Yesaya 30 - IBAYIBOLO 2024

Ubupunganu pakusubila aba Ijiputi

¹ U Mwene akuti, “Chighune ku bantu babo basambuke, abantu babo bakubatika ivintu vivyo te vyane, po bakufinga ulufingo lulo lute lwa Muzimu wane awe, bakulundika imbibi pa mbibi.

² Bakubuka ku Ijiputi bo batambuzikizizye, nukulonda ubwavwilizi kwa Falabo, bakulonda ubuvighilili sona nu buzilo ubwakuponelako ku Ijiputi.

³ Loli ubuvighilili ubwa Falabo bukwiza pakuba soni kukwinyu, buzilo ubwakuponelako ku Ijiputi bukwiza pakuba musamu.

⁴ Napapo bali na makambala mukaya akakulu nkani aka Zowani, sona intumi zyabo zyafika mu Hanesi,

⁵ Umuntu wesi akwiza pakuba ni soni, pachifukwa icha bantu babo bate ni mbombo nayimoyimo, babo bate nu bwavwilizi pamo ubwiza bumo, loli bali soni zyene nu musamu.”

⁶ Agha gho mazyu aghabulaghuzi ghagho ghakunena nizya vinyamana ivya munkolongo iya Negebu, muchisu icha ntamyo nicha mayimba, ichisu icha nkalamu inyanavuli ninkolo zizyo zikubuluma, uchipili ni nyivwila, intumi zikanyamula ubukabi bwabo panyuma pampunda inyanavuli, sona bakanyamula ivyuma vyabo panyuma pangamila, ukubuka navyo ku luko ulwa bantu babo batangabavwa,

⁷ pachifukwa ichakuti ubwavwilizi ubwa Ijiputi bute nimbombo nayimoyimo, Polelo namwita ukuti we Lahabu yuyo akwiyikalila bulo.

⁸ Ilelo buka nukusimba apakusimbapo, uzisimbe mwibuku, umwakuti zibanjeko bwila na bwila.

⁹ Banaba bo bantu abakusambuka abana abamyasi, abana babo batakulonda pakuteghelezya ivimanyisyo ivya Mwene.

¹⁰ Bakunena kubenelezi ukuti, “Leka pakwennya ivisetuka!” Sona bakubabuzya abalaghuzi bakuti, “Mutakatubuzyanje ivisetuka ivya bugholosu! Loli mutubuzye zizyo tukuzilonda, nukulaghula izya bumyasi.

¹¹ Muyileke izila iyi, pakupaghukila mulubazu, leka pakutubuzya izya Umuzelu uwa Izilayeli!”

¹² Polelo, izi zyo zizyo akunena, Umuzelu uwa Izilayeli akuti, “Pachifukwa ichakuti mwaghakana amazyu agha, mukusubila pakubayivya abantu nu bumyasi,

¹³ imbibi iyi yikwiza pakukuwila ngati lubumba ulutali, lulo luzepukite sona lufumiye nakuzi luli papipi pakuwa.

¹⁴ Po akazepukile kache kali ngati kufwantika ukwa sonta, yiyo yikafwantika akabibi, katakwiza pakwaghiwapo akamenyu kamo akakupalila umoto, pamo akakusembela amizi muchiziba.”

¹⁵ Izi zyo zizyo U Mwene Uwamaka Ghosi Umuzelu uwa Izilayeli akuti, “Nanti mukupinduka nukuba myee mukwiza pakupokiwa, ukuba myee kwinyu nu lusubilo lwinyu gho maka ghinyu, loli amwe mutakalonda awe.

¹⁶ Mukanena mukati, ‘Awe, tukwiza pakuchimbila pafalasi.’ Polelo babo bakubachimbizya, bope bakwiza pakuchimbila umwalubilolubilo ukubachila!

¹⁷ Ukoghofya ukwa muntu weka kukwiza pakuchimbizya abantu 1,000 napapo babe fayivi bulo pope mukwiza pakuchimbila, mupaka babaleke ngati likwi ilyakupayikapo indembela pamwanya pighamba, ngati chimanyilo patughamba.”

¹⁸ Pachifukwa chinichi u Mwene akubalindilila ukuti abapelelaye ichisa, akunyamuka nukubalanjizya ichililizi pakuti u Mwene we Chala uwanaloli. Basayiwa bosi babo bakumulindilila!

¹⁹ Mwee bantu aba mu Ziyoni, mwe mukwikala mu Yelusalemu, mutakwiza pakulila sona. Naloli u Mwene akwiza pakuba ni chisa namwe pakwivwa ukulila kwinyu ukuti abavwe! Bo ivwa bulo umwalubilolubilo akwiza pakubamula.

²⁰ Napapo u Mwene angabinjizya muntamyo, akwiza pakwikala kunuko abamanyisi binyu batakwiza pakuvwama sona, namaso ghinyu mukwiza pakubennya.

²¹ Napapo mungaghalabukila kundilo pamo kumongo, amakutu ghinyu ghakwiza pakwivwa izyu ukufuma kwisinda kwinyu, likuti, “Iyi yo zila; endagha mumo.”

²² Po mukwiza pakuvinyazya ivifwani vyinyu vivyo muvipakite usiliva navivyo mukavipaka nu golide mukwiza pakuvitagha ngati vintu ivinyazu nukunena ukuti, “Epapo!”

²³ Akwiza pakubatumila ivula iyakumezya imbeyu zizyo mubyalite, mukwiza pakuba nivyakulya vivyo seke izya mwitope ivyiza sona ivyinji. Mwisiku lilalila ing'ombe zyinyu zikwiza pakulya mubuzilo ubukulu nkani.

²⁴ Po ing'ombe izyakulima ni mpunda inyanavuli zikwiza pakulya ivyakulya ivya mbeya vivyo vyapetiwa nichakupetela u foloko ni fosholo.

²⁵ Pisiku lilalila ilya kughoghiwa ukukulu nkani, bo ivitembe vikuwa, utusoko utwa mizi tukwiza pakwendagha pamwanya pighamba lyosi napatughamba tosi.

²⁶ Umwezi ghukwiza pakulama ngati lizuba, ukulama kwizuba kukwiza pakulama amasiku seveni, ngati kulama ukwa masiku ghosi seveni, bo u Mwene akubapinya ivilonda abantu bache nukubapozya mumo bavulala.

Aba Asiliya bakwiza pakufundiwa

²⁷ Ennya, itabwa ilya Mwene likwiza ukufumila kubutali, nu bukali bwache ubwakwaka namabingu aghilyosi, imilomo yache yizuye nu bukali nu lulimi lwache ulwa moto uwakulungulizya.

²⁸ Umuyi wache ghuli ngati kasoko kako kizuye nkani, sona nakakubukizya. Akwiza pakusekesa inko ni chisekeselo ichakunangannya, akubika ichela munjegho ivya bantu nukumazya imbibi zyosi zizyo zikubasovya.

²⁹ Loli amwe mwe bantu aba Chala, mukwiza pakwimba inyimbo, ngati mumo bakubombela pabusiku, palusekelo ulupaghuliwa, amoyo ghinyu ghakwiza pakusekela, bo abantu bakubuka kwighamba ilya Mwene, na malonji kwi lyalabwe ilya Izilayeli.

³⁰ U Mwene akwiza pakubapela ukuti abantu bivwe, izyu lyache ilya maka, sona nukubapela ukuti bennye inyobe yache yikwikila, nu bukali ubwakoghofya numoto uwakulungulizya, nukupunta ukwa mabingu, nukupaya sona nivula iya mabwe.

³¹ Aba Asiliya bakwiza pakoghofiwa, nizyu ilya Mwene, nindisa yache bakwiza pakukomiwa.

³² Bo u Mwene akubakoma ni ndisa iya lufundo, lulo abika papabo, abantu bache bakwiza pakusekela, bo ivisekeseke ni vinanda vikulila. U Chala umwenecho akwiza pakulwa nabo ubwite ni nyobe yache.

³³ Pakuti ubuzilo ubwa kochelapo ivintu buyaniziwe kale, bwayaniziwa zila kwa mwene uwa ku Asiliya. Ichiliba icha moto chinichi chibizu, sona ichikulu chiyaniziwe chizuye numoto sona ninkwi, umuyi uwa Mwene ghuli, ngati kasoko aka sulufule kakupemba umoto.