Yesaya 24 - IBAYIBOLO 2024

U Mwene akwiza pakuchifunda ichisu chosi ichapasi

¹ Ennya, u Mwene akwiza pakuchinangannya ichisu chosi ichapasi, nukuchipela pakuba chisami, akwiza pakuchandula akabonekele kache kosi, nukubanyampannya babo bakwikala mulamula,

² umu momumo zikwiza pakubela nu muntu bulo, sona momumo zikwiza pakubela nu muputi, mumo zikwiza pakubela kwa mwene, momumo zikwiza pakubela nu wambombo, mumo zikwiza pakubela nu mwene umukolo, momumo zikwiza pakubela nu wambombo umukolo, mumo zikwiza pakubela nu wakughulizya, momumo zikwiza pakubela nuwakughula, mumo zikwiza pakubela ku wakwazima, momumo zikwiza pakubela nayuyo akwazimizya, mumo zikwiza pakubela nu wakukopa, momumo zikwiza pakubela nu wakukopezya.

³ Ichisu chosi chikwiza pakunanganika nukufyuliwa. Pakuti u Mwene anena amazyu ghanagha.

⁴ Ichisu chikulila nukufoka, ichisu chosi ichapasi chikuyimba nukufoka, kumwanya kukuyimba poka ni chisu ichapasi.

⁵ Abantu bachinyazya ichisu ichapasi, nukuzinangannya indaghilo nivimanyisyo, nukulunangannya ulufingo ulwa bwila na bwila.

⁶ Polelo ichighune chikulungulizya ichisu, po abantu babo bakuyimba pachifukwa icha bubibi bwabo, cho chifukwa baba banandi bulo babo balekiwa.

⁷ Amampesya ghakufoka, uvinyo akuba munandi, abantu bosi babo bakasekelagha bakukoloma.

⁸ Ukusekela ukwa ivisekeseke kwimikiwa, ichongo icha bantu babo bakasekelelagha kwamala, ulusekelo ulwa chinanda luli myee.

⁹ Kutaliko ukwimba sona bo bali pakung'wela uvinyo, ubwalwa bukubaba kubabo bakubung'wela.

¹⁰ Akaya akakulu nkani kananganika umulyango ghosi uwa nyumba wighaliliwe.

¹¹ Abantu bakulila mumisebo pachifukwa ichakuti kute uvinyo, ulusekelo losi lwipela pakuba chitima, ubuhobosu bosi ubwa chisu bwafumamo.

¹² Akaya akakulu nkani kasyala bulo chisami, imilyango yache yope yighuye.

¹³ Momumo zikwiza pakuba ku inko zyosi izya muchisu ichapasi, ngati mumo ikwi ilya misyunguti balipalanta, pamo nanti amampesya ghamo ghasyala aghakusalala.

¹⁴ Bakakwezya amazyu ghabo bo bakukolomoka umwakusekela, ukufuma kubwinjillilo bwizuba bakufumusya nizya buchindamu ubwa Mwene.

¹⁵ Polelo amwe mweba kubufumilo bwizuba mumupe ubuchindamu u Mwene, mulikwezyanje itabwa ilya Mwene, u Chala uwa Izilayeli musungo zyosi izya munyanja.

¹⁶ Ukufuma kubumalilo ubwa chisu tukwivwa ukwimba ukuti, “Ubuchindamu kwa yuyo mugholosu.” Loli nkati, “Namala, Namala! Chighune kukwane! Abantu abazimbuli bakumbombela mubuzimbuli, po ubuzimbuli bwabo bukwendelela bulo!”

¹⁷ Ivyakoghofya, ivibwina nivitegho vikulindiliye awe, mwee bantu ba pachisu chosi ichapasi.

¹⁸ Wesi yuyo akuchimbila ivyakoghofya, akwiza pakuwila muchibwina, wesi yuyo akufumamo muchibwina, akwiza pakulemiwa muchitegho. Imilyango iya kumwanya yighukite, ulwalo ulwa pachisu ichapasi lukuneng'ena.

¹⁹ Ichisu ichapasi chapyoka, chagabinkana tunanditunandi, sona chili pakuneng'ena kabibi nkani.

²⁰ Ichisu chosi ichapasi chavulungana, ngati muntu yuyo ang'welite ubwalwa, chikutetema ngati kanyumba mumpepo, ichisu chizyunguliliwe ni mbibi chikuya pakuwa techikanyamuke sona.

²¹ Mwisiku lilalila u Mwene akwiza pakubafunda abamaka bosi, babo bali pamwanya na bamwene aba muchisu ichapasi.

²² Akwiza pakubabungannya poka ngati bakayidi babo bali munyumba iya bupinyiwa, bakwiza pakwighaliliwa mujele, nukufundiwa bo ghendapo amasiku aminji.

²³ Umwezi ghukwiza pakwima, lyope izuba litakwiza pakulama, pakuti u Mwene Uwamaka Ghosi akwiza pakulaghila, pighamba ilya Ziyoni na mu Yelusalemu, po pantazi pa basongo pakwiza ukuboneka ubuchindamu.