Yesaya 29 - IBAYIBOLO 2024

Intamyo izya Yelusalemu

¹ Chighune kukwako awe Yelusalemu, Yelusalemu, akaya akakulu nkani kako u Devedi akazengamo! Onjelezyako umwaka kumwaka ghoka, amasiku aghalusekelo ghendelelaye.

² Loli nkwiza pakumubika u Yelusalemu mukaya akantamyo, akwiza pakulila nukufwifwitila akwiza pakuba ngati chighemo, chicho chili libanda lyene.

³ Nkwiza pakukuzyungulila na basilikali, po nkwiza pakubazyungulila ni chitembe, sona nukukumba amalinga aghakuvwamamo

⁴ U Yelusalemu akwiza pakuba ngati chizyuka, ukulwisya pakunena pasi pachisu. Izyu lyako likwiza pakufumila pasi ngati lizyu ilya chizyuka, izyu lyako likwiza pakuteketa bulo pasi palufumbi.

⁵ Loli ubwinji ubwa balwani bako bukwiza pakuba ngati lufumbi, sona abasilikali bache abakoghofya, bakwiza pakupupuziwa ni mpepo ngati lyelelo. Umwalubilolubilo sona umwakabalilo akapimpa bulo,

⁶ u Mwene Uwamaka Ghosi akwiza pakukwizila, nukupaya na kasenyenta sona ni chongo ichikulu nkani, nukankungu nu kabefu sona ni ndimi izya moto uwakulungulizya.

⁷ Po abasilikali bosi aba inko zyosi, zizyo zikulwa nakaya akakulu nkani aka Yelusalemu zizyo zikulwana nawe poka na malinga ghache, sona nukukazyungulila, kakwiza pakuba ngati chilota, sona ngati chisetuka icha pabusiku,

⁸ ngati mumo umuntu uwazala akulotela ukuti alipakulya, loli bo alamusya, akwivwanga izala, ngati mumo umuntu yuyo ali ni nyota akulota ukuti ali pakung'wela loli bo akulamusya akwivwanga inyota. Momumo zikwiza pakubela nutwaya utwa inko zyosi, tuto tukulwana ni Ghamba ilya Ziyoni.

⁹ Mwipelaye bapunganu sona muswighaye, mwipelaye bafwamaso, sona mutakennyanje, mukolwanje, loli mutakakolwanje nuvinyo, mutantalilaye loli mutakatantalilaye pachifukwa icha bwalwa.

¹⁰ U Mwene abaghoneka nu tulo utwakufwa nato, abighalila amaso ghinyu amwe mwe balaghuzi, abavwinka imitu yinyu amwe mwe benelezi.

¹¹ Pakuti kukwinyu ichisetuka chosi chite ni mbombo, loli amazyu ghagho ghighaliliwe mwibuku. Nanti mungamupa yumo yuyo angabelenga nukumubuzya ukuti, “Nalamba belenga,” akwiza pakwamula ukuti, “Ntangabelenga chifukwa ichakuti lyighaliliwe.”

¹² Pamo nanti mungamupa yumo ibuku yuyo atangabelenga nukumubuzya ukuti, “Twalamba belenga,” akwiza pakwamula, ukuti, “Intamenye pakubelenga.”

¹³ U Mwene akuti, “Abantu banaba bakupalamila kukwane namalomo ghabo, nukunchindika ane nimilomo yabo, loli amoyo ghabo ghali kubutali nkani nane. Ukunchindika kwabo kwa ndaghilo, zizyo bamanyisiwe na bantu.

¹⁴ Polelo nkwiza pakubabombela abantu aba, ivyakuswighisya ivyakulekanalekana, amahala agha bantu abamahala ghakwiza pakuzimila, sona ubumanyi ubwa bantu abamanyi, bope bukwiza pakuzyebeluka.”

¹⁵ Chighune ku bantu babo bakufisa inyinong'ono zyabo, ukuti u Mwene atakazimanye, banabo imbombo zyabo zyamuchisi sona bakwinong'ona ukuti, “Nkimba wewenu yuyo angatwenya? Fwandi wewenu yuyo angazimanya?”

¹⁶ Bakuving'anamula ivintu vyosi, nkimba choni chicho umumatasonta apimiwanje, pakuba ngati litope! Nkimba chicho chamatiwa chingamubuzya yuyo achimata ukuti, “Te wewe ukamata”? Nkimba isonta yingamubuzya yuyo akayimata ukuti, “Utamenye nachimochimo”?

¹⁷ Nkimba u Lebanoni atakwiza pakunyokela muchisu ichamuvundo, pakabalilo akapimpa bulo? Sona umughunda uwamuvundo ghukwiza pakuboneka ngati musitu?

¹⁸ Pisiku lilalila uwa mapuli akwiza pakwivwa amazyu gha mwibuku, abantu babo bakikalagha muchisi bakwiza pakwennya, sona abafwamaso bakwiza pakwennya.

¹⁹ Abantu abakwiyisya bakwiza pakusekelela mwa Mwene, bope abapina pakusekelela mu Muzelu yula uwa Izilayeli.

²⁰ Abantu abakali bakwiza pakuzimila, bope abalobezyo bakwiza pakuzyebeluka, sona abantu babo bakubennya abanji ni lyiso ibibi, bakwiza pakwefiwapo.

²¹ U Chala akwiza pakubanangannya babo bakubanena abamwabo kabibi, abantu babo bakubalongela ababomba mbibi, sona babo bakubikila bukaboni ubwa bumyasi, nukubakanizya abantu abasubiliwa, ukuti batakalongiwanje mubugholosu.

²² Polelo zinizi zyo zizyo u Mwene yuyo akamupoka u Abulahamu akuyibuzya inyumba iya Yakobo ukuti, “Abantu bane batakwiza pakuyimba pamo ivyeni vyabo vitakwiza pakuba ni soni.

²³ Bo bakubennya abana babo, babo mbombo iya nyobe zyane, bakwiza pakulichindika itabwa lyane izelu, bakwiza pakubumanya ubuzelu ubwa Muzelu uwa Yakobo, sona bakwiza pakumunyila u Chala uwa Izilayeli.

²⁴ Abantu abapunganu bakumanyila pakwivwisya, sona babo pakwilumbusya bakwiza pakwitika pakumanyisiwa.”