Yesaya 28 - IBAYIBOLO 2024

Izyakubasoka abalongozi aba mu Izilayeli naba mu Yuda

¹ Chighune ku bumwene ubwakwikwezya na baching'wela aba mu Izilayeli, sona naku bwezya ubwa kufoka ubwa mpumpu iya bumwene bwache, bubo buli kwikombe ilya muvundo ilya akakulu nkani kala, ukwituvya ukwa babo bakolizwe nu vinyo!

² Ennya, u Mwene ali nawe yumo yuyo ali na maka nkani. Ali ngati vula iya mabwe ni mpepo iya kunangannya, ali ngati vula yiyo yikutima bulo, sona na mizi aghakwizula ghagho ghakubukizya vyosi.

³ Ukwikwezya ukwa balongozi abaching'wela aba mu Izilayeli, kukwiza pakukanyankiliwa ni nyayo.

⁴ Ubwezya ubwakufoka ubwa buchindamu bwache, bubo buli kwikombe ilya muvundo, ubwezya bulabula buli ngati vikomwa vya kwanda pakutona, panapo na panapo nanti abantu bavyennya, bakuyaba nukuvilya.

⁵ Pisiku lilalila u Mwene Uwamaka Ghosi, akwiza pakuba mpumpu iya buchindamu, iyakuboneka akiza ku bantu bache abakusyalako.

⁶ Weyuyo akwiza pakuba mulongi uwabugholosu, akwiza pakubapa amaka abantu babo bakulonga, sona na basilikali babo bakulindilila pamilyango,

⁷ sona na bantu banaba bope bakutantalila, pachifukwa icha vinyo. Abaputi na balaghuzi bakutantalila pachifukwa icha vinyo, bakutantalila bo bakwennya ivisetuka, bakupotwa pakulonga inongwa zizyo abantu bakubizila nazyo.

⁸ Amatebulo ghosi ghali na matapisi ghene, patalipo napamo papo pate ubunyazu.

⁹ Nkimba wewenu u Mwene akuyezya pakumumanyisya? Nkimba akumulingannya uwenu amazyu ghanagha? Fwandi bana babo balesiwa pakonka? Pamo bana babo befiwako bulo kumabele?

¹⁰ Pakuti chikuyezya pakutumanyisya panandipanandi ululaghilo nu lulaghilo, sona umuzele nu muzele, pano tunandi bulo sona pala tunandi bulo.

¹¹ Po ilelo, u Chala akwiza pakunena na bantu bache mu ndimi injeni,

¹² akababuzya ukuti, “Ubu bo buzilo ubwakutuzikizyapo, baleke babo balita batuzye,” sona, “Ubu bo buzilo ubwakweghamilako,” loli batakwiza pakunteghelezya.

¹³ Po amazyu agha Mwene ghakwiza pakutumanyisya panandipanandi, ululaghilo nu lulaghilo, sona umuzele nu muzele, pano tunandi bulo sona pala tunandi bulo, umwakuti bo bakwenda, bawilaye ichighalama, bavulalaye nukuwila muchipingo sona balemiwanje,

¹⁴ Polelo ivwa izyu ilya Mwene, amwe mwe bantu aba madinko, mwe mukubalaghila abantu aba mu Yelusalemu.

¹⁵ Mukwituvya mukuti, “Aswe twafinga ulufingo nubufwe, sona twivwana nipumpa, Bo ulufundo ulwakoghofya lukwenda, lutakatupalamasyanje, pakuti twabupela umbumyasi pakuba chakuponelamo, sona bope ubuzimbuli pakuba chakuvwamilamo.”

¹⁶ U Mwene Uwamaka Ghosi akuti, “Ennya, nkwala ibwe mu Ziyoni, ibwe ilya mutengo ilya pankuto palwalo ulwanaloli, umuntu wesi yuyo akusubila mumwache, atakwiza pakukoziwa isoni.

¹⁷ Nkwiza pakubupela ubwanaloli pakuba lukusa ulwakupimila, bope ubugholosu pakuba lukusa ulwa kugholosezya, ivula iya mabwe yikwiza pakupyela chicho ubumyasi bukuvwamamo, po amizi ghakwiza pakwizula mosi umwakuvwamamo.

¹⁸ Ulufingo lwinyu nu bufwe lukwiza pakuba lwabulo, po ukwivwana kwinyu ni pumpa kutakwiza pakwendelela, Bo ulufundo ulwakoghofya lukwenda mukwiza pakutitiliwa.

¹⁹ Bo chikubombiwa, chikwiza pakubamala. Indabindabi ni ndabindabi sona umusanya nu busiku, chikwiza pakubamala.” Amazyu ghanagha ghakwiza pakuboghofya abantu bako

²⁰ Ichitala chipimpa nkani pakughololokapo, sona lyope ibulangeti lifinye pakuvwinka.

²¹ U Mwene akwiza pakuvundumuka, ngati mumo akabombela Pighamba ilya Pelazimu, akwiza pakuba mukali, ngati mumo akabombela mwikombe ilya Gibeyoni, pakubomba imbombo yache, imbombo yache iyakuswighisya! Pakubomba imbombo yache, imbombo yache injeni.

²² Leka ukobezya kwinyu, pamo iminyololo yinyu yikwiza pakubafyenya u Mwene u Mwene Uwamaka Ghosi ambuzya nizya ukunanganika ukwa chisu chosi ichapasi.

²³ Teghelezya nukwivwa izyu lyane po mwivwanje sona mwivwisyanje zizyo nkunena.

²⁴ Umuntu yuyo akulima umughunda ukuti abyale, nkimba akwendelelagha bulo pakulima? Nkimba akwendelelagha bulo pakudibula nukupuzannya?

²⁵ Buli nanti ayannya, nkimba atakupesamo ukale nu busambya? Nkimba atakubyalamo mapemba na malezi, ni zyamwabo mupaka mulubazu ulwa mughunda?

²⁶ U Chala wache akumumanyisya nukumulingannya izila inyiza.

²⁷ Utakubombezya ichela chakukomelapo ingano pakukoma ubusambya pamo ukale, loli akubombezya akakwi akapepusu pakukoma ukale, sona akubombezya indisa pakukoma ubusambya.

²⁸ Ingano yisyeyiwanje pakuba yakupiyila ichibama, sona nayumoyumo umuntu yuyo akuyikomagha bulo, Napapo akwendezyapo ingolo iyakukomela, loli ifalasi zyache zitakusya ingano yila.

²⁹ Amahala ghosi ghanagha ghakufuma kwa Mwene Uwamaka Ghosi, u Mwene wakuswighisya, ubumanyisi bwache bwakuswighisya, sona amahala ghache ghakufikapo.