Yesaya 21 - IBAYIBOLO 2024

Ichisetuka icha kuwa ukwa Babiloni

¹ Agha gho mazyu aghabulaghuzi ghagho ghakunena nizya nkolongo iya kunyanja: Ngati kankungu kako kakuzyungulila ichisu ichakuntende, ukunanganika kukwiza pakufuma kunkolongo iya kuchisu ichakoghofya.

² Ichisetuka ichakoghofya chikulanjiziwa kukwane, uwakunangannya akunangannya bulo, wepe uwakufyula akafyulagha. Wee Elamu lwanga ubwite! Mwee bantu bamu Mediya, mubazyungulile nu bwite abantu aba mu Babiloni! Nkwiza pakumazya amayimba ghagho bakaghapela.

³ Zizyo nkazyennya nukuzyivwa muchisetuka zikampelela ubogha nu bubavu, ububavu ngati ubwa mukolo yuyo ali pakusayiwa. Nkutantalila nazizyo nkwivwa, sona zizyo nkuzyennya zinkuvulungannya.

⁴ Umoyo wane wavulungana, ubogha bwampelela ukutetema, akabalilo akachamabwila, kako nkakanyonywanga kaba chakoghofya chane.

⁵ Bakayannya patebulo nukutengapo amenda, bakulya nukung'wela! Nyamuka mwe basongo aba basilikali ababwite, muzipake ingulu zyinyu namafuta!

⁶ Izi zyo zizyo u Mwene akumbuzya akuti, “Buka umubike umulindilili ukuti afumusyanje zizyo akuzyennya.

⁷ Nanti akuzyennya ingolo izya bwite, poka nabendezya ifalasi babilibabili, pamo abendezya impunda, sona na babo bakwelite pangamila, leka abe maso nkani.”

⁸ Po yuyo akennyanga akakolomoka akati, “U mwene wane pamusanya na pabusiku, nkwikala pachitembe.

⁹ Ennya, abendezya ingolo izya bwite, poka na bendezya ifalasi babilibabili. Po akamula akati, ‘Akaya aka Babiloni kawa, kawa! Ivifwani vyosi ivya bachala, vilambalaye pasi nukumenyunkana!’ ”

¹⁰ Mwee bantu bane, mwakomiwa pabuzilo ubwakukomelapo inyinulo, leka imbabuzye zizyo nivuye ukufuma kwa Mwene Uwamaka Ghosi, u Chala uwa Izilayeli.

Ichisetuka nizya chisu icha Edomu

¹¹ Agha gho mazyu aghabulaghuzi ghagho ghakunena nizya chisu icha Edomu: Weka akunyitizya muchisu icha Seyili akuti, “Wee mulindilili, nkimba ubusiku bwame bulibuli? Wee mulindilili, nkimba ubusiku bwame bulibuli?”

¹² Po umulindilili yula akwamula akuti, “Indabindabi yikwiza, sona bope ubusiku bukwiza. Nanti ungalalusya, po lalusya, nukunyokela sona.”

Ichisetuka nizya chisu icha Alabiya

¹³ Agha gho mazyu aghabulaghuzi ghagho ghakunena nizya chisu icha Alabiya: Mwee bantu aba mu Dedani, mwe mukuzenga ivisakasa munkolongo iya chisu icha Alabiya,

¹⁴ zagha namizi kubabo bali ninyota, amwe mwe mukwikala muchisu icha Tema, zagha nivyakulya ivya babo bakachimbiziwa.

¹⁵ Pakuti bakuchimbila kwa panga, kubapanga babo bakawesiwa, nubwele sona nu bwite ubwa koghofya.

¹⁶ Izi zyo zizyo u Mwene akunena nane akuti, “Bo umwaka ghoka ghuchili pakumala, ubuchindamu bosi ubwa ba Kedali bukwiza pakumala, ukuyana na maka ghagho bakubelengela nu muntu yuyo asimbiwa imbombo,

¹⁷ Abakupona ababwele, ababwite abamaka mu Kedali, bakwiza pakuba banandi bulo.” U Mwene, u Chala uwa Izilayeli, anena zinizi.