Yesaya 4 - IBAYIBOLO 2024

¹ Pisiku lilalila abakolo seveni bakwiza, pakumulema umwanavuli weka nukuti, “Tukwiza pakulyanga ivyakulya vyitu, nukwilondela twebene amenda. Loli utwitikizye ukuti, twitiziwanje bachi bako, sona utwefyezyeko isoni!”

Ulusamba ulwa Mwene

² Pisiku lilalila ulusamba ulwa Mwene lukwiza pakuba lwakuboneka akiza nkani nulwa buchindamu, sona ivikomwa ivya chisu vikwiza pakuba vyakwituvya nivya buchindamu, ku bantu babo bakwiza pakulekiwa bumi mu Izilayeli.

³ Abantu babo bakalekiwa mu Ziyoni, na babo bakwiza pakupona mu Yelusalemu bakwiza pakwitiziwa bazelu, bosi babo basimbiwe poka na bantu abumi aba mu Yelusalemu.

⁴ U Mwene akwiza pakubozya abakolo aba mu Ziyoni ubunyazu, sona akwiza pakubaswefya kwibanda lilyo bakupula mu Yelusalemu nu muzimu uwa bulongi nuwa moto.

⁵ Po u Mwene akwiza pakubika ibingu pamwanya pabuzilo bosi ubwa pighamba ilya Ziyoni na pamwanya pachilundilo chache, pamusanya akwiza pakubavwinka ni bingu ilya lyosi ubusiku nutulabi utwakulama utwa moto. Pamwanya pabuchindamu pakwiza pakuba ichakuvwinka.

⁶ Bukwiza pakuba kazundila akakuchimbililamo ubutukizu ubwa kasanya, bwakuponelamo nukuvwama impepo iyamaka ni vula.