Yesaya 27 - IBAYIBOLO 2024

Ukupona ukwa ba Izilayeli

¹ Pisiku lilalila, u Mwene akwiza pakubombezya upanga wache, yuyo wakoghofya nu mukulu nkani sona wamaka, pakuyifunda inyivwila sona yikwinnyenga po akwiza pakuchighogha ichinyamana chila icha munyanja.

² Pisiku lilalila U Mwene akwiza pakwimba, nizya mughunda uwa mampesya uwakumuhobosya ukuti:

³ Ane, ne Mwene, nkuwenelezya, nkughusembelela bwila. Nkughusungilila ubusiku nu musanya, umwakuti patakabepo nayumo uwa kughunangannya.

⁴ Intakalaye. Nanti mwame amivwa ni ntolovu ukulwana nane, ngali nalwa navyo nukuvyocha, ngali nanyamuka nukulwa navyo, sona nukuvyocha vyosi mumoto.

⁵ Loli nanti abalwani aba bantu bane, bakulonda ukuti imbapoke, leka babanje nane mumutende, ee, leka babanje nane nu mutende.

⁶ Mumasiku ghagho ghakwiza abaluko ulwa Yakobo bakwiza pakwisimika, u Izilayeli akwiza pakuba ni samba sona akwiza pakubazya, sona akwiza pakwizuzya ichisu chosi ichapasi ni vikomwa.

⁷ Nkimba u Mwene abakoma aba Izilayeli, ngati mumo akabakomela abalwani babo? Nkimba aghoghiwa ngati mumo bakaghogheliwa, babo bakamughogha?

⁸ U Mwene akubafunda abantu bache pakubinjizya mubuzya, akubefyamo ni mpepo iyakoghofya iyakubufumilo bwizuba.

⁹ Bunubu, po imbibi izya Izilayeli zikwiza pakuhobokeliwa, vinivi vikwiza pakuba vikomwa ivyakwefesezya imbibi, akwiza pakughatizannya amabwe ghosi agha vighemo pakuba lufumbi, ichighemo ichakwiputilapo ichifwani icha Ashela, pamo ichighemo ichakufukizizya utwa kununkila, vitakwiza pakubangapo sona.

¹⁰ Akaya akakulu nkani akamalinga kaba chisami, kaba kaya akakulekiwa, sona kasuliwe ngati nkolongo, kulakula ingwata zikulyelako, zikughona nukulya isamba zyache.

¹¹ Nanti isamba zyache zyumila zikupyoka, sona abakolo bakuzitenya nukuzipela pakuba nkwi. Pakuti banaba bo bantu babo batakwivwa, po Umupeli wabo ate ni chililizi nabo, Umupeli wabo atakubapelela ichisa.

¹² Pisiku lilalila u Mwene akwiza pakubabungannya abantu weka na weka ukwanda kulusoko ulwa Yufuleti mupaka kulusoko ulwa Ijiputi ngati muntu yuyo akupeta ingano pakwefyamo ilyelelo.

¹³ Sona pisiku lilalila ipati ikulu nkani likwiza pakulila. Abantu bosi babo bakaba mubuzya muchisu icha Asiliya na muchisu icha Ijiputi bakwiza pakumwiputa u Mwene pighamba izelu ilya mu Yelusalemu.