Yesaya 42 - IBAYIBOLO 2024

Umubombi uwa Mwene

¹ U Mwene akuti, “Ennya umubombi wane yuyo nkumupa amaka, yuyo namusala sona nkuhoboka nawe, nkwiza pakubika u Muzimu wane papache, sona akwiza pakuzilongela inko zyosi mubwanaloli.

² Atakwiza pakukolomoka pamo ukulila, pamo ukukwezya izyu lyache mumisebo.

³ Ulutete lulo lunyonganite atakwiza pakulupyola, pamo ukuzimya ichikoka ichakusuka, akwiza nu bwanaloli ubwa bwila na bwila

⁴ atakwiza pakupotwa pamo ukuwa amaka, bo atikazizye ubwanaloli pachisu ichapasi. Utusungo tukulindilila indaghilo zyache.”

⁵ U Chala u Mwene akapela ichisu ichakumwanya nukuvikuzula, akapela ichisu ichapasi navyosi vivyo vikufuma mumo, akubapa umuyi abantu bache, sona akubapa ubumi babo bakwendapo.

⁶ Ane, ne Mwene, nakwitizya mubugholosu, nkwiza pakukulema panyobe. Nkwiza pakukusungilila, pakuba lufingo ku bantu, sona pakuba lukozyo ku inko izinji,

⁷ pakwighula amaso agha bantu abafwamaso, pakubasatula abantu babo bali mujele, nukubafumya mujele babo bakwikala muchisi.

⁸ “Ane ne Mwene linili lyo litabwa lyane! Ntakwiza pakubapa ubuchindamu bwane abantu abanji, pamo pakuvipa ivifwani amapalo ghane.

⁹ Ennya, ivintu ivyakale vyakwanilisiwa, po ilelo nkubabuzya ivintu ivipya, bo vichili pakubombiwa nkubafumusizya zila.”

Ulwimbo ulwa mapalo

¹⁰ Mumwimbilaye u Mwene ulwimbo ulupya, amwe mwe mukufuma kubumalilo ubwa chisu mumupalaye, amwe mwe mukubuka pasi panyanja navyosi vivyo vilimumo, amwe mwe tusungo na mwebosi mwe mukwikala mumo mumwimbilaye.

¹¹ Leka inkolongo nutwaya twache utukulu utupalamani tukolomokaye, nutwaya tuto aba Kedali bakwikala basekelaye. Leka abantu aba mu Sela bimbaye umwakusekela, leka bakolomokaye pamwanya pamaghamba.

¹² Mumupanje u Mwene ubuchindamu, nukufumusya amapalo ghache, amwe mwe mukwikala mutusungo.

¹³ U Mwene akulefuka ngati muntu uwamaka, sona ngati musilikali yuyo ali nulweke pakulwa ubwite, akukolomoka nukukoloma ukwa bwite, po akubapota abalwani bache.

¹⁴ Ukwakabalilo akatali nkaba bulo myee, nkapuma bulo nukwikanizya nemwene. Loli ilelo, nkwiza pakukolomoka ngati mukolo yuyo ali pakusayiwa, nkulakilwa nukufuta umwakuyimba.

¹⁵ Nkwiza pakunangannya amaghamba nutughamba, nukumika ivimelwa vyabo vyosi, nkwiza pakuzipela isoko pakuba tusungo nukupwezya iviziba.

¹⁶ Nkwiza pakubalongozya abafwamaso muzila zizyo batazimenye, nkwiza pakubalongozya muzila zizyo mutenditemo nalumolumo. Nkwiza pakuchipela ichisi pakuba lukozyo pantazi papabo, ubuzilo ubwa vibanka butenganiziwe. Ivi vyo vivyo nkwiza pakubomba, ntakwiza pakubaleka nalumo.

¹⁷ Loli babo bavisubiye ivifwani, babo bakunena kuvifwani ukuti, “Mwe bachala bitu,” bakwiza pakupeghiwa inkonto umwasoni.

Aba Izilayeli bapotwa pakumanyila

¹⁸ “Ivwa kuno, amwe mwe bamapuli, Ennya, amwe mwe bafwamaso sona mwenelezye!

¹⁹ Nkimba wewenu yuyo mufwamaso loli mubombi wane, sona wamapuli ngati ntumi yiyo nayituma? Nkimba wewenu yuyo mufwamaso ngati yuyo iyipiye mwene kukwane, mufwamaso ngati mubombi uwa Mwene?

²⁰ Wennya ivintu ivyinji nkani, loli utakuvibikilako umoyo, amakutu ghako ghighukite loli utakwivwa nachimochimo.”

²¹ Zikamuhobosya u Mwene, pachifukwa icha bugholosu bwache, akalonda pakulupela ululaghilo lwache pakuba lukulu nkani nu luchindamu.

²² Loli aba bo bantu babo bakafyuliwa nukuzompoliwa, bosi bakataghiwa muviliba, pamo ukubafisa mujele. Baba bulo vyakufyuliwa, atalipo nayumo uwakubapoka. Baba ngati chakuzompoliwa, sona atalipo uwakunena ukuti, “Mubanyosye.”

²³ Nkimba wewenu yuyo akwiza pakuteghelezya zinizi, pamo yuyo akwiza pakwivwisya muntazi?

²⁴ Nkimba wewenu yuyo akamubika u Yakobo, munyobe izya bakuzompola, sona aba Izilayeli munyobe izya bakufyula? Fwandi atakaba we Mwene yuyo tumunangiye? Pakuti batakakonkagha ivimanyisyo vyache, sona batakivwilagha ululaghilo lwache?

²⁵ Akapungulila ubukali bwache papabo, sona nu bukali ubwa bwite bwache. Ghukabocha umwakuzyungulila, loli pope batakivwanga, ghukabalungulizya, loli pope batakachibikila kumoyo.