Yesaya 37 - IBAYIBOLO 2024

U Hezekiya akulaba amahala kwa Yesaya

¹ Bo u mwene u Hezekiya ivwa zinizi, akazepula amenda ghache nukuvwala amasaka pachifukwa icha chitima nukubuka mu Nyumba iya Mwene.

² Akamutuma u Eliyakimu usongo uwa kunyumba iya bumwene nu Shebina umusimbi, sona na baputi abasongo, ku mulaghuzi u Yesaya umwana uwa Amozi, bosi bo bavwalite amasaka pachifukwa icha chitima.

³ Bakamubuzya u Yesaya bakati, “Izi zyo zizyo u Hezekiya anena ukuti, isiku ili lisiku ilya ntamyo, ilya kuchemeliwa nukukoziwa isoni ngati bo bana bafika pakabalilo kakupapiwa loli amaka aghakubapapila naghamo.

⁴ Lumo zingaba ukuti u Mwene u Chala winyu akwiza pakwivwa amazyu agha songo uwa basilikali yuyo mulongozi wache, u mwene wamu Asiliya, abatuma pakumusamula u Chala umumi, sona akwiza pakumuchemela pachifukwa icha mazyu ghagho u Mwene u Chala winyu ivuye. Polelo mubiputilaye abakusyalako babo bachili bumi.”

⁵ Bo amakambala agha mwene u Hezekiya ghiza kwa Yesaya,

⁶ u Yesaya akababuzya akati, “Mumubuzye u mwene winyu ukuti, ‘U Mwene ati, mutakanyilaye pazizyo mwivuye ku babombi abamwene aba mu Asiliya pamazyu ghagho bansamuye nagho.

⁷ Teghelezya! Nkwiza pakubika umuzimu mumwache umwakuti nanti ivwa bulo ipangwi limo, akwiza pakunyokela kuchisu chache sona nkwiza pakumughogha nupanga.’ ”

Aba Asiliya bakuchoghofya sona ichisu icha Yuda

⁸ Bo usongo uwa basilikali ivwa ukuti u mwene uwamu Asiliya epamo mu Lakishi, akaleka pakulwa ubwite nakaya akakulu nkani aka Libina.

⁹ U mwene wamu Asiliya akivwa ukuti u mwene u Tilihaka wamu Etiyopiya akwiza poka na basilikali bache pakulwa nawe ubwite. Bo ivwa zinizi akatuma sona intumi kwa Hezekiya na mazyu aghakuti,

¹⁰ “Mumubuzye u Hezekiya u mwene uwa muchisu icha Yuda ukuti u chala yuyo umusubiye atakakuzimbulaye ukuti, ‘U Yelusalemu atakwiza pakubikiwa munyobe izya mwene uwamu Asiliya.’

¹¹ Naloli wivuye mumo abamwene aba mu Asiliya bavibombeye ivyisu vyosi, pakuvinanganizizya zila. Nkimba awe ungapona?

¹² Nkimba abachala aba inko, babo abanyenya bane bakabanangannya bakabapoka munyobe zyane? Abachala aba Gozani naba Halani naba Lezefu sona na bantu aba mu Edeni, babo bakaba mu Teli Asali?

¹³ Nkimba ali kokwiyi u mwene wamu Hamati nuwa mu Alipadi nu mwene uwa mukaya akakulu nkani aka Sefalivayimu pamo wamu Hena pamo wamu Iva?”

Ulwiputo ulwa Hezekiya

¹⁴ U Hezekiya akapokela ukalata yula kuntumi zila nukumubelenga. Po akabuka ku Nyumba iya Mwene nukumuzungulula pantazi pa Mwene.

¹⁵ U Hezekiya akiputa kwa Mwene akati,

¹⁶ “Wee Mwene Uwamaka Ghosi, u Chala uwa Izilayeli wewe ukwikala pabakelubi, wewe Chala we mwene mpela pabumwene bosi ubwa pachisu ichapasi. Ukapela ichisu ichakumwanya ni chapasi.

¹⁷ Wee Mwene tegha ikutu lyako, wivwe, wee Mwene ighula amaso ghako, po wennye sona teghelezya amazyu ghosi agha Senakelibu ghagho atuma pakukusamula awe we Chala umumi.

¹⁸ “Wee Mwene, zyanaloli ukuti abamwene aba mu Asiliya babananganizye abantu bosi poka ni vyisu vyabo.

¹⁹ Babasumbila abachala babo mumoto nukubanangannya, pakuti batakaba bo bachala, loli bakaba bo bachala abamakwi na bamabwe, babo bakapangiwa ni nyobe izya bantu.

²⁰ Po ilelo, wee Mwene Chala witu, tupoke munyobe zyache, umwakuti ubumwene bosi muchisu ichapasi bumanye ukuti awe wemwene we Mwene, we Chala.”

U Mwene akwamula ulwiputo ulwa Hezekiya

²¹ Po u Yesaya umwana uwa Amozi akamutumila u Hezekiya amazyu aghakuti, “U Mwene u Chala uwa Izilayeli akuti: Pachifukwa ichakuti wiputa kukwane ukuyana nizya Senakelibu u mwene wamu Asiliya,

²² agha gho mazyu ghagho u Mwene akamubuzya umwakususannya nawe akati, Abantu aba mu Ziyoni, bakukusamula nukukobezya. Abantu aba mu Yelusalemu bakupukunnya imutu yabo bo ukuchimbila.

²³ Nkimba wewenu yuyo ukumutuka nukumusamula? Nkimba wewenu yuyo ukumukwezezya izyu, nukwinusya amaso ghako umwakwituvya? Ku Muzelu uwa Izilayeli!

²⁴ Wazituma intumi zyako pakumutuka u Mwene, sona ukuti, ‘Ningolo zyane inyinji nakwela pamwanya pamaghamba, pamwanya nkani pakasonga aka Lebanoni, nadumula amakwi ghache amatali agha mwale, sona nagha payini amiza. Nafika kuvigaba ivya mulubazu ulwa pakasonga aka mumisutu umwiza nkani.

²⁵ Nakumba iviziba muvyisu iviyeni, nukung'wela amizi mulamula nazikamula isoko zyosi izya mu Ijiputi ni nyayo zyane.’

²⁶ “Nkimba utivuyepo? Kale nkavyimika, mumasiku aghakale nkavyinong'onagha, ilelo navikwanilisya ukuti watupela utwaya utukulu nkani, pakuba malinga muvibunga ivya mabwe.

²⁷ Abantu babo, amaka ghakamala, bavulungana nukukoziwa isoni. Bali ngati mbeyu izya mumughunda, sona ngati tumelwa ututeta, ngati lisote lilyo lyamela pachisonje, likubabuka bo lichili pakukula.

²⁸ “Loli imenyeko kuko ukwikala, bo ukwiza nukubuka, sona namumo ukunkalalila.

²⁹ Pachifukwa ichakuti wankalalila nukunsamula, nkwiza pakubika akasikulo kane mumpuno yako, sona nukwinjizya ichela mumulomo wako, nkwiza pakukunyosezya muzila yiyo ukafumila.

³⁰ “Wee Hezekiya, chinichi chikwiza pakuba chimanyilo kukwako, mumwaka ghunughu ukwiza pakulya vivyo vikumela vyene, mumwaka uwabubili ukwiza pakulya ingano. Loli mumwaka wabutatu ukwiza pakubyala nukwinula, nukubyala amampesya nukwinula ivikomwa vyache.

³¹ Abamunyumba iya Yuda abakusyalako bakwiza pakumela amagululuzi nukwela ivikomwa.

³² Pakuti mu Yelusalemu momumo mukwiza pakufuma abakusyalako, sona abakupona bakwiza pakufuma kwighamba ilya Ziyoni. Ulweke ulwa Mwene Uwamaka Ghosi lo lukwiza pakuzibomba zinizi.

³³ “Polelo izi zyo zizyo u Mwene akunena ukuyana nizya mwene wamu Asiliya akuti, Atakwiza pakwinjila mukaya akakulu nkani, pamo pakulasamo akalasilo nakamokamo. Nayumoyumo umusilikali yuyo ali ni ngulu akwiza pakupalamila mukaya kala, pamo ukuzengapo amakwelelo.

³⁴ Izila yiyo akizila yo yiyo akwiza pakunyokela, sona atakwiza pakwinjila mukaya akakulu nkani.” U Mwene anena.

³⁵ “Nkwiza pakukazighilila akaya akakulu nkani aka nukukapoka, pachifukwa chanene, sona na pachifukwa icha mubombi wane u Devedi!”

³⁶ Po uwantumi uwa Mwene akabuka muvisakasa ivya ba Asiliya nukubaghogha abalwabwite 185,000. Bo abantu balamusya bulo pandabindabi bakagha ukuti imivimba yilambalaye!

³⁷ Po u mwene u Senakelibu uwamu Asiliya akanyokela ku Ninive nukwikala kulakula.

³⁸ Isiku limo, bo akwiputa munyumba iya chala wache u Nisiloki, abana bache abalumendo u Adilameleki nu Shalazeli bakamughogha nupanga, po bakachimbilila kuchisu icha Alalati. Umwana wache u Esalihadoni akamupyana pakuba we mwene.