Yesaya 35 - IBAYIBOLO 2024

Umusebo uwa buzelu

¹ Inkolongo ni chisu ichumizu vikwiza pakuhoboka, umusitu ghukwiza pakusekela nukulama ngati bwezya.

² Chikwiza pakubazya ubwezya ubwinji, chikwiza pakusekela nkani, sona chikwiza pakuhoboka nukwimba. Ubuchindamu ubwa Lebanoni bukwiza pakupeghiwa kukwache, ichisu icha Kalimeli nu Shaloni, vikwiza pakwennya ubuchindamu ubwa Mwene, nu bukulu ubwa Chala witu.

³ Muzikazyanje inyobe idedebazu, sona mubapanje amaka abantu babo ivimpevu vyabo vikutetema,

⁴ Mubabuzye abantu aba moyo amogha muti, “Mubanje mwe bajivu, mutakanyilaye, u Chala winyu akwiza pakubatanizya, nukubafunda abalwani binyu po akwiza pakubapoka.”

⁵ Abafwamaso bakwiza pakwennya, sona abamapuli bakwiza pakwivwa.

⁶ Umulemazu akwiza pakunyela ngati mbabala, ululimi ulwa chinunu lukwiza pakukolomoka umwalusekelo. Pakuti imbwibwi zikwiza pakwighuka munkolongo, tope utusoko tukwiza pakwenda munkolongo.

⁷ Umusesenga uwa kocha ghukwiza pakuba chiziba, po ichisu ichumizu chikwiza pakuba ni mbwibwi. Mubuzilo ubwa bakambwe, mukwiza pakumela isote ni ntete.

⁸ Kulakula kukwiza pakubako umusebo, ghugho ghukwiza pakwitiziwa ukuti, “Umusebo Umuzelu.” Ababomba mbibi batakwiza pakwendamo, abapunganu batakwiza pakupulumpilamo.

⁹ Mutakwiza pakubamo inkalamu, pamo ichinyamana ichikali chitakwiza pakwendamo, vitakwiza pakwaghiwamo mulamula, loli bene babo bapokiwe, bo babo bakwiza pakwendaghamo.

¹⁰ Abapokiwa aba Mwene bakwiza pakunyokela, bakwiza pakwinjila mu Ziyoni bo bakwimba inyimbo, nulusekelo ulwa bwila na bwila, lukwiza pakubonekagha pa vyeni vyabo. Bakwiza pakuhoboka nukusekela nkani, po ichitima nukufwifwitila vikwiza pakumala.