Yesaya 40 - IBAYIBOLO 2024

Amazyu agha lusubilo

¹ U Chala akuti, “Basangalusye, basangalusye abantu bane,

² ubakazye abantu aba mu Yelusalemu. Babuzye ukuti bayimba akabalilo akatali nkani, imbibi zyabo zyahobokeliwa. Nabafunda mpela pachifukwa icha mbibi zyabo zyosi.”

³ Izyu ilya muntu yumo likukolomoka munkolongo likuti, “Yannya izila iya Mwene, gholosya umusebo uwa Chala witu munkolongo!

⁴ Amakombe ghosi ghafukiliwe, ighamba lyosi na kaghamba kosi vitenganiziwe. Ichisu icha tubanka chitenganiziwe, ubuzilo ubwa mabwe bwesiwe.

⁵ Po ubuchindamu ubwa Mwene bukwiza pakuvumbuliwa, sona abantu bosi bakwiza pakwennya.” U Mwene anena.

⁶ Izyu likukolomoka likuti, “Fumusya!” Po nkati, “Nkimba nkwiza pakufumusya ichoni?” “Abantu bosi bali ngati lisote, sona ubuchindamu bwabo buli ngati bwezya ubwa muzi.

⁷ Isote likufoka sona ubwezya bukulaghala, pachifukwa ichakuti u Mwene afutilapo umuyi. Naloli abantu bali ngati lisote.

⁸ Isote likufoka sona ubwezya bukulaghala, loli amazyu agha Chala witu, ghakwiza pakubangako bwila na bwila.”

⁹ Awe we ukwiza na mazyu amiza ku Ziyoni, kwela pamwanya pighamba. Awe we ukwiza na mazyu amiza ku Yelusalemu, ukolomokaye, utakanyilaye, tubuzye utwaya utwa Yuda ukuti, “U Chala winyu uyu!”

¹⁰ Ennya, u Mwene Uwamaka Ghosi akwiza namaka, akwiza pakulaghila namaka ghache. Ennya, akwiza numuvwalo wache, sona alinavyo ivyakubahobosya vivyo vilongoleye muntazi.

¹¹ Akuzidima ing'ozi zyache ngati mudimi. Akutubunganika utwana utwa ng'ozi, nukutupakata munyobe zyache, nukuzilongozya akiza zizyo zili nutwana.

U Mwene Uwamaka Ghosi uwa Izilayeli atangafwanikiziwa

¹² Nkimba wewenu yuyo angapima amizi muchikufi chache, pamo pakuchipima ichisu icha kumwanya ninyobe zyache? Nkimba alipo yumo yuyo angabika ulufumbi muchidudunga, pamo pakupima amaghamba nutughamba pachipimilo?

¹³ Nkimba wewenu yuyo angazyivwisya inyinong'ono izya Mwene, pamo uwakumumanyisya amahala?

¹⁴ Nkimba wewenu yuyo u Mwene amulabitepo amahala, pamo wenu yuyo akumumanyisya ubulongi ubugholosu? Nkimba wenu yuyo amumanyizizyepo, pamo ukumulanjizya izila iya kivwisizye?

¹⁵ Naloli inko zili ngati akatonyelwa akamizi musonta, sona ghakupimiwa ngati lufumbi pachipimilo, akupima utusungo ngati lufumbi ulutinye.

¹⁶ Umusitu uwa Lebanoni ghutakukwana pakuba nkwi izya moto uwa pachighemo, pamo ivinyamana vyache pakuba ichakwiyipa ichakocha.

¹⁷ Pantazi papache inko zyosi zyabulo, akuzipima pakuba zya mwalwemwalwe, sona zite ni mbombo nayimoyimo.

¹⁸ Nkimba u Chala tungamufwanikizya nu wenu? Nkimba chifwani choni chicho tungamufwanikizya nacho?

¹⁹ Ate ngati chifwani, chicho umuntu akuchibiza, sona umusyana golide akuchipaka nu golide, nukuyannya iminyololo yache iya siliva.

²⁰ Umuntu umupina akusala ichizinka chicho chitakubola. Po akulonda umuntu yuyo amenye nkani pakubiza, pakumusimikila ichifwani chicho chitangawa pasi.

²¹ Nkimba mutazimenye? Nkimba mutivuye? Fwandi batakubuzizyepo ukwanda po pabwandilo? Nkimba mutakivwa ukwanda papo ichisu chikapeliwanga?

²² Akwikala pamupando uwabumwene, ghugho ghuli pamwanya pakasi pachisu ichapasi, sona abantu bache bali ngati zyo mpazi. Weyuyo akukuzula kumwanya ngati chakuvwinka, sona nukuzungulula ngati chisakasa icha kwikalamo.

²³ Akubisya pavitengo abamwene abamaka, nukubapela abalaghili aba muchisu ichapasi pakuba babulo.

²⁴ Bali ngati vibyalwa iviteta ukwanda papo bakabyalila, vivyo amagululuzi ghache ghachili, nukwisimika pasi, nanti u Chala afutilapo umuyi vikufoka, sona ukankungu akuvipupuzya ngati lyelelo.

²⁵ “Nkimba mungamfwanikizya nu wenu? Pamo wenu yuyo ayanite nane?” Umuzelu anena.

²⁶ Inusya amaso ghako nukwennya kumwanya, Nkimba wewenu yuyo akavipela vyosi vinivi? Weyuyo akulongozya ivilundilo ngati vyabasilikali, nukuvyita amatabwa vyosi, pachifukwa ichamaka ghache amakulu nkani, sona chitalipo nachimo chicho chikusobelapo.

²⁷ Wee Yakobo, nkimba choni chicho ukwilumbusya? Wee Izilayeli, nkimba choni chicho ukunena ukuti, “Izila yane yifisiwe kwa Mwene, sona u Chala atakuzibelengela intamyo zyane”?

²⁸ Nkimba mutazimenye? Nkimba mutivuye? U Mwene we Chala uwa bwila na bwila, umupeli uwa bumalilo ubwa chisu. Atakulita pamo ukudedebala, atalipo nayumo yuyo angaghamanya amahala ghache.

²⁹ Akubapa amaka abadedebazu, nukubonjelezya amaka babo balitite.

³⁰ Bope abachilumendo bakulita nukudedebala, sona abalumendo bakwipunula nukuwa.

³¹ Loli abantu babo bakumusubila u Mwene, amaka ghabo ghakwiza pakunyokela kubupya. Bakwiza pakubuluka ngati mazwanga, bakwiza pakuchimbila loli batakwiza pakulita, bakwiza pakwenda loli batakwiza pakudedebala.