Yesaya 20 - IBAYIBOLO 2024

Ichimanyilo icha mulaghuzi yuyo akaba nkule

¹ U mwene u Saligoni uwamu Asiliya, akamulamula usongo uwa basilikali pakukafyula akaya akakulu nkani aka Ashidodi, po akakafyula.

² Pakabalilo kalakala u Mwene akamubuzya u Yesaya umwana uwa Amozi akati, “Vula amasaka ni nkwato.” Po akabomba bunubu bo akwenda nkule sona ni nyayo zyene.

³ Po u Mwene akati, “Ngati mumo umubombi wane u Yesaya avulila amasaka ni nkwato sona akwenda nyayo zyene amaka matatu, chinichi cho chimanyilo ni chiswigho paba Ijiputi, na paba Etiyopiya chicho chikwiza pakubawila.

⁴ Umu momumo u mwene uwa ku Asiliya akwiza pakuchisendela ichisu icha Ijiputi nicha Etiyopiya kubuzya, akwiza pakuvipela ukuti vyendaye nkule sona nyayo zyene, abasongo na banadi ukuti bakoziwanje isoni.

⁵ Abantu bosi babo bakuchisubila ichisu icha Etiyopiya nukwituvya pachifukwa icha Ijiputi bakwiza pakusamuliwa.

⁶ Bo akabalilo kafikila, abantu babo bakwikala mulubazu ulwa nyanja bakwiza pakunena ukuti, ‘Ennya zizyo zyabawila abantu babo tukeghamilako sona tukuponelako kwa mwene uwa ku Asiliya! Nkimba tukwiza pakuponela kwa wenu?’ ”