Yesaya 23 - IBAYIBOLO 2024

Ubulaghuzi nizya Tile

¹ Agha gho mazyu aghabulaghuzi ghagho ghakunena nizya kaya akakulu nkani aka Tile: Wee bwato ubukulu nkani ubwa Talishishi lilagha! Pachifukwa ichakuti akaya aka Tile kananganika, sona kasyala kate ni nyumba pamo iloboko. Amazyu ghaba gha abantu aba muchisu icha Sayipulasi.

² Mwee bantu abapa kasungo mubanje myee, sona mwe baghulizi aba mu Sidoni, mwe ntumi zizyo zikaloboka inyanja, nukwenda panyanja inkulu nkani.

³ Pakuloboka inyanja bakaghulizya amalezi agha mu Shiholi, inyinulo iya mu Nayilo. Wee Sidoni waba we munalo uwakughulizizyapo inko.

⁴ Wee kaya aka Sidoni ukoziwanje isoni nawe we ilinga ilya panyanja, pakuti inyanja yanena ukuti, “Intakwivwapo nalumo ukubaba ukwakupapa abana, nukubalela abana abalumendo, pamo abana abalindu intabalelitepo nalumo.”

⁵ Nanti amazyu ghafika kuchisu icha Ijiputi, bakwiza pakuyimba nkani nipangwi ilya mu Tile.

⁶ Mulobokelaye kuchisu icha Talishishi, mwee bantu abapakasungo lilagha,

⁷ Nkimba aka ko kaya kinyu akakulu nkani, kako mukusekela nako, kako kakanda kale abantu bakendagha ubulendo ubutali, nukwikalana muvyisu ivya kubutali?

⁸ Nkimba wewenu yuyo akabatikagha pakulwana nakaya aka Tile, akaya kako abaghulizi bakaba bo bamwene, kako abaghulizi bache bakaba bakuchindikiwa pachisu?

⁹ U Mwene Uwamaka Ghosi weyuyo akabatika ukuti akuwisye pasi, ukwituvya kosi ukwa buchindamu, nukubasamula abachindikiwa bosi pachisu ichapasi.

¹⁰ Mwee bantu ba muchisu icha Talishishi, ilelo limagha bulo amaghunda ghinyu, pakuti atalipo nayumo uwakubavighilila.

¹¹ U Mwene agholosizye inyobe yache panyanja nukubuneng'ennya ubumwene, nukubalamula pakughanangannya amalinga ghaba Kenani.

¹² Po akati, “Wee kaya aka Sidoni utakwiza pakusekela, mwee bantu ba mu Sidoni, ilelo mwayiviwa! Ukalobokela ku Sayipulasi, kope kulakula utakwiza pakubwagha ubutuzyo.”

¹³ Ennya ichisu icha ba Babiloni, abantu banaba batakubelengiwa sona, aba Asiliya bavileka ivinyamana pakwinjila mukaya aka Tile, ukuti kabanje kaya kavinyamana. Bakazenga ivitembe vyabo ivya bwite, bakamongolannya amalinga ghache nukukaleka pakuba chisami.

¹⁴ We bwato ubukulu nkani ubwa ku Talishishi lilagha, pakuti ilinga lyako lyananganika!

¹⁵ Pakabalilo kalakala akaya aka Tile kakwiza pakuluviziwako amaka sevente, amasiku ghagho ghakuyana bulo nubumi ubwa mwene. Loli pabumalilo ubwa maka ghanagha, zikwiza pakukawila akaya aka Tile ngati mumo lukunenela ulwimbo ulwa umukolo umalaya ukuti,

¹⁶ “Senda ichinanda, endaendagha mukaya akakulu nkani, wee mukolo umalaya yuyo aluviziwe, lizya akiza ichinanda, imbagha inyimbo inyinji umwakuti ukumbukiwanje.”

¹⁷ Pabumalilo ubwa maka sevente u Mwene akwiza pakukakumbuka akaya aka Tile. Akwiza pakunyokela sona pambombo yache iya bumalaya, akwiza pakulowa na bamwene bosi aba muchisu chosi ichapasi.

¹⁸ Loli zizyo akabilapo sona zizyo azyagha zikwiza pakupaghuliliwa kwa Mwene, batakwiza pakuvisunga pamo ukuvibungannya. Loli akwiza pakubaghulilagha abantu ivyakulya ivyinji na menda amiza babo bakumuchindikagha u Mwene.