Yesaya 31 - IBAYIBOLO 2024

U Chala akwiza pakumuvighilila u Yelusalemu

¹ Chighune ku bantu babo bakubuka kuchisu icha Ijiputi, pakulaba ubwavwilizi, babo beghamiye pafalasi, abantu babo bachisubiye ichilundilo icha bendezya ingolo, namumaka amakulu agha basilikali babo, loli batakumusubila u Muzelu uwa Izilayeli, pamo ukulonda ubwavwilizi ubwa Mwene.

² Loli u Mwene wamahala sona angiza nintamyo, atangandula amazyu ghache. Akwiza pakubasambukila babo bakubomba imbibi, nababo bakubavwa ababomba mbibi.

³ Loli aba Ijiputi bantu bulo teba Chala awe, ifalasi zyabo nyama bulo te muzimu awe. Nanti u Mwene agholosya inyobe yache, yuyo akavwa akwiza pakwipunula, yuyo avwiliziwa akwiza pakuwa pasi, bosi bakwiza pakuzimila poka.

⁴ Izi zyo zizyo u Mwene akumbuzya akuti, “Ngati mumo inkalamu pamo inkalamu inandi, yikubulumila panyama yache, po nanti akabukatila aka badimi kitiziwa pakulwana nawe, utakoghofiwa nukukolomoka kwabo, pamo ukutetema pachifukwa icha chongo chabo, pamo pate icha kumuvulungannya nachimo po u Mwene Uwamaka Ghosi, akwiza pakulwa ubwite Pighamba ilya Ziyoni.

⁵ Ngati mumo utuyuni tukubulukila mumwanya, momumo u Mwene Uwamaka Ghosi, akwiza pakumuvighilila u Yelusalemu, akwiza pakumuvighilila nukumupoka, akwiza pakumusungilila nukumutabula.”

⁶ Mwee ba Izilayeli nyokela kukwache yuyo mumusamubukiye.

⁷ Pakuti mwisiku lila wesi uwa amwe akwiza pakuvikana ivifwani ivya siliva nu golide, vivyo mukapanga ni nyobe zyinyu izya mbibi.

⁸ “Po aba Asiliya bakwiza pakughoghiwa nupanga, yuyo ate wamuntu awe, te wepanga uwa muntu yuyo akwiza pakubamala, bakwiza pakuchimbila kubwite, po abalumendo babo bakwiza pakuba bazya.

⁹ Ilinga lyabo likwiza pakuwa pachifukwa icha bogha ubukulu nkani, bakwiza pakuyileka indembela yabo palapala.” Momumo u Mwene akunenela, yuyo umoto wache ghuli mu Ziyoni, yuyo umuvuno wache ghuli mu Yelusalemu.