Yesaya 32 - IBAYIBOLO 2024

U mwene umugholosu

¹ Ennya, u mwene akwiza pakulaghila mubugholosu, sona amakambala ghache ghakwiza pakulongela mubwanaloli.

² Umuntu wesi akwiza pakuba ngati buzilo ubwa kuvwamamo kumpepo, nu buzilo ubwa kuponelamo kuvula, ngati tusoko utwa mizi munkolongo, numuzyezye uwa ilyalabwe ikulu nkani muchisu ichumizu.

³ Po amaso agha babo bakwennya ghatakwiza pakwighalika, namakutu agha babo bakwivwa bakwiza pakuteghelezya.

⁴ Inyinong'ono izya babo bakubomba lubilolubilo bakwiza pakumanya nukwivwisya, nu lulimi ulwachilita lukwiza pakunena akiza nukwivwika.

⁵ Umupunganu atakwiza pakupokela umuchizi, pamo umuntu umubibi atakwiza pakuchindikiwa.

⁶ Pakuti umupunganu akunena ivya bupunganu, akwinong'ona ukubomba ububibi bwene, Akubomba ivibibi vyene sona akumusamula u Mwene, abazala atakubapa ichakulya, babo bali ninyota atakubapa amizi aghakung'wela.

⁷ Imbombo izya muntu umubibi mbibi, akubatika imbombo imbibi, pakubanangannya abapina nu bumyasi, napapo ukulambilizya ukwa basobelwe kugholosu

⁸ Loli umuntu umuchindamu akwinong'ona ivyiza vyene, akubatika ivyiza.

Ukusokiwa ukwa bakolo aba mu Yelusalemu

⁹ Amwe mwe bakolo mwe mwifwasiye bulo, nyamuka nukunteghelezya, amwe mwebana abalindu mwe mutakupasya nachimo, teghelezya zizyo nkunena!

¹⁰ Bo pachilapo umwaka ghoka mukwiza pakutetema, mutakwiza pakwinulapo amampesya naghamoghamo, sona inyinulo iya mampesya yitakwiza pakubako.

¹¹ Tetemagha amwe mwebakolo mwemwifwasiye bulo, amwe mwe balindu mwe mutakupasya nachimo. Vula amenda ghinyu, nukuvwala amasaka mumisana ghinyu pachifukwa icha chitima.

¹² Mwikomaye pachifuba, pachifukwa icha maghunda ghinyu amiza, sona pachifukwa ichakwela ukwa mampesya,

¹³ pachifukwa icha chisu icha bantu bane, ichisu chicho chimelite amivwa ni ntolovu, lilila inyumba zyosi zizyo mumo abantu bahobokite, mukaya akakulu nkani akalusekelo.

¹⁴ Pakuti inyumba iya bumwene yikwiza pakuba chisami, akaya akakulu nkani akachongo kakwiza pakulekiwa, amalinga ni chitembe vikwiza pakunanganika bwila na bwila, impunda izya muzi zikwiza pakuba mulamula, sona ing'ozi zyope zikwiza pakulyanga isote mumo,

¹⁵ mupaka papo Umuzimu ikila papitu ukufuma kumwanya, sona ninkolongo pakuba mughunda uwamuvundo, ghope umughunda uwamuvundo ghukuboneka ngati musitu.

¹⁶ Po ubwanaloli bukwiza pakuba munkolongo, sona ubugholosu bope bukwiza pakwikala mumughunda uwa muvundo.

¹⁷ Ivikomwa ivya bugholosu vikwiza pakuba mutende, ivikomwa ivya bugholosu ko kwikala umwa myee nukufwasa bwila na bwila.

¹⁸ Abantu bane bakwiza pakwikala mubuzilo ubwa mutende, sona namunyumba izyakufwasa, munyumba izya myee na mubuzilo ubwakufwasa.

¹⁹ Ivula iya mabwe yikwiza pakutima mumusitu, sona akaya akakulu nkani kakwiza pakunanganika,

²⁰ loli mwe basayiwa mwe mukubyala imbeyu zyinyu mulubazu ulwa tusoko tosi, sona mukuzileka ing'ombe zyinyu ni mpunda ukuti zilyanje bulo.