululaghilo ulwa Mwene Uwamaka Ghosi, nukukana izyu ilya Muzelu uwa Izilayeli.

²⁵ Polelo ubukali ubwa Mwene bukwaka pabantu bache, inyobe yache yili mumwanya sona akubakoma. Amaghamba ghakayingana, sona imivimba yisatite bulo mumusebo ngati mantu. Pa zyosi zinizi, ubukali bwache butakutozoka, inyobe yache yichili yigholokite bulo.

²⁶ Akuzikwezekezya indembela inko izya kubutali, nukubafyunizya abantu aba kubumalilo ubwa chisu. Po ennya bakwiza lubilolubilo sona balubilo nkani!

²⁷ Atalipo nayumo uwa kulita pamo uwa kwipunula, sona atalipo nayumo uwa kukonona pamo uwa kughona utulo, atalipo nayumo ulamba uwa kutozoka mumusana, pamo akapinyilo aka nkwato kako kadumuka.

²⁸ Utulasilo twabo tukwete nkani, sona ubwele bwabo bosi bwayaniziwa, inyayo izya falasi zyabo zili ngati lipangazibwe, ivingelengele ivya ngolo ivya bwite, vikuzyungulila ngati we kankungu.

²⁹ Ukulila kwabo kuli ngati kwa nkalamu, zikubuluma ngati bana aba nkalamu, zikubuluma bo zikulema inyama nukubuka nayo, kuko atalipo nayumo uwakuyipoka.

³⁰ Pisiku lilalila bakwiza pakubuluma, pachifukwa icha nyama nukupoma ngati nyanja. Nanti weka akwennya pachisu, akwennya ichisi nintamyo, lope ulukozyo lukwiza pakukupikiliwa namabingu amafitu.