Yesaya 2 - IBAYIBOLO 2024

Nizya mutende uwa bwila na bwila

¹ Izi zyo zizyo u Yesaya umwana uwa Amozi akazyennya nizya chisu icha Yuda, sona nakaya akakulu nkani aka Yelusalemu:

² Mumasiku aghabumalilo, ighamba ilya Nyumba iya Mwene, likwiza pakuba litali nkani pakasi pamaghamba ghosi. Likwiza pakuboneka pamwanya pamaghamba ghosi, sona inko zyosi zikwiza pakuchimbilila kulakula.

³ Inko inyinji zikwiza pakunena ukuti, “Zagha, twende tukwele pighamba ilya Mwene, ku Nyumba iya Chala uwa Yakobo. Akwiza pakutumanyisya izila zyache, umwakuti twendaye mumo.” Pakuti ululaghilo lukwiza pakufumila ku Ziyoni, sona ivimanyisyo ivya Mwene vikwiza pakufumila mu Yelusalemu.

⁴ Akwiza pakulonga pakasi pa inko inyinji, pakasi pa bantu abinji,. Abantu bakwiza pakusyana abapanga babo pakuba majembe, sona impalala zyabo pakuba sengo. Inko zitakwiza pakulwa ubwite ninko izinji, pamo pakumanyila sona akalwile aka bwite.

⁵ Mwee baluko ulwa Yakobo, zagha twendaye mulukozyo ulwa Mwene.

Isiku ilya Mwene

⁶ Wee Mwene wabakana abantu bako, babo baluko ulwa Yakobo. Ichisu chabo chizuye na bamayele abakubufumilo bwizuba, bakubomba ivya mayele ngati bo ba Filisiti sona bamanyananite na bantu abakuzi.

⁷ Ichisu chabo chizuye u siliva nu golide, sona mope munyumba iya kusungilamo ivintu ivya pamwanya vikumalamo. Ichisu chabo chizuye ni falasi, zyope ni ngolo izya bwite zitakumala.

⁸ Ichisu chabo chizuye ni vifwani, sona bakuvyiputa pakuvifughamilila ivintu vivyo bavipangite ni nyobe zyabo, sona vivyo vimatiwe nu tufingwi twabo.

⁹ Cho chifukwa abantu bakwiza pakwisiwa sona abantu bakwiza pakubikiwa pasi. Wee Mwene utakabahobokelaye.

¹⁰ Injila mumpako izya mabwe, vwama kusi chisu pakubuchimbila ubukali ubwa Mwene, sona nukubapo ukwa buchindamu bwache,

¹¹ Abantu abamituvyo bakwiza pakukoziwa isoni, sona abantu abakwitutumula bakwiza pakwisiwa pasi. U Mwene weyuyo mpela akwiza pakukweziwa pisiku lilalila.

¹² Pisiku ilya Mwene Uwamaka Ghosi, akwiza pakubisya abantu bosi abamituvyo na bakwitutumula Akwiza pakubapota abantu bosi abakwikwezya,

¹³ sona na makwi ghosi, amatalimatali agha mwale agha mu Lebanoni na makwi ghosi agha mupandapanda agha mu Bashani.

¹⁴ Amaghamba ghosi amatali ghatenganiziwe, sona nu tughamba tosi ututali.

¹⁵ Akwiza pakuvimongolannya ivitembe vyosi ivitali, sona na malinga ghosi.

¹⁶ Akwiza pakughanangannya amabwato ghosi amakulu agha mu Talishishi nukughadwibizya, sona na mabwato ghosi agha kuboneka akiza.

¹⁷ Bosi abakwitutumula bakwiza pakukoziwa isoni, sona bosi abamituvyo bakwiza pakwisiwa pasi. Loli u Mwene weyuyo akwiza pakukweziwa pisiku lilalila.

¹⁸ Ivifwani vitakwiza pakuboneka sona.

¹⁹ Abantu bakwiza pakuvwama mumpako izya mabwe, sona kusi kuchisu pakubuchimbila ubukali ubwa Mwene. Sona nukubapo ukwa buchindamu bwache, bo akwiza pakuchineng'ennya ichisu ichapasi.

²⁰ Pisiku lilalila abantu bakwiza pakubasumbila abatunko na bakasyusyu ivifwani vyabo ivya siliva nu golide, vivyo bakipangila bene ukuti bavyiputaye.

²¹ Bakwiza pakuvwama mumpako izya mabwe, sona na muviliba ivya mumaghamba, pakubuchimbila ubukali ubwa Mwene, nukubapo ukwa buchindamu bwache bo akwiza pakuchineng'ennya ichisu ichapasi.

²² Leka pakumusubila umuntu yuyo akufwa, po nkimba umuntu angabavwa ichoni?