Yesaya 33 - IBAYIBOLO 2024

Ulwiputo ulwa kulaba ubwavwilizi

¹ Chighune kukwako we mughoghi, we utananganikitepo! Wee muzimbuli, chighune kukwako, nayumo yuyo atakuzimbuyepo nalumo. Nanti wamalizya pakunangannya, nawe bakwiza pakukunangannya, nanti waleka ubuzimbuli, nawe bakwiza pakukubombela izya buzimbuli.

² Wee Mwene, utupelele ichisa, tukusubiye wewe, ubanje we maka ghitu indabindabi yosi, sona nu bupoki pakabalilo akantamyo.

³ Ukujilimisya ukwa izyu lyako, inko zikuchimbila, bo ukuvundumuka, inko zikunyampana.

⁴ Po ivyakufyula vikabunganikiwa ngati we kanta, ngati bwinji ubwa kanta momumo abantu bakunyelela pavyakufyula.

⁵ U Mwene akweziwanje, pakuti akwikala kumwanya, akwiza pakwizuzya akaya aka Ziyoni, nu bwanaloli sona nu bugholosu.

⁶ Akwiza pakuba lwalo ulwa naloli mutubalilo twako, akwiza pakubapoka nukubapa amahala nu bumanyi, ukumunyila u Mwene bo bukabi bwako.

⁷ Ennya, abasilikali abajivu bakukolomoka mumisebo, intumi izya mutende zikulila nkani.

⁸ Mumisebo imikulu muli bulo myee, nayumo umuntu uwakwendamo. Ulufingo lwananganika, abakaboni bache basamuliwa, atalipo nayumo yuyo achindikiwe.

⁹ Ichisu chikulila sona chikunanganika, umusitu uwa Lebanoni ghukufoka, u Shaloni ali ngati we Alaba, ichisu icha Bashani ni cha Kalimeli vikulaghazya amani ghabo.

¹⁰ U Mwene akuti, “Ilelo nkwiza pakunyamuka, ilelo nkwiza pakupaliwa sona ilelo nkwiza pakukweziwa.

¹¹ Amwe mukwinong'ona izya mwalwemwalwe, po zyosi zizyo mukubomba zyabupunganu, umuyi winyu ghuli ngati moto ghugho ghukubalungulizya.

¹² Abantu bakwiza pakochiwa nukuba litoyi, ngati mivwa ghagho ghadumuliwa nukusumbiwa pamoto.

¹³ Amwe mwe muli kubutali, ivwa zizyo nabomba, amwe mwe muli papipi, mughamanye amaka ghane!”

¹⁴ Ababomba mbibi mukaya akakulu nkani aka Ziyoni bakutetema, ubogha bwabalema babo batakumuchindika u Chala, “Nkimba wewenu uwa aswe angikala mumoto uwakulungulizya? Fwandi wewenu uwa aswe angikala mumoto uwakwaka bwila na bwila?”

¹⁵ Yuyo akwenda mubugholosu, nukunena ubwanaloli, yuyo akukana pakubazimbula abapina nukukana amabeko, sona nukwighalila amakutu ghache, ukuti ghaleke pakwivwa nizya bughoghi, nukwighalila amaso ghache, ukuti ghaleke pakwennya ububibi

¹⁶ umuntu yunuyu akwiza pakwikala pamwanya, ubuzilo bwabo ubwakuponelamo, bukwiza pakuba lilinga ilya lighamba, akwiza pakupokela ichakulya, sona atakwiza pakusobelwapo amizi.

¹⁷ Amaso ghako ghakwiza pakumwennya u mwene bo akuboneka akiza, nukuchennya ichisu chikukuzuliwa kubutali.

¹⁸ Munyinong'ono zyako ukwiza pakwinong'onelagha chicho chakoghofya, “Nkimba lili ko kwiyi ikambala? Nkimba ali ko kwiyi umusonkezya umusonko? Nkimba ali ko kwiyi usongo wabasilikali?”

¹⁹ Mutakwiza pakubennya nalumo abantu banaba, abantu babo bakunena ineno yiyo yitakwivwika.

²⁰ Ennya mukaya akakulu nkani aka Ziyoni, akaya akalusekelo lwitu, Amaso ghinyu ghakwiza pakumwennya u Yelusalemu, ubuzilo ubwakwikalamo mumo muli umutende, ichisakasa chicho chitakwiza pakunyunkuliwapo, pamo inkusa ukudumuka.

²¹ Palapala u Mwene akwiza pakuba Wamaka witu. Akwiza pakwikala musoko sona na mutusoko. Mumo amabwato agha kuvigha ghatakwiza pakwendamo, ghope amabwato amakulu nkani ghatakwiza pakwendaghamo.

²² Pakuti u Mwene we mulongi witu, u Mwene we akutupa indaghilo, u Mwene we mwene witu, weyuyo akwiza pakutupoka.

²³ Inkusa izya bwato ubukulu zyasatuka, zitangalikazya ikwi ilya kupinyilila, ku bwato ubukulu ukuti bukale, ghope umwenda uwa bwato uwa balwani bitu ghutakuzukite akiza awe. Ivyakufyuliwa vyabo vikwiza pakuba vyinji, bope abalemazu bakwiza pakugabiliwa.

²⁴ Atalipo nayumoyumo yuyo akwikala mu Ziyoni akwiza pakunena ukuti, “Ane ne mubine” sona ni mbibi izya babo bakwikala mulamula zikwiza pakuhobokeliwa.