Yesaya 18 - IBAYIBOLO 2024

U Chala akwiza pakubafunda aba Etiyopiya

¹ Chighune ku bantu babo bakwikala mulubazu ulwa lusoko ulwa Etiyopiya, kuko kukwivwika ichongo icha vipapande,

² bakutuma intumi panyanja na mabwato, agha ntete ghagho ghakwenda pamizi. Bukagha, mwe ntumi izya lubilolubilo, ku bantu abatalitali babo amabili ghabo miza, inko zizyo bakuzinyila izya papipi na kubutali, inko inkali izya indimi injeni, babo ichisu chabo chigabiwe nisoko.

³ Mwebosi mwe mukwikala muchisu chosi ichapasi, mwe mukwikala pachisu pano, bo indembela yakweziwa pighamba, mukwiza pakuyennya, nanti ipati lyalila, mukwiza pakulyivwa.

⁴ Izi zyo zizyo u Mwene akumbuzya, akuti, “Nkwiza pakuba bulo myee, nukwennya ukufuma pabuzilo bwane ubwakwikalapo, ngati chitukizu icha pamusanya, ngati libingu ilya nganda pakabalilo akanyinulo.”

⁵ Bo inyinulo yichili, ukulama ukwa bwezya kukumala, ubwezya bukuba mampesya amatonu, akwiza pakudumula utusamba ni sengo iya kupaluntila, nukudumulako isamba izyakulemba.

⁶ Bakwiza pakubaleka bosi pighamba pakuba chakulya icha viyuni sona ni vinyamana ivya munkolongo, iviyuni vikwiza pakubalya pakabalilo kosi akachisanya, sona ivinyamana ivya pachisiku vikwiza pakubalya.

⁷ Pakabalilo kalakala u Mwene Uwamaka Ghosi akwiza pakupeghiwa ivyabupi, ku bantu abatalitali babo amabili ghabo miza, ukufuma ku bantu abakoghofya aba papipi naba kubutali inko inkali izya ndimi injeni, babo ichisu chabo chigabiwe nisoko, ivyabupi vikwiza pakubikiwa Pighamba ilya Ziyoni, ubuzilo ubwa Itabwa ilya Mwene Uwamaka Ghosi.