Yesaya 38 - IBAYIBOLO 2024

Ububine ubwa mwene u Hezekiya nukupola kwache

¹ Pakabalilo kalakala u Hezekiya akabina nkani sona akaba papipi pakufwa. Umulaghuzi u Yesaya umwana uwa Amozi akabuka pakumwennya nukumubuzya ukuti, U Mwene akuti, “Yannya akaya kako pachifukwa ichakuti utakwiza pakupola, loli ukwiza pakufwa.”

² U Hezekiya akaghalabukila kulubumba nukwanda pakwiputa kwa Mwene ukuti,

³ “Wee Mwene ukumbuke mumo nendelagha pantazi papako umwabusubiliwa nu moyo uwakwiyipa sona nukubomba inyiza pantazi papako.” Po u Hezekiya akalila nkani.

⁴ Po u Mwene akamubuzya u Yesaya akati,

⁵ “Buka umubuzye u Hezekiya ukuti u Mwene, u Chala uwa munyenya wako u Devedi akuti, ‘Nivwa ulwiputo lwako sona naghennya amasozi ghako, nkwiza pakukonjelezya amaka 15 mubumi bwako.

⁶ Nkwiza pakukupoka awe poka nakaya akakulu nkani munyobe izya mwene wamu Asiliya. Nkwiza pakukazighilila akaya akakulu nkani aka.

⁷ “ ‘Ichi cho chimanyilo icha Mwene kukwako ukuti akwiza pakubomba zizyo akafinga:

⁸ Nkwiza pakupela umuzyezye pakunyokela kwisinda aka 10 pachakupimila icha Ahazi.’ ” Po umuzyezye ukanyokela aka 10 mwisinda.

⁹ Ulwimbo ulwa mapalo ulwa mwene u Hezekiya uwamu Yuda bo apola kububine.

¹⁰ Nkati, “Mukasikasi mubumi bwane, nkimba imbaghiye pakwinjila kubuzilo ubwa bufwe? Nkimba ningikala mwipumpa amaka ghane ghosi?”

¹¹ Po nkati, “Ntakwiza pakumwennya sona u Mwene, bo inchili indi muchisu icha bantu abumi, ntakwiza pakubennya sona abamanyani bane, pamo abantu babo bakwikala muchisu ichapasi.

¹² Ubumi bwane bwefiweko kukwane, ngati chisakasa icha mudimi ni mpepo iyakukuka, bwadumuliwa ngati mumo uwakuluka akudumulila amenda ghane, yipankuliwe nukufyuliwako kukwane. Umwalubilolubilo ubumi bwane bukamala.

¹³ Po nkalindilila chimyemye bulo busiku bosi, ukapyola bulo amafupa ghane ngati nkalamu iyazala, pamusanya na pabusiku ukabumalizya ubumi bwane.

¹⁴ Izyu lyane likaghanda sona likaba lidedebazu, nkalila ngati nkunda. Amaso ghane ghakalita pakwennya kumwanya ukuti indabe ubwavilizi. Wee Mwene indi muntamyo, unyavwe!”

¹⁵ Nkimba ninga nena ichoni? Pakuti umwenecho u Mwene weyuyo angwisizizye ububine bunubu. Nkwiza pakuyimba mubumi bwane bosi, pachifukwa icha bubavu ubwa moyo wane.

¹⁶ Mwene, abantu bakuba nubumi chifukwa icha zinizi, unyosezyemo umoyo uwa muzimu wane. Sona nyosezyamo ubumi bwane, ukuti imbanje nubumi.

¹⁷ Ichifukwa chicho nkivwanga ububavu chakuti, nivwanje akiza. Pakuti wampoka kubufwe, nukuhobokela imbibi zyane zyosi.

¹⁸ Pakuti ipumpa litangakupala awe, ubufwe bope butangakupala, babo bakwinjila pasi muchibwina, batangabusubila ubwanaloli bwako.

¹⁹ Abumi, bo babo bakukupala awe, ngati mumo nkubombela ilelo, abatata bakubabuzya abana babo, nizya busubiliwa bwako.

²⁰ U Mwene akwiza pakumpoka, sona tukwiza pakwimba ni vinanda mumasiku, aghabumi bwitu bosi mu Nyumba iya Mwene.

²¹ Po u Yesaya akati, “Pula ivikomwa vimo ivya makuyu nukubika pachilonda, po ukwiza pakupola.”

²² U Hezekiya akalalusya akati, “Nkimba chikwiza pakuba chimanyilo choni ukuti nkwiza pakubuka ku Nyumba iya Mwene?”