Yesaya 22 - IBAYIBOLO 2024

Ubulaghuzi nizya Yelusalemu

¹ Agha gho mazyu aghabulaghuzi ghagho ghakunena nizya ikombe ilya chisetuka: Nkimba choni chicho chikubombiwa ilelo, ukuti mwebosi mukwele patusonje?

² Wee kaya akakulu wizuye bulo nichongo, wee kaya akakulu nkani aka chongo na kalusekelo? Abantu babo bakafwa batakaghoghiwa nupanga, pamo ukufwila kubwite.

³ Abalongozi binyu bosi bachimbiliye poka, balemiwa ukusita ukubombezya ubwele. Mwe bosi mwe mukalemiwa mukaba mwe bakayidi, napapo mukachimbila bo umulwani winyu achili kubutali.

⁴ Polelo nkati, “Mundeke nemwene, ukuti indilepo nkani. Mutakansangalusyanje pachifukwa icha kunanganika ukwa bantu bane.”

⁵ U Mwene, u Mwene Uwamaka Ghosi, abika isiku ilyavyongo, sona ilya kukanyankila nilya koghofya Mwikombe ilya Chisetuka, isiku lilyo amalinga ghakumongonkana, nukulila kumaghamba pakulaba ubwavwilizi.

⁶ Abasilikali aba chisu icha Elamu bakiza, bo bakwelite pafalasi, munyobe zyabo bo balemite ubwele ni mpalala, po abasilikali aba ku Kili bakiyannya, bo bali ni ngulu.

⁷ Amakombe ghinyu amiza nkani ghizuye ningolo izya bwite, sona abendezya ifalasi bimiliye pamilyango iya twaya utukulu nkani,

⁸ amalinga agha mu Yuda ghawiye. Po pisiku lilalila ukennya ivilwilo, munyumba iya bumwene iya mumusitu.

⁹ Ukakennya akaya akakulu nkani aka Devedi, ubuzilo ubwinji bukamongonkana, mukasunga amizi muntamba icha kuntende.

¹⁰ Mukabelenga inyumba izya mu Yelusalemu nukumongolannya inyumba ukuti muzengele ilinga.

¹¹ Mukazenga ichakusungilamo amizi, pakasi pavibumba vibili ivya ntamba izya mizi pachiziba ichakale, loli mutakamwennya yuyo akabomba zinizi, pamo ukumwinong'onapo yuyo akachiyannya kale.

¹² Pisiku lilalila u Mwene, u Mwene Uwamaka Ghosi akabitizya abantu ukuti balile nukufwifwitila, ukumeta isisi nukuvwala amasaka.

¹³ Loli ennya, kuli ulusekelo nu buhobosu, baghogha ing'ombe nukubola ing'ozi, ukulya inyama nukung'wela uvinyo! Nukunena ukuti, “Leka tulyanje nukung'wela uvinyo, pachifukwa ichakuti indabi tukwiza pakufwa!”

¹⁴ U Mwene Uwamaka Ghosi anvumbuliye mumakutu ghane ukuti, “Naloli mutakwiza pakuhobokeliwa pachifukwa icha mbibi zinizi, mupaka mufwe.” U Mwene Uwamaka Ghosi anena.

¹⁵ U Mwene Uwamaka Ghosi akuti, “Bukagha kwa Shebina yuyo mulindilili, usongo uwa nyumba iya bumwene nukumulalusya ukuti,

¹⁶ Nkimba ukubomba ichoni kuno, sona wenu yuyo akwitikizizye pakwiyanizizya ipumpa, pabuzilo ubwapamwanya nukuyannya mukasi mwilyalabwe apakutuzyapo wemwenecho?

¹⁷ Awe we muntu uwamaka, u Mwene akwiza pakukusumba akabibi nkani.

¹⁸ Akwiza pakukunnyembetelela nkani, ngati we bola nukukusumba muchisu ichikulu. Po ukwiza pakufwila kulakula, ingolo zyako izya bwite inyiza zikwiza pakusyala, nukubakozya isoni abamunyumba iya mwene wako!

¹⁹ Nkwiza pakukuchimbizya pambombo yako, nukukwisya pasi papo ukufuma.”

²⁰ U Mwene akati, “Pisiku lilalila nkwiza pakumwitizya umubombi wane, u Eliyakimu umwana uwa Hilikiya.

²¹ Nkwiza pakumuvwika inkazo yako nukumupinya ulamba mumusana nukumupa ubulaghili bwako. Akwiza pakuba we tata uwa bantu babo bakwikala mu Yelusalemu nakubanyumba iya Yuda.

²² Nkwiza pakumupa ubulaghili panyumba iya Devedi. Pakuti chicho ighula atalipo na yumoyumo yuyo angighalila sona chicho ighalila atalipo na yumoyumo yuyo angighula.

²³ U Mwene akwiza pakumukazya ngati kakwi, po akwiza pakuba chitengo icha buchindamu munyumba iya wise.

²⁴ Bakwiza pakumutwika ubung'wamu bosi ubwa banyumba yache bukwiza pakuba papache, abana na bizukulu bache ni vibombelo vyosi ivinandi, ukwandila imbale mupaka pa sonta.

²⁵ “Pisiku lilalila,” U Mwene Uwamaka Ghosi akati, “Akakwi kako kakasimikiwa pabuzilo bwache ubukafu kakwiza pakunyukuliwa, kakwiza pakudumuliwa nukuwa pasi, ukatundu yuyo akapayikiwa pamwanya akwiza pakunanganika.” U Mwene anena.