Yesaya 25 - IBAYIBOLO 2024

Ulwimbo ulwa mapalo

¹ Wee Mwene, awe we Chala wane, nkwiza pakulikwezya nukulipala itabwa lyako, pachifukwa icha busubiliwa bwako ubwakufikapo, wabomba ivyakuswighisya vivyo ukabatika kale.

² Wakapela Akaya akakulu nkani, pakuba chibunga chamabwe. Akaya akakulu kala wakapela pakuba chisami, sona amalinga agha bayeni aghamaka agha kaya akakulu nkani, ghatakwiza pakubapo sona, ghatakwiza pakuzengiwa sona

³ Polelo inko izya bantu abamaka zikwiza pakukuchindika, inko zizyo zite ni nkalo zikwiza pakukunyila.

⁴ Wee Mwene waba we chakuponelamo abantu abapina, nabapotwe pakabalilo akantamyo, we kubapoka kumpepo iya maka, sona we kazundila kabo. Pakuti umuyi uwa muntu umukali, ghuli ngati mpepo yiyo yikukoma pachibumba

⁵ ngati butukuzi munkolongo. Wewe ukapumizya ichongo icha bayeni, ngati mumo ubutukizu bukutozoliwa, nu muzyezye uwa libingu, po momumo ulwimbo ulwa muntu umukali lukumalila.

⁶ Pighamba linili po papo u Mwene Uwamaka Ghosi, akwiza pakuyannya ichakulya icha palusekelo ulwa inko zyosi, ulusekelo ulwa vinyo sona ni nyama inonu.

⁷ Pighamba linili akwiza pakwefyapo umwalubilo, ichitima chicho chivwinkite inko, umwenda ghugho ghuvwinkite inko zyosi.

⁸ Akwiza pakuyimila imfwa bwila na bwila. U Mwene Uwamaka Ghosi akwiza pakubasyumula amasozi, nukubefya isoni abantu bache pachisu chosi ichapasi. U Mwene anena.

⁹ Pisiku lilalila abantu bakwiza pakunena ukuti, “Naloli uyu we Chala witu, tukamusubila po akatupoka. Uyu we Mwene yuyo tukamusubila, zagha tusekelaye nukuhoboka pachifukwa icha kutupoka.”

¹⁰ Inyobe iya Mwene yikwiza pakuba pighamba linili, loli aba Mowabu bakwiza pakukanyankiliwa, ngati mumo isote likukanyankiliwa mumumvundo.

¹¹ Bakwiza pakukuzulila inyobe zyabo palapala, ngati mumo uwakusaba yula akukuzulila inyobe zyache, bo ali pakusaba. U Chala akwiza pakwisya ukwituvya kwabo, poka na chicho chosi inyobe zyabo zyengo pakuchibomba.

¹² Akwiza pakughamongolannya amalinga ghinyu amatali, akwiza pakughawisizya pasi palufumbi.