Yesaya 46 - IBAYIBOLO 2024

¹ U Belo akafughamila pasi, u Nebo akawisya icheni pasi, vikwiza pakuba we katundu uwa pampunda. Ivifwani vivyo vinyamuliwe ving'wamite, we katundu pavinyamana vivyo vilitite.

² Vikukotama nukufughamila poka, vitakwipoka kwa katundu, vitabaghiye pakwipoka vyene, loli ivyene vyinjila mubukayidi.

³ Wee nyumba iya Yakobo, nteghelezya, amwe mwebosi abakusyalako munyumba iya Izilayeli, amwe nkabanyamula ukwanda pakabalilo kako mukamelelagha ulwanda, sona ukwanda pakabalilo kako mukapapiliwanga

⁴ Napapo mughosipe, nene nkwiza pakubasungilila. Ane nabapela nkwiza pakubavwa, nkwiza pakuba namwe nukubapoka.

⁵ Nkimba mungamfwanikizya nuwenu, pamo ukunkolannya? Nkimba alipo yumo yuyo nkolanite nawe, uwakuti ningayana nawe?

⁶ Bamo bakakupula ugolide ukufuma munyambi zyabo, nukupima usiliva pachipimilo, bakumusimba imbombo umusyana golide, pakuyannya uchala uwa chifwani, bakumufughamilila nukumuchindika.

⁷ Bakuchinyamula muvipunko vyabo, nukuchibika pabuzilo bwache, po chikwimilila palapala. Chitangenda pabuzilo bwache bula. Napapo yumo angachiputa chitakwamula, chitangamupoka muntamyo zyabo.

⁸ Kumbuka zinizi, po muchinong'onelayepo, sona chibanje pamoyo winyu, mwe bakusambuka amwe

⁹ Kumbuka ivintu ivyakale, ivyakwanda. Ane ne Chala, ataliko uyunji, yuyo akolanite nane.

¹⁰ Ukwanda popa bwandilo, nkanena zizyo zikwiza pakubako kubumalilo, nkanenela zila nizya muntazi, zizyo zikuya pakwiza. Nkunena ukuti, “Inyinong'ono zyane zitakwiza pakupotwa, nkwiza pakubomba zyosi, zizyo nkalonda pakubomba.”

¹¹ Nkwitizya amazwanga kubufumilo bwizuba, kokuti umuntu uwakufuma kuchisu icha kubutali, yuyo akwiza pakukwanilisya, zizyo nkulonda pakubomba. Zizyo nanena nkwiza pakuzikwanilisya, zizyo nalonda ukubomba, nkwiza pakuzibomba.

¹² Teghelezya kukwane mwe muli namoyo amakafu, sona mwe muli kubutali nu bugholosu.

¹³ Nkwiza nu bugholosu kupipi, bute kubutali awe, nu bupoki bwane butakwiza pakukabila. Nkwiza pakukapoka akaya aka Ziyoni, nukubapa ubuchindamu aba Izilayeli.