Yesaya 36 - IBAYIBOLO 2024

Aba Siliya bakuboghofya abantu aba mu Yelusalemu

¹ Mumwaka uwa 14 bo u mwene Hezekiya akulaghila, u mwene u Senakelibu uwamu Asiliya akiza pakulwa ubwite nutwaya tosi utukulu nkani utwa malinga utwa mu Yuda nukutufyula.

² Po u mwene uwamu Asiliya akamutuma usongo uwa basilikali poka ni chilundilo icha basilikali ukufuma ku Lakishi ukuti abuke kwa mwene u Hezekiya mu Yelusalemu. Usongo uwa basilikali yula akimilila papipi ni mpindulila iya mizi ghagho ghafumite ku chiziba ichakumitu, mumusebo uwakubukila kumughunda uwa muntu yuyo akuchapa amenda,

³ Eliyakimu umwana uwa Hilikiya umulongozi uwa munyumba iya bumwene nu Shebina umusimbi sona nu Yowa umwana uwa Asafu umusungi uwa mabuku agha mbili bakabuka kukwache.

⁴ Usongo uwa basilikali akababuzya akati, “Mumubuzye u Hezekiya ukuti, u mwene usongo nkani, u mwene uwamu Asiliya akuti, ‘Nkimba usubiye ichoni?’

⁵ Nkimba mukwinong'ona ukuti amazyu ghene ghayanite na mahala, sona na maka aghakulwila ubwite? Nkimba wewenu yuyo mumusubiye ukuti munsambukile?

⁶ Ennya ilelo, uchili ukubasubila aba Ijiputi pakukwavwa awe babo bali ngati lutete lulo umuntu akwendela, lulo lungapyoka nukuyilasa inyobe yako. Momumo abeleye u mwene u Falabo ku babo bakumusubila.

⁷ Nanti mukumbuzya ukuti, ‘Tumusubaliye u Mwene u Chala witu.’ Nkimba ate weyuyo ubuzilo bwache ubwapamwanya ni vighemo u Hezekiya akavimongolannya, nukubabuzya aba muchisu icha Yuda nicha Yelusalemu ukuti, ‘Mwiputilaye pantazi pachighemo ichi’?

⁸ “Ilelo zagha, twitinkane nu mwene wane uwamu Asiliya. Nkwiza pakubapa ifalasi 2,000 nanti mungaba nabendezi!

⁹ Po nkimba mungamunyosekezya bulibuli mwisinda weka uwa banandi babo bali mukasi mubabomba mbombo aba makambala agha mwene wane, napapo bakusubila aba Ijiputi ningolo nabendezya ifalasi?

¹⁰ Nkimba mutazimenye ukuti ane ntumiwe kuno nu bwighane ubwa Mwene pakuchinangannya ichisu ichi? U Mwene umwenecho akambuzya ane ukuti indwane nacho nukuchinangannya ichisu.”

¹¹ Po u Eliyakimu nu Shebina sona nu Yowa bakamubuzya usongo uwa basilikali yula bakati, “Twalamba nena nababombi bako mu Chialamu, pakuti cho chicho tukuchivwa. Utakanenaye naswe mu Chihebeli pachifukwa ichakuti abantu bosi babo bali pilinga bakwivwa.”

¹² Loli usongo uwa basilikali akamula akati, “Nkimba u mwene wane atakantuma pakunena amazyu agha kwa mwene winyu na kukwinyu? Awe, loli antuma ukuti imbabuzye abantu babo bikaye pilinga, pakuti bope bakwiza pakulya nukung'wela ivinyazu vyabo namantuzi ghabo?”

¹³ Po usongo uwa basilikali akimilila nukukolomoka mu Chihebeli nukuti, “Ivwa amazyu agha mwene usongo nkani, u mwene uwamu Asiliya!

¹⁴ Izi zyo zizyo u mwene akunena akuti, u Hezekiya atakabazimbulaye. Pakuti atangabapoka!

¹⁵ Mutakitikizye ukuti u Hezekiya abadebaye pakumusubila u Mwene bo akuti, ‘Naloli u Mwene akwiza pakutupoka. Akaya akakulu nkani aka katakwiza pakubikiwa munyobe izya mwene uwamu Asiliya.’

¹⁶ “Mutakamuteghelezyanje u Hezekiya. Izi zyo zyizyo u mwene uwamu Asiliya akunena akuti, ‘Twitinkane ukuti pabe umutende pakasi pa amwe naswe. Po umuntu wesi uwa amwe akwiza pakulya ivikomwa ivya ikwi lyache ilya mampesya nilya chikuyu nukung'wela amizi aghakufuma muntamba iya mizi iyache ni yache.

¹⁷ Mupaka pakabalilo kako nkwizila pakubasendela kuchisu chicho chiyanite bulo ni chisu chinyu, ichisu ichavyakulya ivyinji nicha vinyo umupya, ichisu icha ngano sona nicha mampesya.’

¹⁸ “Muchebaye u Hezekiya atakabasobezyanje bo akuti, ‘U Mwene akwiza pakutupoka.’ Nkimba alipo uchala uwa inko izinji yuyo achipokitepo lumo ichisu chache munyobe izya mwene wamu Asiliya?

¹⁹ Nkimba bali ko kwiyi abachala aba mu Hamati nu Alipadi? Bali ko kwiyi abachala aba mu Sefalivayimu? Nkimba bamupokite u Samaliya munyobe zyane?

²⁰ Nkimba chala wenu pakasi pabachala bosi yuyo achipokitepo lumo ichisu munyobe yane? Po nkimba u Mwene angamupoka bulibuli u Yelusalemu munyobe yane?”

²¹ Loli abantu bakaba bulo myee, sona batakamulapo nachimochimo, pachifukwa ichakuti u mwene u Hezekiya akabalamula akati, “Mutakamwamule.”

²² Po u Eliyakimu umwana uwa Hilikiya umulongozi uwa munyumba iya bumwene nu Shebina umusimbi, sona nu Yowa umwana uwa Asafu umusungi uwa mabuku agha mbili, bakabuka kwa Hezekiya, na menda amazepuke, nukumubuzya zizyo usongo uwa basilikali akanena.