Yesaya 45 - IBAYIBOLO 2024

U Mwene akumwimika u Sayilasi

¹ U Mwene akanena kwa Sayilasi umupakiwa wache, yuyo akumulema ninyobe yache indilo, ukuti azipote inko pantazi pache, nukubafyula abamwene ubumwene bwabo, nukwighula imilyango pantazi pache, umwakuti imilyango yitakighaliwe sona:

² “Nkwiza pakukulongolela, nukughatengannya amaghamba, nkwiza pakuyipyola imilyango iya mukuba, nukudumula impingwi izya chela.

³ Nkwiza pakukupa ichuma chicho chitakuboneka, u bukabi bubo bubikiwe kubuzilo ubufisamu, umwakuti uzimanye ukuti ane ne Mwene, u Chala uwa Izilayeli, yuyo akukwitizya nitabwa lyako.

⁴ Pachifukwa icha mubombi wane u Yakobo u Izilayeli umusaliwa wane, nkukwitizya pakutambula itabwa lyako, nkukupa itabwa ilya muchizi napapo utamenye ane.

⁵ “Ane ne Mwene atalipo uyunji, palubazu lwane atalipo u Chala uyunji. Nkwiza pakubapa amaka, napapo utamenye ane,

⁶ umwakuti abantu bamanye ukufuma kubufumilo bwizuba, mupaka kubwinjililo bwache kutalipo nayumo kulubazu lwane, ne Mwene atalipo u chala uyunji.

⁷ Nkupela ulokozyo ni chisi, nkwiza nulusayo sona nintamyo. Ane ne Mwene nkubomba zyosi zinizi.

⁸ Nkwiza pakutuma ubupoti ukufuma kumwanya, bukwiza pakutima ngati vula. Ichisu chikwiza pakwighuka, nukupokela ubupoki, umwakuti ubugholosu bukule, ne Mwene nkazipela izi.”

⁹ Chighune ku muntu yuyo akulwana numupeli wache, isonta yiyo yiyanite bulo nizinji. Nkimba isonta yingamubuzya yuyo akuyimata ukuti, “Ukubomba ichoni”? Nkimba isonta yingamubuzya umumata isonta ukuti, “Ate ninyobe”?

¹⁰ Chighune ku muntu yuyo akunena kwa wise akuti, “Nkimba choni chicho ukampapa?” Pamo kwa nyina ukuti, “Nkimba wapapa ichoni?”

¹¹ U Mwene Umuzelu uwa Izilayeli, numupeli wache akuti, “Ukuyana nivintu vivyo vikwiza, Nkimba ukundalusya ane nizya bana bane, pamo pakundamula ni mbombo izya nyobe zyane?

¹² Nene nkachipela ichisu ichapasi, sona nkamumata umuntu ukuti ikalayemo. Ninyobe izyane ni zyane nkachikuzula ichisu ichakumwanya, nkuvilamula ivilundilo vyosi ivyakumwanya.

¹³ Nkwiza pakumuvundumula u Sayilasi mubugholosu bwane, Nkwiza pakuzigholosya izila zyache zyosi. Akwiza pakukazenga sona akaya kane akakulu, nukubabula abazya, loli atakwiza pakupeghiwa amalipilo, pamo umwavwalo.” Umu momumo akunenela u Mwene Uwamaka Ghosi.

¹⁴ U Mwene akuti, “Ubukabi ubwa chisu icha Ijiputi ni chisu icha Etiyopiya, bukwiza pakuba bwinyu, abantu abatalitali bakwiza pakuba bazya binyu, nukubakonka bo bapinyiwe ni minyololo. Bakwiza pakufughamila nukulambilizya ukuti, ‘Naloli u Chala ali nawe, sona atalipo uyunji, atalipo u chala uwamwabo.’ ”

¹⁵ Zyanaloli ukuti awe we Chala yuyo akwifisa mwene, Wee Chala nu Mupoki uwa Izilayeli.

¹⁶ Bosi babo bakuyannya abachala aba vifwani, bakwiza pakukoziwa isoni nukusamuliwa poka.

¹⁷ Loli aba Izilayeli bakwiza pakupokiwa nu Mwene nu bupoki ubwa bwila na bwila, mutakwiza pakukoziwa isoni nalumolumo, pamo ukusamuliwa, ukwa bwila na bwila.

¹⁸ Izi zyo zizyo u Mwene akunena, yuyo akapela ichisu icha kumwanya, we Chala. Weyuyo akachipela atakachipela ukuti, mutakabanjemo nakamokamo, loli akachipela ukuti chibanje chakwikalamo abantu. U Mwene akuti, “Ane ne Mwene atalipo uyunji.”

¹⁹ Intakanenela kubusyefu, pamo pabuzilo bumo muchisu icha chisi. Intakababuzya abaluko ulwa Yakobo ukuti, “Mundondaye po pate imbombo nayimoyimo.” Ane ne Mwene, nkunena ubwanaloli, nukuzifumusya zizyo ngolosu.

U Mwene uwa chisu chosi ichapasi

²⁰ Mubungane poka nukwiza, amwe inko izya bantu. Mupalamile papipi, mwe mukapona ku bantu aba inko izinji. Abapunganu bo babo bakunyamula ivifwani ivya kubiza, babo bakwiputa kuvifwani vivyo vitangabapoka.

²¹ Mwizaye sona lingannya inongwa yinyu pabulonjelo, baleka abanongwa banenezannye. Nkimba wewenu yuyo akanenela zila, zinizi pakubombiwa? Nkimba intakaba nene, ne Mwene, u Chala yuyo akupoka abantu bache? Atalipo u chala uyunji.

²² Amwe mwe bantu bosi aba pachisu ichapasi, pindukila kukwane ukuti mupokiwe, pakuti Ane ne Chala, sona atalipo uyunji.

²³ Ulufingo lwane lwanaloli, sona lutakwiza pakwanduliwamo. Umuntu wesi akwiza pakumfughamilila, nukufingila mwitabwa lyane.

²⁴ Bakwiza pakunena nizya ane ukuti, “Mwa Mwene mpela, momumo muli ubugholosu namaka.” Loli bosi babo bambengite, bakwiza pakukoziwa isoni.

²⁵ Loli mwa Mwene abaluko losi ulwa Izilayeli, bakwiza pakuba bagholosu, sona bakwiza pakunchindika.