Yesaya 39 - IBAYIBOLO 2024

Intumi izya ku Babiloni

¹ Pakabalilo kalakala u Melodaki Baladani umwana uwa mwene u Baladani uwamu Babiloni akamutumila u Hezekiya abakalata ni chabupi, pachifukwa ichakuti akivwa izya bubine bwache sona nukupola.

² U Hezekiya akazipokela intumi zila umwakuhoboka nukubalanjizya vivyo vikaba munyumba iyakusungilamo ivyuma nu siliva nu golide, utwakununkila, amafuta aghamutengo, ivilwilo vyosi ivya bwite na vyosi vivyo vikaghiwanga umwakusungila ubukabi. Patakabapo nachimo chicho munyumba iyabumwene pamo mubumwene bwache chicho u Hezekiya atakabalanjizya.

³ Po umulaghuzi u Yesaya akabuka kwa mwene u Hezekiya nukumulalusya ukuti, “Nkimba abantu bala bakati choni, sona bakafuma kwiyi?” U Hezekiya akamula akati, “Kuchisu icha kubutali icha ku Babiloni.”

⁴ Umulaghuzi akamulalusya akati, “Nkimba bakennyamo ichoni munyumba yako iya bumwene?” U Hezekiya akamwamula akati, “Bekennyamo ivintu vyosi vivyo vili munyumba yane. Chitalipo nachimochimo chicho intakabalanjizya munyumba iyakusungilamo ubukabi bwane.”

⁵ Po u Yesaya akamubuzya u Hezekiya akati, “Ivwa izyu ilya Mwene Uwamaka Ghosi.

⁶ Amasiku ghagho ghakwiza vyosi vivyo vili munyumba yako na vyosi vivyo abanyenya bako bakasunga mupaka ilelo, vikwiza pakusendiwa ukubuka ku Babiloni. Chitalipo nachimochimo chicho chikwiza pakusyalapo.

⁷ Bamo pakasi pabana bako babo upapite bakwiza pakusendiwa nukubuka ku Babiloni, babo bakwiza pakuba bambombo abapase abamunyumba iya bumwene uwa muchisu icha Babiloni.”

⁸ U Hezekiya akamula akati, “Amazyu agha Mwene ghagho wanena miza bulo.” Pakuti akinong'onagha ukuti kukwiza pakuba umutende nukwikalana mubumi bwache.