Yesaya 34 - IBAYIBOLO 2024

U Chala akubafunda abalwani bache

¹ Mwee inko, palamila ukuti mwivwe, mwee inko izya bantu teghelezya! Leka ichisu chivwe, navyosi vivyo vili mumo, ni chisu chosi ichapasi, sona navyosi vivyo vikufuma mulamula!

² U Mwene azikalaliye inko zyosi, ubukali bwache buli pavilundilo vyosi ivya bwite. Akwiza pakubanangannya nkani, umwakuti baghoghiwanje.

³ Imivimba yabo yikwiza pakutaghiwa kuzi, sona yikwiza pakununka nkani, po amaghamba ghakwiza pakwizula nibanda lyabo.

⁴ Izuba nu mwezi sona ni ntondwa vikwiza pakusunguluka, kumwanya kukwiza pakunnyengiwa ngati libuku, intondwa zyosi izya kumwanya zikwiza pakulaghala, ngati mani agha mampesya, ngati mumo amani ghakulaghalila kwikwi ilya chikuyu.

⁵ U Mwene akuti, “Upanga wane ang'wela ivyakung'wela vyache kumwanya, ennya, akwika nu bulongi pachisu icha Edomu, pabantu babo nabanangannya.”

⁶ U panga uwa Mwene oghite mwibanda, ali mafuta ghene agha mwana uwa ng'ozi nagha mbuzi, amafuta agha figho agha dubi. Pakuti u Mwene abika ichakwiyipa mukaya akakulu nkani aka Bozila, sona baghoghiwa abantu abinji nkani muchisu icha Edomu.

⁷ Imbogho zikwiza pakuwila poka nabo, po utunkambaku ni nkambaku inkulu nkani. Ichisu chabo chikwiza pakunyeka ni banda, po ulufumbi lwikwiza pakutonta na mafuta.

⁸ Pakuti u Mwene ali ni siku ilya kutanizizya abalwani bache, umwaka uwakubafunda, pachifukwa icha kaya aka Ziyoni.

⁹ Utusoko utwa muchisu icha Edomu tukwiza pakuba nkanta, ulufumbi lwache lukwiza pakuba we sulufule, ichisu chache chikwiza pakuba nkanta zizyo zikwaka umoto!

¹⁰ Ghutakwiza pakuzima pabusiku na pamusanya, ilyosi lyache likwiza pakukwela mumwanya bwila na bwila. Inkulilo ni nkulilo yikwiza pakuba visami, atalipo nayumoyumo yuyo akwiza pakwendamo sona.

¹¹ Umpughulu nu chipungu vyo vivyo vikwiza pakwikalaghamo, umpughulu umukulu nkani nu chigobe, vikwiza pakuluka ivivumbo mulamula. U Chala akwiza pakugholosya pamwanya pa Edomu, ulukusa ulwa kupimila ulwakuvulungannya, sona nukuchinangannya ichisu chilachila.

¹² Kulakula abasongo batakwiza pakuba bo babo bene, amakambala ghache ghakwiza pakuzyebeluka bulo.

¹³ Amivwa ni ntolovu vikwiza pakumela munyumba izya bumwene, ukabeya na mivwa vikwiza pakumela mumalinga ghache. Kakwiza pakuba nyumba iya bakambwe naba mpughulu.

¹⁴ Ivinyamana ivya munkolongo vikwiza pakukomana nabalabwe, po ivinyamana ivyamuzi vikwiza pakwitizannya vyenevyene, yope imizimu imibibi iyabusiku yikwiza pakwamula, nukwilondela ubuzilo ubwa kutuzizyapo.

¹⁵ Kulakula u mpughulu akwiza pakuluka ichivumbo nukutela amafumbi, akwiza pakubalula nukutusungilila utwana twache muvipapande vyache, sona amabimba ghope ghakwiza pakubungana kulakula mabilimabili.

¹⁶ Ennya nukubelenga mwibuku ilya Mwene: Patalipo nayumoyumo yuyo akwiza pakusobela, sona patalipo nayumoyumo yuyo akwiza pakusobelwa ukwenda nawe. Pakuti gho mulomo wache ghugho walamula, sona u Muzimu wache ghukwiza pakuvibungannya poka.

¹⁷ We Mwene yuyo alonda pakugaba ichisu, ninyobe yache akugaba nulukusa ulwakupimila. Chikwiza pakuba chabo bwila na bwila, sona bakwiza pakwikala mulamula inkulilo ni nkulilo.