Yesaya 48 - IBAYIBOLO 2024

U Chala we Mwene uwa vya muntazi

¹ “Wee nyumba iya Yakobo, teghelezya ichi, wewe ukwitiziwa ni tabwa ilya Izilayeli, wafuma muluko ulwa Yuda, amwe mukulapa ichilapo mwitabwa ilya Mwene, sona mutakumwiputa u Chala uwa Izilayeli, mubwanaloli na mubugholosu,

² mukwiyitizya mwebene ukuti, mwebenecho abakaya akakulu nkani akazelu, nukumusubila u Chala uwa Izilayeli, yuyo itabwa lyache, we Mwene Uwamaka Ghosi.

³ Nkababuzizya zila zizyo zikwiza pakubako, umulomo wane ukazifumusya nukubamanyisya, po nkazibomba umwalubilolubilo, nukukwanilisiwa.

⁴ Pakuti nkamanya ukuti, amoyo ghinyu makafu nkani, sona mukaba bakafu ngati chela, ivyeni vyinyu vikaba mukuba.

⁵ Polelo nkababuzya kale ivintu vinivi, bo vichili pakubombiwa nkabafumuzizya, umwakuti mutakanenaye ukuti, ‘Ivifwani vyane vikabomba zinizi, ichifwani chane icha ikwi nu chala uwa chela, vikalamula ukuti zinizi zibombiwe.’

⁶ Mwivuye ivintu vinivi. Vyenelezye vyosi vinivi. Nkimba awe utangavyitikizya ukuti, vivyo nkunena vyanaloli? Ukwanda pakabalilo aka mupaka muntazi nkwiza, pakufumusya ivintu ivipya, izya vintu vivyo vifisiwe kukwinyu.

⁷ Vipeliwe bulo lunulu vivyo vitakabako kale, bo lichili nukufika isiku ilya ilelo, mukaba ukuti mutavivuyepo. Po utanganena ukuti, ‘Naloliloli nkavimanya.’

⁸ Mutavyivuyepo pamo ukuvimanya, ukwanda bulo kale amakutu ghinyu ghatighukitepo. Pachifukwa ichakuti nkumanya ukuti awe we mulwani, ukitiziwanga ukuti we musambuke, ukwanda ko kubwana bwako.

⁹ Pachifukwa icha itabwa lyane ntakukalala lubilolubilo, pachifukwa icha mapalo ghane nkufisa ubukali bwane, umwakuti ntakabanangannye.

¹⁰ Ennya, mumo nabaswefezya, loli ate ngati we siliva awe, nabayezya mumuvuno uwa mayimba.

¹¹ Pachifukwa icha nemwene, pachifukwa icha ane, nkwiza pakubomba zinizi. Nkimba ningitikizya bulibuli ukuti itabwa lyane linyaziwanje? Ntakwiza pakubapa ubuchindamu bwane abanji.

U Sayilasi weyuyo mulongozi u Mwene amusalite

¹² “Wee Yakobo nteghelezya, mweba Izilayeli mwe nabitizya, Ane ne wabwandilo sona ne wabumalilo!

¹³ Inyobe izyane ni zyane, nkala ulwalo ulwa chisu ichapasi, inyobe yane indilo, yikukuzula ichisu ichakumwanya. Bo nkuvyitizya ivyisu vyosi vibili, vikwiza kukwane.

¹⁴ “Bungana mwebosi poka nunkuteghelezya, nkimba chifwani choni, chicho chineneyepo zila ivintu vinivi? Umumanyani umusaliwa uwa we Mwene, akwiza pakukwanilisya zizyo akulonda pa Babiloni. Akwiza pakubomba zizyo ane nkulonda ukuti abombe. Inyobe yache iya maka, yikwiza pakulwana naba Babiloni.

¹⁵ Ane nene nkunena nukumwitizya, nkamulongozya nukumupa ubupoti.

¹⁶ Po ilelo palamila nukuteghelezya izi: Ukwanda ko kubwandilo nanena pabuzelu, pakabalilo kako zikabombiwanga, nkabanga palapala.” Po ilelo u Mwene Uwamaka Ghosi, antuma nu Muzimu wache.

Imbatiko izya Mwene pa abantu bache

¹⁷ U Mwene Umutabuli, Umuzelu uwa Izilayeli akuti, “Ane ne Mwene u Chala winyu, yuyo akubamanyisya ukuti mwennye ubwiza, sona akubalongozya izila iya kwendamo.

¹⁸ Nanti mukaghivwilagha amalamulo ghane, po umutende winyu ngali ghukaba ngati lusoko, sona ubugholosu bwinyu, ngali bukubanga ngati mayigha agha panyanja.

¹⁹ Abaluko lwinyu bakwiza pakuba binji ngati musesenga, sona abana binyu batakwiza pakubelengiwa, itabwa lyabo litakwiza pakwefiwa, pamo ukunanganika pamaso papane.”

²⁰ Fumamo muchisu icha Babiloni, nukubachimbila aba Babiloni, muzifumusye zinizi nukukolomoka ukwa lusekelo, sona muzilumbililaye ukuti, “U Mwene amutabula umubombi wache u Izilayeli!”

²¹ Bo u Mwene akulongozya abantu bache munkolongo, inyota yitakabalema. Akafumya amizi mwilyalabwe, akazepula ilyalabwe po amizi ghakafuma.

²² U Mwene akuti, “Umuntu umubibi ate nu mutende.”