Yesaya 49 - IBAYIBOLO 2024

Aba Izilayeli lo lukozyo ulwa inko

¹ Nteghelezya amwe mwe bantu mwe mukwikala mulubazu ulwa nyanja, namwe mwe bantu mwe mukwikala kubutali, ivwa zinizi! Bo inchili napakupapiwa, u Mwene akanyitizya pakuba ne mubombi wache. Bo inchili mulwanda akanyita itabwa lyane.

² Akaghupela umulomo wane pakuba ngati wepanga yuyo akwete kosikosi. Ninyobe iyache ni yache akanvighilila ane. Akampela ane pakuba ngati ne kalasilo kako bakayannya pakubombezya.

³ Akambuzya akati, “Awe Izilayeli, we mubombi wane, abantu bakwiza pakumpala.”

⁴ Loli nkati, “Imbombite imbombo iya pabulo, natagha pabulo amaka ghane, loli vyosi na vibika munyobe izya Mwene, umuvwalo wane ghuli mwa Chala wane.”

⁵ Bo inchili napakupapiwa, u Mwene akamata mulwanda, ikuti imbanje ne mubombi wache, pakumunyosezya u Yakobo kukwache, nukubabungannya aba Izilayeli. Nkuchindikiwa pantazi pa Mwene, u Chala we maka ghane.

⁶ U Mwene akamubuzya akati, “Ko kantu akanandi nkani, akakuti, ubanje we mubombi wane. Utakwiza pakubomba yene, iya kubanyosezya abaluko ulwa Yakobo, sona nukubanyosezya aba Izilayeli babo bakasyalako, loli nkwiza pakukupela pakuba we lukozyo ulwa bantu babo bate ba Yuda, umwakuti abantu bosi aba muchisu ichapasi bapokiwe.”

⁷ U Mwene Umutabuli Umuzelu uwa Izilayeli, akumubuzya yuyo asuliwe nukukaniwa ninko, sona mubombi uwa balaghili akuti, “Abamwene bakwiza pakukwennya nukwimilila, amakambala ghakwiza pakukwennya nukufughamila, pachifukwa ichakuti u Mwene yuyo musubiliwa, Umuzelu uwa Izilayeli weyuyo akakusala.”

U Yelusalemu akuzengiwa sona

⁸ Izi zyo zizyo u Mwene akunena akuti, “Pakabalilo kane akakubapokela nkwiza pakubamula, sona pisiku ilya bupoki nkwiza pakubavwa, nkwiza pakubasungilila, nukubapela pakuba mwe lufingo ulwa bantu, nukuchinyosezyamo ichisu, pakuchigaba ichisu ichakunanganika chila pakuba mpyana,

⁹ akababuzya abakayidi akati, ‘Fuma’ akababuzya sona babo bali muchisi akati, ‘Banga myee!’ Bakwiza pakulyanga ivyakulya mulubazu ulwa musebo, nukulyagha isote iteta, pakaghamba papo patakumela isote.

¹⁰ Batakwiza pakuba nizala pamo ni nyota, pamo ichitukizu pamo izuba vikwiza pakubocha. Yuyo ali ni chililizi papabo akwiza pakubalongozya, nukubalongozezya ku mbwibwi izya mizi.

¹¹ “Nkwiza pakughapela amaghamba pakuba misebo, sona izila zyane izyapamwanya zikwiza pakukweziwa.

¹² Ennya, bakwiza pakufuma kubutali, bamo kuchisu ichakumitu, abanji kubwinjililo bwizuba, sona abamwabo muchigaba icha Aswani.”

¹³ Wee chisu icha kumwanya, sekelagha wee chisu ichapasi wimbaye inyimbo. Wee maghamba wimbaye! Pakuti u Mwene akubasangalusya abantu bache nukuba ni chililizi na babo bakuyimba.

¹⁴ Loli abantu aba mu Ziyoni bakuti, “U Mwene atupa inkonto sona atuluvya.”

¹⁵ Nkimba u umukolo angamuluvya umwana wache yuyo akumonkezya, nukuleka pakuba ni chililizi nu mwana yuyo amupapite? Napapo angamuluvya, ane intangabaluvya, awe!

¹⁶ Ennya Yelusalemu, nakusimba muchikufi icha nyobe zyane. Ivibumba vyako nkuvyennya akabalilo kosi.

¹⁷ Abazengi abakaya aka Yelusalemu bakwiza lubilolubilo, bope babo bakakamongolannya, bakwepako.

¹⁸ Talankannya nukwennya kosi na kosi, abana binyu abalumendo bosi, bakubungana nukwiza kukwinyu. Naloliloli ane ne Mwene umumi nkulapa nkuti, “Mukwiza pakuvwala vyosi ngati ivyakwibonesekezya akiza, mukwiza pakuvwala ngati mwenesendwa.

¹⁹ “Napapo ichisu chinyu chikananganika nukuba chisami sona chikalekiwa. Po chikwiza pakuba chinandi nkani ku bantu binyu ukuti bikalayemo, sona abantu babo bakabanangannya, bakwiza pakuba kubutali namwe.

²⁰ Abana babo bakapapiliwa mukabalilo kabuzya bwinyu, bakwiza pakunena ukuti, ‘Ubuzilo ubu bunandi kukwitu, mutupe ubuzilo ubukulu ubwakwikalamo.’

²¹ Po ukwiza pakunena mumoyo wako ukuti, ‘Nkimba wewenu yuyo akampapila abana banaba? Nkafwilwa sona nkaba ne mughumba, nkaba mubuzya sona nkakaniwa. Nkimba wewenu yuyo akabalelagha abana banaba? Po nkasyala nemwene bulo, fwandi banaba bafuma kwiyi?’ ”

²² U Mwene Uwamaka Ghosi akuti, “Ennya, nkwiza pakubakopezya ni nyobe, aba inko babo te ba Yuda, nkwiza pakubakwezezya indembela abantu, bakwiza na bana bako abalumendo munyobe zyabo, nukubanyamula abana bako abalindu pavipunko vyabo.

²³ Abamwene bakwiza pakuba ngati bo baghuso, sona abamwene babo bakolo bakwiza pakuba boba nyoko. Bakwiza ukwinama pantazi papako bo vyeni vyabo vikotamiye pasi, bakwiza pakumyanta ulufumbi ulwa kunyayo zyinyu. Po mukwiza pakuzimanya ukuti ane ne Mwene, babo bakunsubila batakwiza pakukoziwa isoni.”

²⁴ Nkimba mungamufyula umusilikali, pamo pakubapoka abakayidi, munyobe izya muntu umukali?

²⁵ U Mwene akuti, “Naloli, abakayidi bakwiza pakufyuliwa kubalwabwite, nivyakufyula bulo vyope vikwiza pakufyuliwa ku bantu abakali, chifukwa nkwiza pakulwana nabo, babo bakulwana nawe, po nkwiza pakubapoka abana bako.

²⁶ Nkwiza pakubapela abayinvyi binyu pakulya amabili ghabo, bakwiza pakung'wela ibanda lyabo, ngati mumo bakubombela nu vinyo. Po umuntu wesi akwiza pakummanya ane ukuti, ne Mwene, u Mupoki winyu, Umutabuli winyu, Uwamaka uwa Yakobo.”