Yesaya 44 - IBAYIBOLO 2024

U Mwene we Chala mpela

¹ “Wee Yakobo, loli ilelo teghelezya, we mubombi wane, we Izilayeli wewe nkakusala.

² Momumo akunenela u Mwene yuyo akakupela, nukukumata mulwanda, weyuyo akwiza pakukwavwa, wee Yakobo, utakanyilaye we mubombi wane, u Yeshulani yuyo imusalite.

³ Pakuti nkwiza pakupungulila amizi pachisu ichanyota, nukubika utusoko pachisu ichumizu, Nkwiza pakupungulila u Muzimu wane pabana binyu, sona nu lusayo lwane pabaluko lwinyu.

⁴ Bakwiza pakumela ngati lisote lilyo limelite muchisu icha mizi, ngati mafyomi ghagho ghamelite mulubazu ulwa tusoko tuto tukwenda.

⁵ Umuntu yumo akwiza pakunenagha ukuti, ‘Ane ne wa Mwene,’ uyunji akwiza pakwiyita itabwa ilya Yakobo, uwamwabo akwiza pakusimba panyobe ukuti, ‘Wa Mwene,’ nukwiyita itabwa ilya Izilayeli.”

⁶ U Mwene Uwamaka Ghosi, u Chala Umutabuli uwa Izilayeli akuti, “Ane ne bwandilo sona ne bumalilo, atalipo u Chala uyunji loli ane nemwene.

⁷ Po nkimba wewenu yuyo ayanite nane? Muleka achifumusye. Muleke azinene nukuzilanjizya pabuzelu pantazi papane. Nkimba choni chicho chabombiwapo, ukwanda papo nkabapelela abantu bane abakwanda, eee, muleke anenelezila zizyo zikwiza pakubombiwa.

⁸ Mutakatetemaye, mutanyilaye. Nkimba intakazifumusya zinizi nukuzinenela zila? Mwe bakaboni bane. Nkimba alipo u Chala uyunji ukwefyako ane? Awe, patalipo sona ibwe ilinji, intalimenyepo nalimolimo.”

⁹ Bosi babo bakupanga ivifwani babulo, sona nivintu vivyo bakusunga vite ni mbombo. Babo bakuvyiputa bafwamaso, batakumanya nachimochimo, bakwiza pakukoziwa isoni.

¹⁰ Nkimba pali ukukabapo ichoni pakubiza abachala abavifwani, pamo pakusunguluzya abachala abachela?

¹¹ Abantu bosi babo bakwiputa kuvifwani bakwiza pakukoziwa isoni, abakubiza ivifwani bantu babulo. Baleke bize poka nukwimilila, bakwiza pakoghofiwa nukukoziwa isoni.

¹² Uwakusyana akusenda ichela, nukuchibika pamazimwa agha moto, nukuchitiza ichifwani ninyondo, nukuchiyannya namaka agha nyobe yache. Akwivwa izala sona amaka ghakumumalila, atakung'wela amizi po akwenda nukuzilika.

¹³ Umupala matabwa akupima nichakupimila, nukola umuzele nisimbilo, akuchiyannya nimbizo nukupima nakapimilo. Akuchibiza muchifwani icha muntu, mubuchindamu bosi ubwa muntu, ukuti chikalaye munyumba iya kwiputilako abachala abavifwani.

¹⁴ Akudumula amakwi agha mwale, pamo akusenda ikwi ilya mulombwa, pamo ilya mupandapanda. Akulileka ukuti likulaye pakasi pamakwi agha mumusitu, pamo pakubyala amakwi agha payini, po ivula yikalikuzya.

¹⁵ Po umuntu akulibombezyako pakuba nkwi, akusendako isamba zimo pakuba zyakota, isamba izinji akubombezya pakupiyila ivibama, Loli akubiza u chala nukwanda pakumwiputa, akuyannya ichifwani nukuchifughamilila.

¹⁶ Ichigaba chimo icha ikwi akuchocha mumoto, nukupiyapo ichakulya, akochapo inyama yache, akuyilya nukwikuta. Akota umoto nukunena ukuti, “Eya! Natukila, nennya umoto.”

¹⁷ Ichigaba icha kusyalako, akupangila u chala wache uwa chifwani, akuchifughamila nukuchiputa. Akuchiputa nukuti, “Mpoka, awe we chala wane.”

¹⁸ Batachimenye nachimochimo, sona batakwivwisya nachimochimo, amaso ghabo ghighaliliwe, po batangennya, inyinong'ono zyabo zighaliliwe, umwakuti batangivwisya.

¹⁹ Atalipo nayumo yuyo alekite pakwinong'ona, nayumo umuntu yuyo ali nu bumanyi, pamo ukwivwisya nukunena ukuti, “Ichigaba chimo nkuchibombezya pakuba nkwi, po amazimwa ghache nkupiyila ichibama, nkocha inyama nukulya. Nkimba ichigaba ichakusyalako ningayanizizya ichintu ichamwiko? Nkimba ningachifughamila ichizinka?”

²⁰ Akulya itoyi, inyinong'ono zyache izya bumyasi zikumusovya, atangipoka mwene, pamo nukuti, “Nkimba ichintu ichi, chicho chili munyobe yane iyandilo te chabumyasi?”

²¹ U Mwene akuti, “Wee Yakobo, kumbuka ivintu ivi, wee Izilayeli kumbuka, ukuti we mubombi wane. Nkakupela pakuba we mubombi wane, intenkakuluvye nalumolumo.

²² Nabwefya ububibi bwako ngati libingu, imbibi zyako nazyefya ngati we kabefu, nyokela kukwane, pakuti nakutabula.”

²³ Wee chisu icha kumwanya, imbagha nulusekelo, pakuti u Mwene abomba zinizi. Kolomoka nkani, wee chisu ichakusi, kolomoka mwe maghamba, imbagha mwe misitu, sona namakwi ghako ghosi, pakuti u Mwene amutabula u Yakobo, amulanjizya u Izilayeli ubuchindamu bwache.

²⁴ U Mwene, yuyo akabamata mulwanda, nukubatabula akuti, “Ane ne Mwene, yuyo apelite ivintu vyosi, yuyo mwene akachikuzula ichisu ichakumwanya, yuyo akachizungulula ichisu ichapasi,

²⁵ nene nkavivulungannya ivimanyilo, ivya balaghuzi abamyasi, nukubapela bapunganu babo bakunena ivya muntazi, akubamala amaka abamahala, nukubapela pakuba bapunganu,

²⁶ yuyo akunyamula amazyu agha babombi bache, nukukwanilisya zizyo intumi zyache zikanenela zila, yuyo akunena nizya Yelusalemu ukuti, ‘Akwiza pakuba na bantu abakwikalamo,’ mutwaya utukulu utwa Yuda, ‘Tukwiza pakuzengiwa sona,’ ivisami vyabo vyope, ‘Nkwiza pakuvizenga sona,’

²⁷ nizyu lyane nkutulamula utusoko ukuti, ‘Kamuka, po nkukamusya utusoko twako tula,’

²⁸ nkumubuzya u Sayilasi ukuti, ‘We mudimi wane, ukwiza pakumalizya imbombo yane, yiyo nkulonda ukuti ubombaye,’ nkwiza pakulamula ukuti, ‘U Yelusalemu azengiwe sona,’ nkwiza pakulamula sona ukuti, ‘Ulwalo ulwa Nyumba iya Chala luzengiwe sona.’ ”